溝女的聖地──補習社: 80

「但我想你陪我......」

我緩緩地牽起嘴邊嘅笑容，雖然我只係佢失意嘅時候，想要嘅安慰。

但我聽到喱句，真係覺得甜，同埋窩心。

即使你話我犯賤，我都只不過係講出心聲姐。

「我依家咪陪緊你囉，哈哈。」我試著講得輕鬆啲。



「你幾時返嚟呀？」

「聽日下就。」

「咁......你返嚟可唔可以陪下我呀？」

好明顯咁聽落，佢已經無咩點喊，變返正常。

我思索咗一陣，覺得都okay嘅，反正都無咩嘢做。



「好呀...你想幾點？」
 
「不如我嚟接你機呀？」Kitty提議。

「吓？」我覺得咁樣好唐突，好突兀。

唔係話接我機唔好，我都想Kitty會嚟接我機。但唔想佢係以依家咁嘅狀態，咁樣嘅心態嚟接我機。

感覺我就似......一個水泡。



喱一種思維，我唔係唔明，唔係唔理解，畢竟好多女人傷心失意嘅時候，係想要一個「堅係膊頭」——堅強嘅膊頭。

但原來事情發生係自己身上，係咁難以接觸。特別係Kitty，我心目中嘅女神。

「好呀...」我勉勉強強答應。

希望佢唔好心情唔好先想要投懷送抱，如果係咁嘅話，我諗我會拒絕。

因為我覺得咁樣嘅愛情，並唔係真嘅。

「咁你聽日幾點機？你同我講呀。」

我將自己班機嘅班次、時間同編號都同咗佢講。

「咁你依家返屋企？」我再三問佢。



Kitty猶豫咗一陣，然後講：「我今晚唔想返屋企......」

「痴線！你唔返屋企咁去邊呀？」
 
唔知點解，我覺得Kitty好陌生，喱一年嚟我哋好似無熟悉過咁，反而越拉越遠。
 
唔知係咪出嚟社會嘅我哋會變，定係因為時間耐咗，唔係成日聯絡而形成喱種陌生感。
 
「求其搵間酒店住住先囉……」
 
佢有錢，又真係大曬嘅。
 
「一個女仔，去酒店瞓好危險架……」擔心，係我依家嘅感受。
 


「無事嘅，我係外國都係咁樣生活過嚟架啦。」
 
下？我又再一次愕然，乜Kitty係外國都係咁？
 
佢嘅清純，女神嘅形象漸漸，一層一層咁瓦解。
 
原來就算以前再清純嘅女仔，都會唔再清純。
 
以前嘅Kitty，係唔會咁直接，同埋……哎，我唔知點形容。感覺上，中學時期嘅佢，好似一張白紙咁單純，好似清泉咁，無任何離質，純天然。
 
依家，好複雜，我睇唔透。從前我好了解Kitty，依家嘅佢多咗好多層神秘感，有時會令無覺得恐怖。
 
「咁好啦。」我無奈咁講。
 
喱一晚，我無奈咗好多次。


 
「咁你要自己小心啲啦。」我再一次提醒，始終都係會關心佢。
 
「我知啦，聽日見啦！」佢算係有笑到啦，我感覺。

總算收完線。
 
我鬆一口氣，我都唔知點解會鬆咗口氣。明明應該開心先至係……但心入面係有啲唔開心，卻唔知因乜事唔開心。
 
Kitty分手，失戀，我應該開心先係……
 
開心條TB終於唔阻住我溝女神，但…但係…
 
我返到房嘅時候，先醒起，仆街啦！我無帶鎖匙！
 


敲極門都無人應，我諗住仆街已經瞓曬，死啦！依家點算？返唔到入去。
 
真係好撚戇鳩，忽然間我覺得自己好似無人要咁，好可憐。
 
啲水去到眼角架啦，但就係流唔出。
 
過咗半個鐘啦，敲到手都痛啦，先有人開門。
 
「嘈嘈嘈！敲乜呀！？」Billy一臉未瞓醒嘅死人樣。
 
「無帶鎖匙呀！」我嬲嬲地。
 
「打俾我哋呀嘛。」Billy講。
 
「無帶手機。」
 
依家我唔係好想返香港，因為返到去又有排煩……
 
係咪習慣咗單身，就會唔慣處理喱啲感情事？
 
我唔想管，唔想理，就算係昔日自己心中嘅女神，自己渴求好耐嘅嘢，都覺得無動力。
 
我同一大班麻甩佬係床上面典嚟典去，瞓唔著。
 
失眠。