[年齡無界限] 就係咁，我最近出席好多喪禮: ９４　一切都係緣

送左佢地落樓，打發左佢地兩個走後，奇怪，竟然有一種孤獨感，可能，我真係好耐無經歷過係屋企都可以有人可以同我傾計。

坐升降機返上去，「等埋！」一個後生仔大叫，然後用手一野拍左落升降機門果個反應匣度，令到對門開返。

本來無為意係咩人嘅我，望到呢個生後仔嘅反應，就望一望佢，呢個後生仔戴住頂帽戴到好低，而佢一入到黎到門關果一刻，都無㩒邊一層。

而家部升降機入面有我同後生仔兩個人，望住果排只亮起我果層嘅樓層仔，我好心問佢：「哥仔，你去邊層？」

不過我呢個善意嘅問題得唔到呢位後生仔嘅回答。





而我，亦都無左再問佢。

但係，果種呢幾日都有嘅感覺有出左黎，而且好強大，就係果種比人從後望住我嘅感覺。

升降機門開，我急步衝左出去行返去自己家門，而背後，果位後生仔都走左出門，我好慌張咁拎左鎖匙出黎……

……最近聽其他老友講，話呢度多左好多打劫搶野，目標係Ｄ老人家，所以你出出入入都要小心啊……

呢一句話，不停係我腦海入面出現，令到我好緊張，平時好快開到嘅門，到而家都開唔到，我望一望後生仔嘅方後，見到佢慢慢咁步走近我……死火！唔通呢個人就係四圍打劫老人家嘅人？





我望住個後生仔一路行過黎，一路係佢個袋唔知拎緊咩野……唔通係刀！？我係未應該要而家大叫啊！？

佢愈行愈近，愈行愈近，直到佢行到我面前只有幾步嘅距離……「阿伯，呢個單位係我屋企，你仲咩撚野不停用鎖匙開我屋企對門。」

……咦？我望一望門上面個號碼……

「……唔好意思。」我仍然驚魂未定，所以講完呢句後就好快轉身走，但當我行左幾步後，我諗返起呢個人係……

「阿伯，估唔到我地咁有緣。」個後生仔慢慢將自己帶嘅帽除左落黎。





而我轉身望住佢……無錯，呢個後生仔我見過好幾次，而且佢仲搶過我野，不過最後有銅想幫我手先拎得返。

南亞裔青年用題匙開左自己屋企嘅門，入門時講左一句：「阿伯，上次件事我係唔會就咁算。」

我望住佢嘅單位，原來，我同佢所住嘅地方，只係隔左幾個單位……