「奇幻，純愛」《我，總是會愛上妳》: 生日禮物
終於到今日喇，準備左咁多野終於可以實行喇。
好期待佢到時會有乜野反應。會係驚喜定係好似平時咁用對死魚眼話好麻煩呢？
啊不過佢最近好似都講少左好麻煩，份人比之前積極左少少。
肯定係因為我教得佢好啦，而家先識點做人爸爸。
好喇，都差唔多係時候叫醒佢喇，條友仔尋晚肯定又係廳打機打到訓著左，真係無佢收。
果然不出我所料，我走出廳就見到佢訓左係梳化，左手仲拎住個game controller，唉。
眼訓就好心你停機乖乖咁去訓啦，咁樣訓好容易傷到條腰架嘛。
轉game就收返好之前玩緊既game啦，打機玩到一地都係game盒，真係吖。
我一邊幫佢執返好D野一邊係度自言自語，好似一個傻婆咁。
唉，唔傻又點會鐘意佢吖。吖差D唔記得佢手上既controller添，收返好佢先。
我踎低打算拎走係佢左手既controller，但係我呆左一呆。
我記得佢左手好似係有條疤痕架…定係右手先係呢？
正當我想睇埋佢隻右手個陣，我就聽到Chase把聲。
Chase：「媽咪？你地係度…
」弊啦，呢個姿勢肯定會令Chase誤會添！
一諗到咁我就即刻企起身，仲唔小心咁踢左lulu一下，搞到佢成個人跌左落地。
佢又好野喎，咁樣都唔醒。
我：「咩..咩事呀Chase！
」唔知係咪因為心虛，我而家講野特別大聲。
Chase：「嘛，無乜野既，只係我岩岩起身出黎就見到你地覺得出奇啫。」
我：「係咩哈哈，係喎你準備好送個份禮物比Daddy未呀？
」扯開話題，快d扯開話題先得。
Chase：「呃…今晚先啦都係。」
岩既，留返今晚Party先送比佢效果肯定會更好。衰仔又諗得幾周到喎。
Lulu：「嗯…好痛…咦你地兩個…」
呢邊呢個傻佬都醒左啦，終於醒左啦。
我：「醒左就好啦，快d去換衫啦，我地要出去啦。」
佢生日就梗係要帶佢四圍去啦，我地四個一黎就去左食lunch buffet，又有生蠔又有牛，食到不知幾飽。
食完之後有咩做？就梗係去行街啦！
我：「喂lulu，食飽不如去行下街囉？」
lulu：「嘛…我就無乜所謂既…你問下佢地意見先啦。」
Nicole：「我無問題！我想去睇衫！」
衰妹，細細個就咁貪靚，大個都唔知會洗幾多錢係化妝品度。
Chase：「哎去睇衫..咁又要行唔知幾耐，真係麻煩…
」Lulu：「哈哈…唔緊要啦Chase，大家開心最重要嘛。忍耐下啦。
」見到lulu咁同Chase講好似就見到而家既佢話緊十幾年前既佢咁呀哈哈。
當年同佢去日本我同家姐去shopping佢又係好似Chase而家既反應咁，陪我地shopping好似攞左佢條命。
唔，都係時候plan下一家四口去下旅行啦，聖誕節去好無呢？
Lulu：「咁事不宜遲，不如而家就起程啦好無，埋左單就唔好霸住人地張檯啦。」
我：「嗯，行啦行啦。」
夏日炎炎仲帶住兩個細路，行街最岩就當然係行商場啦有冷氣。
而家D商場真係無左我地當年種感覺，好似個個商場都係一樣咁。
雖然話呢個商場本身就係大財團既商場，但我記得以前都唔係咁。
講開又講，真係好懷念以前學校附近個間士多呢。
睇衫，當然就係我同Nicole既天下啦，我同佢兩個一間接一間咁行，衫一件接一件咁試。
話Nicole貪靚真係無講錯，佢八歲人仔就已經自己揀衫，完全唔洗我比意見。
揀衫就當然要試下添啦，我逐件逐件咁試比lulu同Chase兩個睇，問下佢地意見。
Chase就唔洗講啦，我每試一件佢都係用個死魚眼黎做回應，至於lulu呢，就每件都話好睇同靚。
我：「喂呀，點解你件件都話靚架！請認真一點去評分，速度不要太快！
」lulu：「呃…咁你真係件件都著得好靚嘛，可能係本身人既問題啦。」
哼，口甜舌滑。
Lulu：「不過你睇住時間啊…我地唔係約左晨哥佢地食飯咩？
」唔？而家應該仲好早啫…嘩！！原來五點幾架啦！
我：「唉呀唉呀咁晏啦？快D快D行啦！！
」Chase：「終於可以離開呢個無間地獄。
」我而家都無心機理Chase講乜，拿拿聲俾錢就帶佢地三個走。
我地趕頭趕命咁飛的去家姐間café，但係去到門口已經聽到入面傳出吵雜聲。
咁睇黎佢地應該到哂啦，死啦我地仲要拎住一袋二袋，今次真係失禮啦。
Lulu：「入面咁嘈既..？」
我：「我諗佢地應該到哂啦哈哈..」
我一邊推開門一邊同佢講，門只係推開左少少，入面既熱鬧氣氛已經走哂出黎。
「乜你地咁遲架！」
呢種程度既熱鬧真係有少少超乎我想象啊…原本以為只會係大約十個人左右，但而家呢度應該有成四十人。
哇一次過見返好多中學既同學朋友，我自己都好開心啦，更何況係lulu。
哈，佢直頭成個人呆左，o哂嘴咁。
我：「去啦，主角唔打返個招呼邊似樣架。」
lulu：「主角..？喂..！」
我無等佢講完就推左佢去前面，佢班朋友都好識做，即時就捉走左佢去一邊飲野。
大家見到lulu之後氣氛就好似上升到另一個層次咁，變得更加熱鬧。
男既就圍住lulu同佢吹水同玩game，而女既就成班企埋一邊傾偈，仲對班男仔指指點點。
嗯，就好似以前咁。
好喇，咁我都要安…咦？？Chase同Nicole呢？？
佢兩隻野呢？？
「佢兩個的話，去左一邊玩啦。你唔洗擔心。」
嘩嚇死我咩晨哥，無啦啦係人地後面出現都有既。
晨哥：「芷睛你都去同班朋友敘下舊啦。」
我：「哦唔洗啦，我仲要去打點…」
晨哥：「去啦。有咩事都交俾我處理啦。」
我：「但係…」
阿欣：「阿晨都講到咁囉，我地就去傾下計啦，大家都有好多野想同你傾吖。」
阿欣同晨哥一樣唔知係邊度走出黎，仲推我埋去女仔個邊。
咁…算啦順其自然啦，反正大家都知道呢個party既目的係乜，都唔洗我專登去做d咩既。
就係咁，我被推到去女子組既中心位置，遭受一連串炮彈式既問題轟炸。
「你點兼顧做野同照顧細路架？」
「生仔痛唔痛架？」
「你生完用左幾耐時間修身架？」
「魯路修每月比幾多家用你？」
一個接一個問題咁黎，我開頭都仲可以好有耐性咁答，但愈答我就愈唔想答，因為好似所有野都係只係向我黎咁。
為左打破局面，我決定搵話題轉移下。
我：「咦係喎Ada你好似開左間餐廳喎？我地去的話有無折架？」
Ada：「呃…」
阿欣：「真係架Ada？你開左餐廳咁勁？係邊度架？」
Ada：「無啦啦講左去我個度都有既？係呀我開左間餐廳，係樓上鋪黎，之前魯路修佢地幾個都有上過黎。」
「開餐廳好似好辛苦架喎，你同男朋友一齊打理架？」
唔知邊個問。
Ada：「無啊我而家無男朋友，我係自己一個打理間餐廳。」
咦咁Kingsley…
我原本想問，但我諗左一諗，決定再轉移話題。
我：「咦咁點解你會想開餐廳既？」
Ada：「哦，其實開餐廳係我以前中學個陣既夢想黎既，我見自己有筆錢，又有個朋友間餐廳想搵人接手，機緣巧合下咪..係囉咁囉。」
係喎，我記得啦，以前中學個陣佢都成日話…
「呀！！」
嘩咩事，邊個嗌得咁淒慘。
我地成班女仔都紛紛望過去聲音既源頭，見到成大班男仔企哂係度，個個都笑到傻左咁。
不過，當中並未見到lulu既身影。
係咪個個傻佬又做左D乜野傻仔野呀？
我穿過二重人羣，走到去班男仔圍住既中心，結果大出我所料。
Lulu，Jason，師父，朱雀仲有肥豬五個人圍住咁坐係度玩UNO。
原來頭先嗌既唔係lulu，而係師父，佢手上仲拎住一大疊UNO。
我：「咩事呀，嗌得咁淒厲既？」
lulu：「嘛，佢個傻仔黑心draw人two，點知我地四個都有draw，結果佢draw返自己啫。」
師父：「收聲呀！
」哈哈，成班白癡仔。
見lulu玩得咁開心，睇黎我送比佢既第一份生日禮物佢已經收到啦。
一份叫做「同朋友開心咁過生日」既禮物。
晨哥：「好啦好啦！各位靜D先！留意下我呢度先！」
晨哥金口一開，大家都望哂過去。認真厲害。
肥豬：「咩事呀晨哥我地UNO緊呀。」
Jason：「仲洗乜玩吖，邊個會輸已經好明顯啦。」
朱雀：「哈哈哈哈你睇下佢疊牌厚過我部iphone呀哈哈哈哈！
」晨哥：「我話靜D。你地三個係咪聽唔到。
」Oops，認真mode…
唔知係咁啱定係咩，café既音樂係呢個時候居然都停埋，全場一下子靜哂。
晨哥：「好啦，做正經野啦我地。
」全場既燈伴隨住晨哥既說話一下子熄哂，唯一既光綫就係蠟燭既光。
有乜野會有蠟燭光？梗係我整既蛋糕啦。
生日歌亦係呢個時候透過大家把口充析係成間café。
到燈光重新亮起個陣，蛋糕已經送到去lulu面前。
佢又係咁，成個人呆左咁望住個蛋糕。
Lulu：「呢個係..」
我：「傻佬，你連自己既生日都唔記得嗱？」
「生…」
「祝你生日快樂呀魯路修！！」
出乎我意料，佢既反應唔係驚喜亦唔係用對死魚眼話好麻煩。
佢居然喊起上黎。
Lulu：「我…生日…」
傻佬，幫你慶祝生日啫唔洗感動到喊呀？
大家見到lulu突然喊起上黎都唔知點好，個個你眼望我眼，好似等緊人採取行動咁。
個個人一定就係我啦。
我見到佢咁就已經不停咁安慰佢，叫佢唔好再喊，好失禮之類咁，但係一d用都無，佢好似完全聽唔到咁。
佢只係用手掩住自己塊臉，不停咁喊仲有係咁係度講生日兩個字。
我都唔明有乜好喊。
咦…點解…佢…
Nicole：「Daddy唔好喊啦。」
Nicole係呢個時候走到去lulu既前面，用佢個隻手仔輕撫lulu個頭。
唉呀衰人吖我氹你無用，你個女氹你就即刻有反應？你好野吖！
無錯，因為Nicole既安慰，lulu已經收左聲無再喊。
Nicole係呢個時候亦拎左之前我地三個一齊揀既禮物出黎，交左俾lulu。
Lulu：「呢個係..？
」Nicole：「係我，媽咪仲有細佬一齊揀比Daddy你既生日禮物吖！」
Lulu：「我既..生日禮物？
」我：「係呀傻佬，開黎睇下啦。
」入面係乜黎我就當然知道啦，係一隻銀色手鐲，上面仲刻有「lulu，Cherry，Chase，Nicole」四個名。
代表我地一家四口嘛。
佢都即刻戴上手，大家見到咁都即刻拍哂手掌，炒返熱個氣氛。
我係呢個時候都靜靜咁行到去Chase身邊。
我：「喂~~Chase~你份禮物呢？係時候送架啦~
」Chase：「呃…遲D先啦而家咁多人。
」我：「就係趁多人氣氛好先要送架嘛，快d拎出黎啦~
」我一邊講一邊擠佢，最後迫到佢跌左盒禮物出黎。
係喎其實佢買左乜我都唔知添，反正又無包花紙，拆開黎睇下都好。
我都想知Chase佢到底買左D乜俾lulu。
Chase：「唔好呀！
」咩啫咁緊張，咪同我地一樣，又係手鐲，不過係黑色啫。
「DBH」？咩黎架？哦，Happy Birthday Dad呀？
我：「傻豬，邊有人由右刻去左邊架哈哈。
」Chase：「俾返我呀！
」我：「哈哈你怕醜呀傻豬？
」Chase：「唔係吖！快D俾返我！
」我：「反正都拎左出黎囉~如果你係怕醜的話不如等媽咪幫你交俾Daddy啦~」
Chase：「唔好..！俾返我啦媽咪！
」我：「哈哈唔洗唔好意思喎~我而家就拎去比你Daddy先~」
Chase：「唔係送俾佢架！
」咦..？我係咪聽錯..？
「膨！」
美星：「阿妹！」
咦？家姐？乜原來佢唔係度架？仲氣喘喘咁既？
美星：「魯路修佢…」
lulu?lulu佢做咩呀？
「喂魯路修！你無野吖嘛！喂！！」
咩事呀！？
我聽到我身後突然傳黎騷動，於是我就擰轉身望過去。
今次輪到我呆左。
眼前呢片景象好難唔令我發呆。
Lulu佢…突然暈左…