「奇幻，純愛」《我，總是會愛上妳》: 安心

我：「細胞融合率96%，各方面都維持係正常可接受範圍，呼…」

「咁樣你就可以安心啦。」

「魯路修。」

魯路修：「嗯，真係唔該哂你呀晨哥…」

我：「我都唔明你，自己既身體唔理，走去理個複製人。」



魯路修：「唔好下下叫佢複製人啦..我幫佢改左個名叫Proto Zero喇…」

我：「是但啦咩名都好啦，你呢幾日覺得點呀？佢地應該有開藥比你？」

魯路修：「有…食左之後個人舒服返D囉。」

我：「咁就好啦，等下啦，再等多陣就得，佢地已經儘快趕製架啦。」

魯路修：「我知道呀…我信你。Proto Zero佢而家點？」



我：「放心，我有搵人監視佢，佢好規矩，無對Cherry做D乜。」

魯路修：「我唔係咁既意思…我係想問佢過得開唔開心…」

…

我：「佢開唔開心我就真係唔知啦…不過點解你會咁問？」

魯路修：「我都唔知…不過呢幾日我係度諗，我好似好對唔住Proto Zero咁…」



「擅自創造左佢出黎，仲要求佢去扮演我，過我既人生…」

「就算佢係我既複製品，佢都係一個獨立既生命，有權利過屬於自己既人生。」

估唔到佢會諗到去呢個地步…魯路修你真係成日俾到驚喜我。

我：「唔洗諗咁多啦，你快D好返佢咪可以過返自己既人生囉係咪先。」

魯路修：「我最怕係…」

我：「得啦唔好再講。」

我知佢想講乜。

我：「好啦，我都要走喇，有乜事就㩒掣搵佢地啦。」



魯路修：「嗯我會架啦，不過晨哥你可唔可以幫我去買盒模型…」

屌，而家仲係度諗砌模型。

不過呢個先係我識既魯路修架嘛。

我：「好啦，我一陣就去買。」

講完我就離開左病房，但係我並唔係直接去幫佢去買模型，而係去左旁邊既觀察室。

我：「情況如何。」

Ellie：「你指邊個既情況？係魯路修..定係Proto Zero？」



我：「兩邊我都要知，先後次序你決定。」

Ellie：「咁…我由魯路修講起先啦，程序已經進入左第三階段，佢既細胞已經同我地既人造器官進行融合。」

「跟住只要大約兩個月時間左右，器官無出現異常反應就可以進行移植手術。」

我：「兩個月…我怕佢等唔到，有無得快D？」

Ellie：「兩個月既觀察期已經係最低限度…正常程序應該要三個月。」

「我地都知情況危急，所以我地既醫療團隊一直都有開藥比佢，儘量拖延佢既病情。」

「以而家佢既情況，支撐兩個月絕對唔係問題。你大可以放心。」

佢講係咁講，但我仍然非常擔心。



我有種唔好既預感，硬係覺得有事會發生。

我真係希望係我多心。

我：「好，咁Proto Zero呢？話時話，你地點解都會用Proto Zero呢個名？」

Ellie：「吓我地係呢邊聽到你地講，佢話幫實驗體改左個名做Proto Zero，我地咪用呢個名囉。」

我：「哦，好啦快D講啦，之前既調查有結果未？」

Ellie：「雖然係有收集到相關既數據，但我地始終唔係相關方面既專家，唔敢亂下結論…」

我：「咁，你只係解釋一下個數據比我知啦。」



Ellie：「好，數據顯示Proto Zero係同魯路修接觸之後腦部活動非常活躍，大約係正常既兩至三倍。」

我：「所以佢先會突然間認得我…」

Ellie：「呢個只係係我既推測，係製造Proto Zero既時候，魯路修既記憶可能隨同細胞一齊複製左過去…」

「如果真係咁的話，所有野都可以解釋到…」

嘛…的確係咁…不過咁亦都會產生一個好嚴重既隱憂…

假如Proto Zero都有lulu同Cherry一齊既記憶的話…

一諗到咁，我就安心唔落。