「奇幻，純愛」《我，總是會愛上妳》: 生活

每日我都提心吊擔咁過。

我好驚自己會比佢識穿我唔係魯路修。

我每做一件事之前都要諗一諗，睇下自己咁做會唔會引起人懷疑。

就連訓覺我都要好小心，提醒自己唔好有D乜野過份既舉動。

唉咁樣既生活真係好辛苦好攰仲好麻煩…





真係估唔到扮演另一個人過佢既生活原來會咁麻煩。

不過咁樣諗，我自己既生活又會係咩呢…

一個複製人，又有咩人生可言呢…

Cherry：「lulu？做咩呀你？」

佢一句說話將沉思緊人生為何物既我拉返出黎。





我：「呃…無野呀岩岩諗緊野啫。」

Cherry：「咁你係度諗咩呢先生？」

我：「嘛…思考緊人生為何物囉。」

Cherry：「哇諗到咁遠呀你，好喇不如諗下一陣lunch食乜仲好啦。」

我：「嗯…咁等我諗下先..」





真係好高難度，又要做到好似lulu咁同佢咁親密但又要保持一定既距離。

唉諗起真係人都癲。

不過同呢個Cherry相處落就明白點解魯路修會咁唔放心佢。

Cherry佢就好似一個公主咁，只要係佢身邊就好想保護佢，唔想佢受傷害。

加上而家佢地咁開心，仲有一仔一女，可以話係一個完美既家庭。

如果係呢刻魯路修離開左的話，對佢既打擊一定好大，我想像唔到Cherry佢會有咩反應。

我連佢喊既畫面都唔敢諗。

死喇我係咪過左火位呢？唔得，我既職責係幫魯路修好好照顧Cherry！就好似鐘點咁！夠鐘就閃！





工作黎架啫！唔好放感情落去！

Cherry：「喂喂！不如食果間吖！！我好耐無食過啦！ 」

佢突然好激動咁捉住我係咁fing，仲指住一間餐廳。

我望一望，發現佢指既餐廳原來係一間韓國餐廳。

我：「你想食泡菜野？」

Cherry：「係啊，平時同佢地一齊出街食飯Chase一定ban韓國野，搞到我好耐無食過韓國野啦。  」

既然佢都講到咁…咪陪佢食下囉。





一坐低佢就拎起個menu不停咁睇，雙眼仲好似識發光咁。

呢個情景，我好似有印象。印象入面既佢又係咁，一見到野食就會失哂控。

Cherry：「啊點算好吖好似樣樣都好好食咁呀！ 」

我：「想食咪叫囉，最緊要係開心。」

Cherry：「嗱你講架！幾時都話我老公係最好既~ 」

佢果然一D都唔掩飾，叫左好多野，個位負責落單既小姐聽左都呆左。

但佢一於小理，繼續篤篤篤。

Cherry：「啊，lulu你要唔要飲D野吖？ 」





噢，睇黎佢都仲有少少理性，仲知道身邊有人。

自己諗到咁都忍唔住笑左一下。

我：「無所謂啦，你話事。」

Cherry：「咁呀…俾多一杯柚子蜜同一杯咖啡添吖唔該你，兩個都係要凍既。」

唔知一陣張檯夠唔夠放D野食呢…

我好快就發現我既擔心係多餘，D野食份量小到仆街，放係檯一陣已經比Cherry佢食哂，可以俾侍應收返隻碟走。

哇屌不得不提呢碟所謂既「拉麵」，細細碟既公仔麵夠膽收我幾廿蚊？真係同以前一樣，咁多年都無進步。





咦…我又講左D乜？

「你地既凍柚子蜜同凍咖啡，請慢用。」

啊，岩哂，飲啖凍野等個人冷靜下先。

我隨手拎起一杯野飲，大大啖咁啜左一啖，哇好凍好爽。

唔？做乜野佢呆左咁望住我？

我：「做乜眼甘甘咁望住我？係咪我塊臉汅糟左？」

Cherry：「唔係啊…lulu你飲緊既係我杯咖啡黎架… 」

咦乜係咖啡黎架咩，我真係完全無留意添。

我：「噢，唔好意思，我幫你叫個杯啦。」

Cherry：「咁又唔洗，我飲你口水尾咪得囉，拎返黎啦。」

佢一路講一邊伸埋黎拎走我手上既凍咖啡，個場景非常好笑。

我有一刻直頭想拎開D杯野等佢拎唔到，我諗到時一定會更加好笑。

我最後當然無咁做啦，我乖乖咁交返杯咖啡比佢，同時亦開始飲返自己杯柚子蜜。

Cherry：「你頭先真係唔知自己飲緊咖啡？」

我：「呃…可能因為D野食味道既關係啦，我真係唔知自己飲緊咖啡。」

Cherry：「哎~~會咁架咩，你真係傻佬黎，你快D試下呢個炒年糕啦好好食架。」

呼，好似總算過到骨。

韓國野我其實真係麻麻，所以我都係睇佢食多。

佢食野個樣真係非常有趣，可以睇十年都唔會厭。

佢食得好開心，好似D細路仔咁。

明明叫左好多野，但最後竟然一碟都無淨。

Cherry：「啊啊好飽好滿足呀。」

我：「梗係飽啦你食左差唔多廿碟野喎講緊…」

Sorry真係忍唔住吐嘈。

Cherry：「咩啫而家你無份食既，哦！你而家嫌我大食？」

我：「eh…我…」

仆街佢好似嬲添，我應該點做好呢，氹佢定…？

Cherry：「我講笑咋，睇下你個慌張樣，哈哈。」

「不過我地都好耐無試過咁樣二人世界啦，自從個兩隻小魔怪出左世之後。」

「難得佢兩個今日去左家姐度玩，不如我地去行街拍下拖？」

我一直都無回應，只係一直望住佢。

聽到「拍下拖」呢三個字既呢一刻，我完全唔知應該點做好。