[年齡無界限] 就係咁，我最近出席好多喪禮: ６１　有Ｄ唔同

拎住個袋，袋入面係果本校刊，以及一Ｄ好舊嘅獎牌，尋晚我用左Ｄ時間清理下Ｄ獎牌，雖然清理完都係舊，但係就無咁多塵同污糟。

我去緊嘅地方，就係志威所住嘅醫院。

係醫院前面，我都諗緊入唔入到去探志威，因為不竟呢Ｄ收得咁貴嘅私人醫院，唔會隨便咁放個人入去靜病。

不過好彩原來小慧已經加左我個名上探病名單上面。

入到房。





「輝爺，你都黎左啊？」呢一句咁有朝氣，一定係珍妮。

「輝爺。」小段都係度。

而志威聽到珍妮嘅說話，就即刻望向我，「輝……輝……」

我行到去床邊，拎起左個袋然後同志威講：「我帶左Ｄ野黎啊，你見到一定好開心。」我將一個又一個獎牌拎左出黎，「係我地讀書果陣一齊贏返黎嘅獎牌啊。」

志威見到呢Ｄ獎牌，都好開心咁笑，「校……校隊……」





「係啊，我就無你咁勁拎到ＭＶＰ，所以得呢個牌咋。」我話。

「契老豆咁勁係ＭＶＰ啊。」珍妮答和。

而小段，就係旁邊見到我地咁，微笑中。

「除左呢Ｄ獎牌，仲有我地係學校最後一年嘅校刊啊。」我拎左本校刊出黎，而志威一副急不及待嘅表情，「睇……睇……」

珍妮拎過本校列，聽從志威嘅指令一頁一頁咁揭。





去到小慧果張班相度，停左落黎同珍妮講：「妳……契……媽……」

「契媽讀呢班架？我搵下佢先。」佢好快就搵到小慧嘅位置，「契媽以前咁靚架，佢一定係校花。」

我同志威聽到珍妮咁講，都笑左出黎。

然後就到我同志威嘅班相，「我同你契老豆係呢一班，妳又搵下。」

「好……」珍妮今次同多左時間搵，「呢兩個？」

「係……係啊……」志威話：「幾……十……年……」

「係啊，咁就幾十年，真係快。」我話。

就當我同志威都懷緬過去嘅時候，珍妮突然間話：「契老豆當年就靚仔過輝爺，所以契老豆當年就爭贏左契媽。」





「喂……」本身企開左嘅小段都行左過黎，拍一拍珍妮話：「睇野係用對眼，唔係用個口架。」

「咩野ＷＯ，咁呢Ｄ係事實嘛。」珍妮反駁，而小段就好似比佢激死咁。

而呢個時候，「係出面就聽到珍妮把聲，係未佢有係度搞事。」小慧開門而入。

「我無搞事啊契媽，輝爺帶左你地果陣時嘅校刊黎，我地一齊睇緊咋。」珍妮合上本校刊，演示左比小慧睇。

「校刊……」小慧望住呢本校刊，若有所思，「我果本都好耐無拎出黎睇過拿。」

接著小慧嘅說話後嘅，係志威：「帶……妳……我……」

「帶埋我同你果本黎？」小慧問，而志威點一點頭。





珍妮見到咁，就問：「唔係本本都一樣架咩？點解要帶晒三本黎？」

而小慧行到珍妮身邊，拎起左本校刊揭到最尾果一頁，「因為我地三個果陣，都係對方果本校刊上面寫左祝福嘅字，但係，有一本就有Ｄ唔同。」