溝女的聖地──補習社: 79

我唔知Kitty咁夜仲打俾我做咩，我都係啱啱倒數完返嚟，佢依家應該好開心先係。
 
啫──啫──啫
 
手機嘅接通聲搞到我人都煩埋，好似心跳咁，我個心跟返電話個節奏係度跳。
 
通咗之後，電話對面一片寂靜。
 
「喂？」我不溫不惱咁嗌咗聲。
 


……………….
 
都係無反應。
 
我唔知Kitty搞咩，都唔知發生咩事，但我知啱啱過咗新年，我應該開心咁同佢講句：
 
「新年快樂！」
 
點知我講咗喱句之後無幾耐，就傳嚟一股哭泣聲。
 


On9都知發生咩事啦，我都估到十居其九。
 
我任由對面嘅哭泣聲一路播，播到無電為止啦。
 
過咗好耐，耐到我都唔知個分針轉咗幾多下，但直到Kitty哭到無曬力，唔再抽搐，佢先識停。
 
但佢一開口，把聲就已經軟曬，無曬力咁。
 
「呀……水……」
 


我好感恩Kitty有事嘅時候，會諗起我，會打俾我。
 
雖然身份唔係我想要嘅，但至少我係Kitty心中，有一定嘅地位。
 
「嗯？」我好有耐性，因為我知道佢依家需要嘅，唔係啲咩意見，咩分析。
 
好多人傷心嘅時候，佢哋會知道下一步要點做，亦明白種種道理。所以佢哋需要嘅，係一聲安慰。
 
「我…我失戀…」
 
講完，本來收起咗嘅洪水，又再崩解了。

「咩事呀？」喊到我心都痛埋。

「........」Kitty一路喊，想講但又抽住抽住咁，講唔出嚟。



我對佢嘅感覺，早已停止，但我都會著緊佢，佢都係我主要嘅朋友。

我唔想再好似以前咁痛苦。

「佢...原來一路...一路...都無...鐘意過我...」

會唔會呀？一齊咗咁耐點都有啲感情啦！喱個係我第一時間嘅反應。

「佢...佢係我爹地叫嚟照顧我......嗚嗚。」

「只係......」

講到一半又嚟多鑊，我最驚就係女人喊。



首先，我唔明點解女人會喊，然後，我更加唔明點解男人會驚女人喊。

我自己都唔明點解自己會驚。

「好好好，你慢慢講，唔洗急，好多時間。」

我忍唔住要出聲安慰下佢，本來我打算佢講曬成件事先安慰佢，但依家咁樣都唔知等到幾時。

「嗯......」Kitty好快收拾心情。

「你依家係邊呀？」忽然醒起喱個重要嘅問題。

「係...係街。」
 
「係街！？」好夜啦喎。



「嗯...」想必依家街上好多人，好多對眼望緊喱個哭美人。

「做咩仲唔返去呀？」語氣強硬得嚟，要略帶些少溫柔。

我心入面幾擔心佢，一個女仔夜媽媽，啲麻甩佬忍唔住，癲起上嚟咁點算！？

「我...我唔想返......」

「咁你依家點算呀？」依家最主要嘅，唔係同Kitty咬文嚼字咁討論點解件事會搞成咁。

而係下一步要點做，然後再傾返頭先嘅問題。

我第一次遇到喱啲情況，我都唔知點做好。第一次有女仔喊住咁打電話嚟，實在手足無措。



「我都唔知...」

「我想你陪我...」Kitty直接地記。

「下？」依家？

「你依家得唔得閒呀？」Kitty把聲又甜美，態度又柔軟，真係會心軟架！

「我係得閒...」

Kitty聽到「得閒」兩隻字，就興奮咁講：「我依家係尖沙咀。」
 
「但我依家係日本......」我講完出嚟都驚Kitty會唔知咩反應。

果然 !! 我嘅擔心係正路嘅。

因為跟住落嚟Kitty就無出到聲，喱份寂靜比起佢嘅喊聲更嚟得可怕。

良久後，Kitty才吐出一句說話，「咁算啦。」

我正諗緊要點樣先令佢開心返嘅時候，Kitty接住講落去。