搞左一輪後,我終於可以返到屋企休息,從前妻要拎我份報告,去到我份報告比人搶左,到唔好彩不入捉左到救返,同埋知道阿里呢個人同佢嘅事後。

原來,就算你做左幾耐人都好,仲係有好多野唔係你控制到。

今晚,我訓唔著,有好多野諗,份報告當然係其中一件事,而今晚仲有多兩件事諗。

阿里口中嘅合群。

以及保險嘅事。





近呢幾年香港嘅矛盾增加,大部份都係關於內地同香港嘅文化、政治等事,但其實本土香港人,又有無真係認真諗下,香港確實嘅價值係邊。

如果成日話回歸後本來話五十年不變,但係其實係溫水煮蛙,香港本土價值慢慢被吞沒,但其實,我地有無諗過係香港仲有少數嘅人,連最基本嘅價值都仲未有?

而其實,佢地一早已經係本土香港人,只係我地一直同佢地劃清界線,比左一條無形嘅圈子綁實左佢地,無比機會佢地。

無錯,新聞好多時會報導好多少數族裔犯事嘅新聞,但係佢地點解咁做?我地有無考究過,雖然佢地係用錯方法,但係都係想拎返自己可以擁有嘅價值。

佢地得唔到機會,所以先會走到果一步。





有人選擇衝動行事,有人選擇合群迎合。

訓唔著,唯有起身行下,我又拎左個鐵罐出黎睇,罐入面無果份報告,係一D好零碎嘅野,仲有果一份保單,果一份我話會加返我個女個名入去嘅保單。

其實死亡後,一份保單嘅錢係未仲有用?

唔知。

不過好可能會係一份保障,可能阿女佢係為左有一份保障先想我加佢個名入去。





唔知點解,突然覺得今晚呢間房真係好焗,所以我索性走出去行下,就當我著好晒衫準備出去嘅時候,我見到阿里返左黎,我地見到大家後,四目交投,大家都唔知有咩反應好,而我只記得,銅SIR吩咐我如果見到阿里返到黎,一定要第一時間話佢知。

「返黎見阿媽?」我問,阿里只係點一點頭。

而我就慢慢向佢行過去,直到與佢並肩。

「當我無見過你,你又無見過我。」我話。

直到,我行過左阿里,我背住佢,佢背住我。

「多謝你。」阿里話。

然後聽到開鐵匣嘅聲音,而我仲係升降機門前等升降機開門,門一開,我慢慢行入去,「佢都只係要一機會姐。」
已有 0 人追稿