「咁你就安心啦。 」

黑夜裏頭,響起一把溫柔既女聲。

聲音既主人,係我一生中最愛同最想保護既人,Cherry。

我並無即刻答佢,而係先接過佢手上既紅茶,再攬住佢條腰,想話同佢共享天上既美景。

我:「今晚個天好靚,好多星星。」



Cherry:「係喎,好似好耐無見過咁靚既夜空啦。 」

我:「有人話心情可以影響天氣,原來係真。」

「我今日真係好開心,好似終於可以放低哂所有野咁,膊頭,背脊都即時鬆哂
。」

Cherry:「傻佬,係你自己一直諗多左啫。我一直都係咁講架。 」

「喂咪住先,你話可以放低哂所有野?你咁講即係咩意思?你又想放低我? 」



女人總係鐘意亂解讀男人既說話。 

我:「哎,你知我唔係咁既意思架,我又點會捨得放開你呢。 」

我講完就用力抓左佢條腰一下,搞佢「啊」一聲叫左出黎。

Cherry:「衰人!你成日都係咁蝦我!都唔明點解我當初會嫁比你! 」

我:「吓~~我印象中係你向我求婚架喎~~~ 」



我用一個好輕挑既語氣講,好似激到佢更嬲,佢係咁爭扎,好似想掙脫我既懷抱咁。

我:「喂喂喂唔好亂郁啦,杯茶會倒瀉架。」

Cherry:「唔想倒瀉茶就放開我啦,咁咪唔會倒瀉囉。」

我:「咁又唔得喎,我唔想放開你喎。 」

我一邊攬住佢一邊大大啖咁飲哂成杯茶。

我:「咁咪得囉。 」

Cherry:「哼,衰人。 」



佢擰塊臉埋一邊,唔比我望佢而家咩表情。

不過無所謂啦,我都知道佢而家係咩樣。

我:「我想去旅行。」

聽到呢五個字,佢就即刻上釣,望左過黎。

Cherry:「吓?你話去旅行? 」

我:「嗯。發生左咁多事,我又奇蹟般執返條命仔,想話出去行下,四圍去睇下呢個世界。」

Cherry:「你既意思係…可能去好耐?唔係去日本韓國個D短期trip?」

我:「係啊,日本韓國都會去既不過,但我想去下多d地方,好似北韓,北極呢D我都想去。」



Cherry:「咁Chase同Nicole呢?你要佢地無左爸爸? 」

我:「哎,講到我好似去死咁,我老豆老母以前都係咁對我啦,更何況而家仲有美星係度,佢地唔會有問題既。」

Cherry:「咁..我呢?你頭先明明話過唔會放低我架…但你而家又… 」

哈哈,終於問到出口啦。

我鬆開左個隻一直攬住佢條腰既手,但佢即刻捉住返隻手,㚒硬迫我攬住佢。

佢仲要dup到個頭低一低,我又再一次完全睇唔到佢既表情。

真係吖,無你辦法。 



我只好放低茶杯,用個隻手去做我想做既事。

摸佢個頭。

我:「你就梗係要同我一齊去啦,你唔係我身邊點得架。」

「你係我既世界,無我既世界係我身邊我點可以見識到唔同既野?」

佢聽到我咁講即刻望住我,雙眼仲要水汪汪,真係我見猶憐。

呃…我見猶憐岩唔岩呢?都得既,都有呢個意思。

Cherry:「咁..你意思係你會帶埋我去? 」

我:「係呀,啊不過你好似唔同我,你要返工架可? 」



Cherry:「我聽日就返去辭職!! 」

哈哈,咁激動都有既。

Cherry:「我諗落都係,你一定要我係你身邊先成事。哈哈。 」

我:「做乜睇到自己咁高。 」

Cherry:「咁係吖嘛,你又想周遊列國,但你英文又唔係好喎,咁一定需要我呢個翻譯啦。」

我:「係啦係啦,叻啦你。」

「話唔定今次旅行可以幫Chase同Nicole佢地添個細佬或者細妹添喎。 」

Cherry:「你個咸濕仔! 反正都係會周遊列國,不如我帶你去我間大學?我都想返去一趟。」

我:「好好,你話咩咪咩囉。 」

Cherry:「吖不如我地玩世界巡迴啦,第一站韓國,最終點又係韓國咁好無? 」

我:「唔好。 」

~Proto Zero視角~

「咁樣你就放心哂喇。」

空無一人既café,響起一把女聲。

聲音既主人係呢間café既主人,Ada。

佢同時係係我最失意無助既時候給予我希望,引領我走出黎既人。

我:「嗯,應該可以放心喇我估。」

「Sorry呀要你陪我做場咁既戲去呃佢地,真係麻煩哂你。」

Ada:「做戲..呀?」

我:「嗯,我知道如果唔俾佢地睇到我開開心心咁生活的話佢地肯定會牽腸掛肚,無辦法向前行。」

「我實在太了解我自己喇。哈哈。」

「雖然佢以前話過無人可以係佢面前講大話,但睇黎唔包括佢自己呢。」

「可以呃到我既人,就只有我自己呢哈哈。」

我苦笑左兩聲。但得唔到任何回應,令我有少少在意,所以我擰轉臉望過去。

只見佢頭dup dup咁拎住兩杯野飲企左係度。

我:「Ada?」

聽到我叫佢,佢終於抬起頭望住我,仲行左埋黎,放低D野飲係檯面然後坐低。

佢全程都係一言不發,表情都係有點呆呆滯滯咁,令人好在意。

雖然好在意,但我偏偏唔敢問。

因為我知道我自己並唔配…

啊…都未講到一半,心口又開始痛喇屌…

藥我放左係邊呢,好似係衫袋定係褲袋呢…

我開始摸摸自己身上既袋,但由於心口太痛既關係,我摸左兩下就忍唔住痛,成個人挨左係梳化度。

Ada:「做咩呀!?你又有邊度痛呀?」

佢突然好激動咁企左起身。老實講,我有少少嚇親,但而家既情況唔容許我有咁既表情反應。

我:「嗯…我搵緊藥,但好似…」

一時間搵唔到。

Ada:「你等我一陣!!」

都未等我應佢,佢就一支箭咁跑左去水吧。

等佢?佢想做咩呢?算啦都係快d搵藥先,屌我到底放左係邊呀…

搵遍全身既袋,我都搵唔到個藥盒。

最後,我輸左俾痛楚,再無力去抵抗佢,只好由得佢痛。

呢D就係上天俾我既懲罰啦我估。

Ada:「藥呀!!」

嗯?點解你會…

我之所以會有咁既反應,因為我見到佢拎住我個藥盒。

正確D黎講,佢拎住既係我個款藥盒,但唔係我個個藥盒。

一粒,早已無用,我一黎就已經食兩粒藥。

食左兩粒,過左一陣痛楚稍微緩和,但仍然好痛。

我拎起個藥盒,思量緊下一步應該點做。

Ada:「你想食多粒..?」

我:「嗯…仲係有D痛…」

Ada:「食咁多粒得唔得架…」

我:「晨哥話過D藥唔得的話就食多粒,應該無事既。」

講完我就拋多一粒藥入口。

再坐多五分鐘,痛覺消失得無影無蹤。

我:「呼~總算。」

我搖搖個藥盒,心裏既問題亦隨著D藥互相碰撞到既聲開始慢慢搖出黎。

我:「點解你都會有我既藥?」

講完我又搖左兩下個藥盒。

Ada:「呃…係我叫晨哥準備一盒俾我既。」

我:「點解…?你都唔需要呢D藥。」

Ada:「呀…點解你會咁蠢架。」

我:「唔?仲乜無啦啦話我蠢?」

Ada:「我問佢拎呢D藥就係因為我知道你會有呢D情況出現呀。」

「我肯定你會有唔記得帶藥或者唔見藥既時候,所以我咪帶定一盒係身囉。」

我:「點解要咁做..?」

Ada:「吓?我咪話過我會照顧你囉,咁為你準備好藥都好正常啫。」

我:「你..係認真架?」

Ada:「你當我講笑?呢幾日我為你做咁多野你仲以為我講笑?」

喂喂喂,唔好用個種會惹人誤會既講法啦好無?

我:「行街睇戲食飯買衫啫…咩叫咁多野啫。」

Ada:「咁…拍拖係做呢D野架啦…」

我:「拍拖!?我同你!?」

Ada:「喂你咁講係咩意思呀!?」

我:「唔係…只係我以為你只係幫我做場戲比晨哥同魯路修先會…」

「你知道架,我可能…」

Ada:「點解你會覺得我只係幫你做場戲?你唔諗下我可能真係想同你一齊?」

我:「有咩理由你會想同我一齊…?係咪因為我係…」

Ada:「唔係。唔係因為你同佢一樣樣我先想同你一齊。」

「咁殘忍既事,我唔會做。佢以前都有同我咁講過。」

「就算外表好似,甚至一樣,你同佢歸根究底始終都係兩個完全唔同既人,呢點我好清楚。」

「我絕對無當你係佢既代替品,我想要既係你,係係我眼前既阿新。」

我聽到之後個口合唔埋,講野都有少少困難。

心情實在太過複雜啦。

我:「咁…我有咩好令你會想同我一齊。」

Ada:「鐘意一個人,真係需要理由咩?」

呢番說話,我係邊度聽過。

Ada:「不過理由的話,多的是啦。最主要都係你夠溫柔,總係想犧牲自己去成就人地既幸福。」

「而家我想去同你創造你既幸福。」

我既幸福…?我真係可以擁有幸福?

上次我以為自己可以擁有幸福既時候上天就給予左我一個懲罰,今次會唔會…

我:「但係你知道我既情況..成日都要靠呢D藥…我可能隨時都會死…」

講既時候,我又搖左兩下藥盒。

Ada:「人終需一死,只係遲與早既問題。」

「但只少俾我係個日黎到之前陪你一齊行落去,好無?」

去到呢一刻,我知道佢係真心真意對我好。

佢知道我既一切,甚至知道我可能好快就會死,但都願意同我…

拒絕唔到了。

我放低左個藥盒,騰出雙手,緊緊抱住佢。

似乎佢都俾我呢一下舉動所嚇親,透過身體我feel到佢成個人震左一下。

Ada:「阿新..?」

我:「咁..我就拜託你啦。女朋友。」

佢並未用言語回答我,而係用反應。

佢喊,並且緊緊咁攬住我。

或者,我都可以真正咁放低呢份好似詛咒咁既過去啦。

複製人,其實未必係一件壞事吖。

不過,有我一個就夠了。