[年齡無界限] 就係咁，我最近出席好多喪禮: １２５　阿里救過細路祥

第二日嘅早晨，我張開眼，尋日所發生嘅事已經唔想再記起，唔想知道有跟過阿里，唔想記得比人捉左，唔想記得係走廊同阿里有個相遇，唔想知道我點解訓得著……

訓左，但係好無精神嘅睡眠質數，頭有少少赤赤痛，本來想起身倒杯水飲下，但呢個時候電話就黎。

「喂？輝爺？飲唔飲茶啊？」係珍妮好精神嘅聲。

「飲茶？係邊度飲先？」我問。

「我地係你樓下果間酒樓咋，落黎一齊食啦。」我地？咁姐係佢唔係一個人？





「咁你等等我。」我答呢句後，佢就收左線，唔知佢口中講嘅我地係有Ｄ咩野人？不過我可以肯定當中一定有小段。

落到去，我都未搵佢地，就叫到珍妮企左係度同我揮手，「呢度啊！輝爺！」仲要大叫……真係好老尷。

而我旁邊嘅人又好醒目地知道珍妮叫緊果個人係我，全部望住我，我仲聽到有Ｄ人話，「你就好啦，個孫女陪你飲茶。」

……佢地會唔會諗得太多呢？

不過，如果有佢地做孫，都唔錯啊。





慢慢行過去，終於可以睇清頭先珍妮口中嘅「我地」有Ｄ咩野人。

小段一定有架啦，仲有細路祥係度。

一坐低我地就話：「今日咁好過黎同我飲茶啊？」

「見呢幾日發生左咁多事，擔心你未陪下你囉。」小段話，而幫我倒緊茶嘅細路祥就問我：「尋晚我過電話比阿里，但係佢無應機，都唔知佢去左邊。」

「阿里……」我默念左佢個名，「……可能佢驚比差人捉掛。」





倒完茶，細路祥就話：「其實阿里份人真係唔壞架，輝爺你可唔可以幫下阿里手，如果佢比差人拉左，落口供果陣幫佢講一兩句好話啊？」

我拎起杯茶，講笑話：「你倒呢杯茶比我，原來係幫阿里倒架？」

細路祥笑左笑，「如果你肯幫佢，就當係幫佢倒啦。」

我呷左一啖茶，而珍妮呢個時候就問細路祥：「其實點解你咁幫阿里？」

細路祥就話：「因為佢救過我。」