[年齡無界限] 就係咁，我最近出席好多喪禮: ７５　最後一夜

志威人生日後嘅一個星期，就係瑞士渡過，我地都安排左每日去一Ｄ唔同嘅地方，等志威最後嘅一程路都可以有更多好嘅回憶。

當然最重要嘅，係比多左時間比佢同小慧兩個單獨相處。

係一個公園入面我，我地幾個係遠處望住小慧同志威。

「如果，真係知道愛嘅人就快走到生命盡頭，唔知心入面嘅感覺係點？」珍妮問，佢無等我地答呢個問題又講左句：「契媽真係好堅強。」

「嗯。」蕎兒話：「其實我知道最唔捨得阿爸嘅人，一定係媽媽，只不過呢個係阿爸嘅決定，所以媽媽選擇左支持。」





小段深呼吸左一口氣，「唔知要去到幾愛，先可以做到咁呢？」

我拍一拍小段嘅膀頭話：「其實，唔應該講要去到幾愛先可以做到咁，應該要講因為愛本身就可以做到咁。」

夕陽斜照，小慧推住坐緊輪椅嘅志威，遠睇佢地好似無咩點講野，只係靜靜咁享受兩個人嘅時光。

好多人都話，人係最後一段等死嘅路係好漫長，我就話唔係，其實係好快，日出日落又一日，時間看似好漫長，但其實轉眼就會過。

好快，就到志威要安樂死前嘅一日。





呢一日，大家無做特別嘅野，只係一齊食左餐飯，但呢餐飯嘅氣氛大家都明白，無歡欣亦都無憂傷，好簡單嘅一餐飯，大家都知道，聽日嘅事唔係一件值得高興嘅事，但係又唔可以比志威感到我地憂傷。

當晚除左珍妮一個人，所有人都好靜，直到去訓前果一刻，我去洗手間嘅時候，見到珍妮坐左係大廳度，旁邊嘅小段手上面抱住……無錯，係抱住一大堆紙巾。

我慢慢行過去，小段先留意到我，「輝爺。」珍妮聽到小段叫我後，就轉頭望住我，而我見到珍妮喊到收唔到聲，雙眼紅晒，「輝爺……契老頭聽日……聽日就要離開我地拿……」

見到此情此景，睇到心嗡。

我諗珍妮呢一段日子，每晚都係度喊緊，而今日係喊得最利害嘅一日。





我同小段同珍妮傾左陣計後，我就叫小段送佢上房好好休息，而我，就出左去行下，因為想沖一沖淡頭先所見嘅憂傷。

而行左陣，我見到小慧嘅身影係遠處嘅一張長椅上面，我行上去，而愈行愈近嘅時候，我聽到佢嘅喊聲愈黎愈大。

直到，我行到佢嘅面前。

直到，我見到佢喊到好似珍妮咁傷心。

直到，小慧同我講：「志威佢……聽日就要離開我地拿……」

一直都忍住自己眼淚嘅小慧，係志威死前嘅一晚終於再忍唔住，崩潰咁喊左出黎。

見到小慧咁，我坐係佢身邊後，佢就同我講：「我好唔想志威離開我啊……」

我唔知點答佢，只係默默咁坐係佢旁邊，只可以學小段一樣，抱住小慧喊過嘅一張又一張嘅紙巾。