[年齡無界限] 就係咁，我最近出席好多喪禮: ７０　舅父差佬

點算……聽日就要飛，而家整單咁嘅野出黎……

「唔係掛！你跌左Ｄ錢！？」我打電話呃龍仔話我跌左Ｄ錢比唔到佢，點解我唔講真相？因為我真係驚果班人會整爛塊獎牌。

「你再去提款機拎啦！」係電話聽得出龍仔把聲好唔奈煩。

「唔我啊，已經過左每一上限啊。」最衰我係拎錢比龍仔前都拎左Ｄ錢出黎，整到過左每提款上限。

「咁聽日拎比我啦！」龍仔話。





「……但……但係我聽日要飛去……瑞左……」我話。

「你無啦啦去咩鬼瑞士啊！」龍仔好嬲，「等你幫就死啦！我自己諗方法！」

佢講完呢句就ＣＵＴ左線。

而聽完呢個電話，我個心仲亂。

點算好呢？究竟而家應該點做好呢？我成咁十歲人，都未試過好似今次咁慌。





我拎起左電話，是但打左去比最近打接過嘅一個電話，「喂？咁夜啊輝爺？係未有生意啊？」呢把咁嘅烚熟狗頭嘅聲，係小段。

我靜左好幾秒諗緊我應該講咩好，直到小段問：「喂，輝爺你無事嘛。」

「……我……我頭先比人打劫，比人搶走左想比志威嘅野。」我講完後，小段靜左幾秒後就話：「你係屋企附近？」

「嗯。」我答。

「你返屋企等我，我過黎你果度。」小段講完呢句後就收左線，然後ＭＳＧ我叫我ＳＤ地址比佢。





係屋企等左無耐，小段就黎左，佢見到我第一句就問我：「無受傷嘛輝爺？」

估唔到，一個識左無耐嘅人，仲會比起自己個仔仲關心自己，「無咩野，只係比佢地搶走左塊牌。」

「不如報警啦？」小段話。

「但佢地話如果我亂黎，佢地會整爛塊牌。」我答。

「你認唔認得搶你野嘅人？」小段問。

「認得，有個見過幾次添。」我話，而小段諗左諗後就講：「但而家得我地兩個，都做唔到好多野……況且聽日我地仲要飛……」小段望一望我，佢好認真話：「塊牌真係咁重要？」

「係，我想為志威做返Ｄ野。」我答。

「但係你唔想報警嘅，又想拎返塊牌……」小段講完呢句後，就打左一個電話：「喂，舅父啊，有件事想你幫下手，你而家得唔得閒？」





望住小段講完呢個電話後，我就問佢：「你頭先同咩人講電話？」

「我一個當差嘅舅父，你放心，我話左佢知你唔想報警，但呢件事點都要有個差佬幫手會快Ｄ解決。」小段講完後，就起左身話：「行拿。」

「行？去邊啊？」我問。

「去我舅父度啊，頭先你都聽到架。」小段講得一副理所當然。

「咁快？」我話。

「緊係要快啦，我地聽日就要飛拿，可能一去到見舅父，佢已經拎左塊牌比我地添啊。」小段半開玩笑咁話。

如果，真係有咁好彩就好。