呢兩三日成個人都好虛咁,好唔實在。

「係未有心事啊?」阿然問我。

我見好耐都無黎搵佢,所以今日特登黎左阿然間夜冷店度,一黎搵佢飲下酒,二黎就當要係傾下計呻下。

阿然一直都知道我假結婚係為左生仔,但係當佢聽到龍仔可能唔係我親生後,佢都好驚訝話:「唔怪得有一年見你成個人好苦惱,原來係因為呢件事。」

佢講既果一年,就係龍仔出左事要輸血果一年,果一年既我,唔單止面對緊呢件事,果一位對我黎講發生左好多事,其中一件事係蔡老閭破產。





我放低手中杯酒,然後話:「阿然,我真係無勇氣去面對呢份報告,雖然係我自己提出要咁做,但係如果個結果係話龍仔唔係我個仔,咁我當年假結婚,咁多年養佢未浪費晒。」

「其實,親唔親生係未真係咁重要?」阿然問。

而我就好激動咁答佢:「緊係重要啦。」

「但如果孝順,唔係親生既話,應該……」「慘就慘在龍仔只係對佢阿媽孝順呢,所以如果連親生呢一點都係假既話,我就無晒親人。」阿然未講完就答。

「但你唔係仲有個女咩?」佢又問。





「佢唔係我親生架。」我答。

「但佢對你都好孝順WO。」佢又話。

「唔係男既有咩用。」我答佢。

然而,阿然笑左一笑話:「男同女分別有咁大咩?」

「緊係……」「到我地呢個咁既年紀,真係咁重要?」本來想反駁既我,突然間停左停,係因為佢呢個問題我先停低左諗。





酒氣漸濃既我,眼前好朦。

「阿輝,你醉拿。」阿然話。

「我無!我無……」合上眼前果一刻,我仲係諗緊,其實到左而家呢個年紀,身邊一直陪住個人係未親生,真係咁重要?
已有 0 人追稿