[年齡無界限] 就係咁，我最近出席好多喪禮: ９８　便宜仔

門匣開，入黎嘅人係小段同珍妮。

「頭先我地係樓下見到……」當小段見到沉思緊嘅我，就再無講落去。

頭先小桃紅所講嘅野，我仲不停係腦入面打轉，所有事嘅始末，要去到我返大陸搵小桃紅做老婆生仔嘅事講起。

其實係佢同我有呢個協定之前，佢有一個男朋友，都一齊左幾年，當初小桃紅會同佢一齊，係因為個男仔話有方法令到佢地兩個可以落香港，果個時代，好多大陸人都對香港好憧憬，覺得只要落到香港就可以改善到當時嘅生活。

但係一齊左幾年，小桃紅慢慢發覺呢個男仔當初只係想同佢一齊先會有呢個理由呃佢，所以小桃紅都不斷搵其他方法落去。





果個年代，好多未婚但上左年紀嘅男人都會返上大陸搵老婆，有Ｄ只要傾好左價錢禮金就ＯＫ，甚至係只要一上到大陸，可能你都未坐定，已經有人搵上門話自己有個朋友個女仲係單身，有無興趣之類。

你地可能覺得，咁樣娶過老婆返黎有Ｄ問題，但當你係一個平時無咩女仔注意嘅人，突然變成一個咁受女性歡迎嘅人，你都會比呢一種虛榮沖昏頭。

呢一種，可以話係另一種盲婚啞嫁。

當年我隻身一人返上大陸，都見左好幾個女仔，但唯獨只有小桃紅我睇得上眼，雖然我第一眼已經知道呢個女人係為左利益先會同我一齊，但當時嘅我無介意過，而且我開出黎嘅條件佢都答應左，所以我就揀左佢。

不過好快我就要申請佢落香港，因為識左佢幾日我地就行埋左，而且仲有左，一切都黎得太快有Ｄ令當時我喜出望外，原全無諗過佢肚入面個仔係唔係我。





到生左個仔後，到佢長大，甚至到同小桃紅離婚，我都覺得一切無事，直到個仔出個一次意外，我去到醫院後醫生話要大量輸血比個仔，要我同小桃血幫手，但唔知點解係果一刻，小桃紅不斷阻止我，唔比我輸血比個仔。

最後個仔由小桃紅輸血，醫生出黎證實龍仔無事後，我就問佢：「點解你唔比我輸血？」

「……咁……咁你都咁大年紀，怕有危險。」小桃紅話，而我見到佢眼神閃縮，咁多年嘅一切都慢慢擁現，直到去到當初認識小桃紅果一刻，見佢好堅定咁話幫我生仔，我都覺有少少怪，因為其他女人聽到我所提出呢個條件都會諗一諗先答，佢就好似已經知道自己已經有左咁答。

呢一刻，我就覺得，龍仔究竟係未我親生……

「輝爺，你無事嘛？」珍妮行到我身邊拍一拍我，我望一望佢地兩個，然後話：「其實，我唔知係未幫人養左幾十年便宜仔。」