「奇幻，純愛」《我，總是會愛上妳》: 感覺
我：「無呀，邊有野暪住你啫？」
哇屌呢個女人感覺係咪咁準，定係我扮演魯路修扮得太差，有破綻比佢睇到？
Cherry：「真係無？」
佢繼續用懷疑既眼神望住我，望得我好唔舒服，我亦開始迴避佢既視綫。
我：「都話無咯…」
！！！！
佢突然用雙手捉住我塊臉，強行迫我同佢對望。
Cherry：「望住我呀。
」咁樣比你捉住，又點唔望住你呢小姐。
不過雖然大家之間既距離唔算好近，但咁樣同佢對望，我個心居然跳得好快。
佢對眼好靚…唔係，係成個輪廓都好靚，好似有一種無法用文字形容既魅力咁。
死，我咁講唔通我鐘意左佢？唔可以架，振作呀我。
我之前都有咁讚過個位Ellie啦，唔通我又係鐘意佢咩？嘻。
我心裏邊不斷咁同自己講。
Cherry：「你係咪發生左乜事呀，你成晚都怪怪地咁既。」
「頭先我見家姐佢D表情都怪怪地，係咪Daddy媽咪佢地有咩事啊，話俾我知啦，等我同你分憂啦。」
「我地係兩公婆黎架嘛。」
…
我聽到呢句，身體忍唔住自己作出反應，攬住左佢。
我：「放心，無事，咩事都無。」
Cherry：「嗯，咁就好喇，好喇我唔同你玩啦，我去執埋D野先。」
佢講完呢句就離開左我既懷抱，自己入左一間房，留低我一個係廳。
而家諗返先察覺到一個問題…
Proto Zero你做左D乜野蠢事呀…個老婆唔係你架…你係度開心D乜？
咦，我做乜接受左Proto Zero係自己個名？
不過真係好奇怪，明明佢對我黎講只係一個素未謀面既人，對佢講大話應該唔會有任何感覺。
但點解我頭先同佢講大話既時候，我個心會咁唔舒服…
我之後都係咁樣一個人坐係梳化，電視播緊乜我都無理，因為我根本睇唔入眼。
咩事，我好辛苦，有少少抖唔到氣既感覺。
尤其係個心，好似俾人緊緊咁握住咁。
唔得…要去洗個臉先得…
我跌跌碰碰咁想行去洗手間，卻誤打誤撞咁入左去書房。
神奇既係，當我入左去書房之後，頭先種種困擾住我既感覺都突然消失得無影無蹤。
直頭好似係想叫我入黎呢度咁，可能我諗多左啦。
咁既然都入左黎，不如睇下呢度有乜囉。
「啪！」
啪既一聲，點亮左成間書房。
成間書房俾人既感覺好整齊，幾個大書櫃入面齊齊整整咁放左好多書。
不過吸引到我既並唔係呢堆書。
儘管呢間房有千百本書係度令人無從入手，唔知應該係邊度睇起好，但我望完呢間房一圈之後，視線卻一直停留係張書檯上。
因為書檯上有一本相簿。
我緩緩咁行埋去張書檯度坐低，開始慢慢咁翻閱呢本相簿。
啊…
真係好幸福呢佢地…
呢本相簿記載左魯路修同Cherry佢地既點點滴滴，由中學果陣開始，直到而家有左Chase同Nicole。
中學時期既相唔算多，但每張都feel到青春戀愛既感覺。尤其係見到魯路修果種死魚眼再加埋笑容，認真好笑。
之後就結婚既相，好多人大家都好開心。
最後就係而家既一家四口相，見到都feel到個種家庭幸福。
最有趣係睇Chase，見到佢就不禁諗起中學時期既魯路修。
佢地一家人真係好幸福啊，好羡慕。
唔知等魯路修好返翻黎之後我有無機會遇上屬於我既Cherry呢？
真係有d期待我自己既人生。
Cherry：「咁好心機係度睇相呀？」
Shit，佢幾時入左黎架？
我：「呃，係啊，睇電視睇到悶嘛。」
Cherry：「咁你係度睇緊咩呀，咦係Chase喎哈哈。」
佢一邊講一邊行到去我面前，最後仲仲伸個頭埋黎同我一齊睇相簿。
Cherry：「原來都咁多年啦喎。」
我：「呃，係囉，時間過得真係快。」
咁樣答，我個心又痛左一下。
我好想同佢講我唔係魯路修，但一見到佢我又唔忍心講…
當初魯路俢向Cherry隱瞞自己病情個陣係咪都係咁既心情呢？
Cherry：「唔好睇啦，夜啦訓覺啦。」
係喎！講起訓覺！我咪要同佢一齊訓！！FUCK！！好尷尬喎！！
我：「Eh…我…」
我都未講完，佢就自己行左去。
佢以前就係咁，總係牽住我走。
咦？我又諗左D乜..？我講以前..？
奇怪既思緒又再一次浮上我既心頭。
唉仆街而家最重要係諗點解決「訓覺」呢個問題呀！
如果我唔同佢同床訓的話，一定會引起佢疑心架喎，但同佢一齊訓又好似有D…
唔係！只要我唔諗衰野就得啦！好！
我一直提醒自己唔好諗衰野同埋要安守本分咁去訓，訓係佢隔離我直頭郁都唔敢郁，好似一具木乃伊咁。
咁緊張既心情下真係訓唔到，最後都係眼光光等天光。
唉…咁樣落去真係唔係辦法喎…
肚餓，都係去煮個早餐先…
…
我一坐直個人，就無意咁望左佢一眼。
其實佢都真係幾靚…