《孤獨的島住了一個人》: 27 沒有人會聽到你的呼救(2)

臨出班房時，碰到歐陽派，他當場呆了，一副「早叫你別多事」的臉色。
 
接著，我被逼沿樓梯落去地面。
 
——押著我的是阿豪和阿晨。
 
被帶到活動室。
 
阿晨拉開活動室的門，阿豪把我押進來；兩人進來後馬上鎖門，並拉小窗簾遮住門上的窗。
 


燈光之下，蔣少坐在一張膠椅上，看著我。
 
活動室牆邊擺放著很多膠椅，都是有背的那種。
 
「你就係孫正直？」蔣少問。
 
「我係。」我說。
 
「偷拍哩條片既人係你？」他悠然拿出手機，播放Youtube中的欺凌片段。
 


「冇錯。」我說。
 
「孫同學，我好唔明白點解你要咁做，你以為咁就可以害到我喇咩？冇用架，學校好快就會澄清，話只係反欺凌活動既拍攝片段，入面既人都只係演緊戲。」蔣少說。
 
「唔知你係一心想幫同學，定係因為其他原因？」蔣少不耐煩地說，「總之，你令到我比Daddy話左好耐，件事都驚動左好多人。」
 
「所以我冇乜耐性，為左等陣你可以爽快咁答我問題，我們都係直接打你一鑊先啦。」蔣少說，示意可以動手。
 
阿豪和阿晨慢慢逼近我。
 


「啊，我比人打啊，救命啊！」我絕命呼救。
 
「救命啊，出面有冇人啊？好痛啊，我比人打啊！」我盡力喊破聲線，只求有好心人經過。
 
大聲叫救命，是最基本去應付這種情況的做法。
 
一般壞學生都會馬上忌諱。
 
「都未打你，你就咁驚青，屈定我地先？」阿晨不滿。
 
「你死心啦，活動室道門隔音好勁，平時搞勁多音樂活動，外面聽都係得兩成音量左右。」阿豪說，輕蔑地說，「所以——」
 
「就算你嗌破喉嚨，都唔會有人黎救你。」
 
聽了這話，我便收了聲。


 
真是老土的對白。
 
「即係話幾大聲叫救命都冇用啦。」我放棄求救，放軟了身體。
 
「冇錯，你終於明嗱。」阿豪揚起臭臉，啪響指關節。
 
同時揚起嘴角的，還有蔣少和阿晨。
 
「震震震震……」手機震動。
 
蔣少拿出手機，奇怪了，「陸傾兒？」
 
他接聽，聽著聽著，二十秒後掛線。
 


「咩事啊蔣少？」阿晨問。
 
「傾姐要我放你。」蔣少看著我說，「你同傾姐到底係咩關係？」
 
「我只係……」我欲說。
 
「等等，唔好答住，打完你先一次過答啦。」蔣少再次示意動手。
 
「驚唔驚傾姐會嬲？」阿豪擔心。
 
「我就唔信傾兒會為左哩個傻仔而嬲，就算真係嬲，我都會哄返佢。」蔣少從容地說，第三度示意動手。
 
阿豪扭扭頸子，「孫同學，唔好意思喇，你要忍一忍痛。」
 
作為最後一天出現的人，無論我闖了什麼禍，都沒有人可以責罰我。就算我把他們毒打至殘廢，我也不需要承擔法律責任，更不需要坐牢。


 
因為，明天就不會再有人找到我。
 
今天的我，不需要考慮將來而全力活在當下的我，是最惡的人。
 
就好像逼虎跳牆、趕狗入窮巷，可以全力一搏。
 
神明丁，別走漏眼，給我看清楚。
 
「係你地自己攞黎。」我握起了拳。
 
孫正直17歲的身體，是每天都打籃球的運動員身型；是每天都以守住阿傑的走籃為目的、每天都希望防住阿進投球的理想身型。
 
孫正直目前的頭腦，是經過職場，被職場男同事拉過去做健身、玩過拳擊的頭腦。
 


「孫正直，你知唔知練腹肌最爽既方法係咩？」趙超賢在公司問，他是我工作上的同事，也是一位熱愛鍛鍊身體的男人。
 
因為他認為男人十幾歲，可以靠MK樣、白淨斯文來吸引女仔；但到了二十多歲，女人就不會再吃瘦弱斯文的一套，而喜歡有肌肉、夠MAN的男人。
 
「咩方法？」我無知地問。
 
「練拳，每出一下拳都用腹肌轉過去，用轉身帶動出拳，啵。收工去打返幾百拳，咁就又消到脂，又練到腹肌同手臂。」他雀躍地說，「所以間間Gym Room，除左健身，都有得學埋Boxing.」
 
「不如收工一齊去玩。」他邀請，「玩住四堂先。」
 
「但我唔覺得……會有機會同人打交囉。」我說。
 
「邊個話學黎打交？」他說，刺出兩拳，「練身型之嘛，可以係女仔面前show off之嘛。」
 
現場，身邊一個女孩子都沒有，只有想教訓我的惡霸學生。
 
以及，一個毫不怕死的孫正直。
 
阿晨準備抓住我，阿豪準備揮拳。
 
「一陣就算你地嗌破喉嚨，都唔會有人黎救你地。」我鬆鬆右手，把目光鎖向三人。