[年齡無界限] 就係咁，我最近出席好多喪禮: ９５　銅ＳＩＲ又出馬

係茶樓入面，坐係我前面除左老是常出現嘅小段同珍妮呢一個組合外，仲有小段嘅舅父，銅ＳＩＲ。

水滾茶靚，面前呢三個人好好胃口，相比起我呢個成餐都只係飲左幾啖茶嘅我，成左好大對比。

「輝爺，睇唔出你咁細膽ＷＯ。」呢句咁直接嘅說話，當然係珍妮講架啦。

我望一望佢，而小段就幫口話：「咁我地唔係身在其中，點會知道輝爺嘅感受呢。」

珍妮有小小不悅小段嘅講返，低下頭繼續食野。





而銅ＳＩＲ，佢飲左啖茶後同我講：「佢住你旁邊，但係佢有無搞你先？」

我回想再一下，「……咁……又未嘅。」

「佢都未有行動你就驚成咁，唔係掛。」食住野嘅珍妮又開聲，銅ＳＩＲ就接住講：「如果佢無搞黎嘅話，我都唔可以幫到你Ｄ咩架ＷＯ？」

「……但係佢話上次嘅事唔會就咁算。」我同銅ＳＩＲ講。

然後，銅ＳＩＲ諗左好一陣，「咁其實發生事都只係遲同早……不如咁啦，我記得聽Ｄ伙記講過你住果頭最近出現左個成日搶老人家野嘅人，我就同佢地講下你所講嘅人可能有Ｄ可疑，叫佢派多Ｄ人手係附近巡下啦，以警察身份，我最多可以幫到你度。」





聽到銅ＳＩＲ嘅說話後，我回話：「……咁……好啦。」因為呢個結果其實同我所想有少少唔同。

「你又唔駛咁樣嘅，我話以警察身份姐，你係小段嘅朋友，就姐係我朋友，我私底係同Ｄ古惑仔八掛下呢個南亞仔係咩野來頭啦，起馬我知道做佢個底，我先做到野。」銅ＳＩＲ講完呢句後，我當堂覺得充滿希望，「咁真係麻煩晒銅ＳＩＲ。」

而坐係旁邊嘅小段同珍妮，就咬緊耳仔，銅ＳＩＲ見到佢地密傾就話：「你地兩個傾Ｄ咩野唔比得我地知啊？」

「無……」小段就好似一個被人捉到偷野食嘅細路一樣，不過珍妮就好直接咁問：「無啊，我問佢咩警察可以咁做架咩？」

銅ＳＩＲ笑左幾聲後話：「唔得架，但係如果對住Ｄ壞人，你唔壞過佢地，點會捉到佢地。」





珍妮聽到銅ＳＩＲ嘅說話後，點一點頭話：「你又有你嘅道理。」

好彩今次叫左銅ＳＩＲ出黎傾，但係唔知係我多心定點，我總覺得隔離果枱有個人不停偷聽緊我地講野，可能仲有錄音添……

定其實係我諗得太多呢？