我被初戀女友瘋狂報復: 外傳:第四話
「你想玩咩啫?」劉家雄叉住腰唔耐煩咁問我,「無啦啦跟蹤人又上人地屋企,你唔知醜既咩?」
「而家係唔係唔歡迎本小姐嚟你屋企丫?」我以霸氣作還擊。
「唔係...」跟住佢好細聲講,「就算唔歡迎你都上左嚟啦...」
「今日想借你個樣嚟做功課既。」我攞畫簿畫筆出嚟準備同佢做素描。
「點解你唔返屋企畫既?」
「屋企無人唔通對住塊鏡畫呀?」
「等我五分鐘,等我洗完米煮好飯先。」講完佢行左入廚房。
「點解你今日唔去拍拖既?」百無聊賴,我入佢間房參觀順便嬲佢傾計。
「慧勤話佢上次考得唔滿意,今日走去自修室溫書喎。」佢洗完米走出嚟,「喂,唔好亂搞啦!」
「借依隻碟嚟丫...仲有依隻...」我攞左佢幾隻CD同隻「假如愛有天意」DVD,「好!開始啦!」
於是我就開始畫佢個樣...
「其實你畫畫咁叻,點解唔參加學校既美術學會既?」過左陣,佢突然問我。
「唔好郁喇...唔關你事...」
「問下啫...」
「我唔想參加咩學會...」
我唔想再參加美術畫畫學會...
「點解唔見你提下你屋企既?」食晏時,我問陸綺珊有關佢既野,雖然同佢拍左成個月拖,但始終都唔太了解佢既事...
「有咩好提啫?咪又係屋企一個...」佢繼續佢果種吊兒郎當既性格講野,然而,佢越係唔講,我越想知,於是...
「你跟住嚟做咩啫?」我打算跟住佢返屋企,但跟到一半已經被佢發現左...
「想八下你會去邊啫...」我擺出一副楚楚可憐既樣...
「唉...你想跟就跟喇...」我知佢一定唔捨得我難過既。
平時我地上完寫生學會或者拍完拖,佢都先送我搭車跟住自己返屋企,而今日我就跟佢返屋企,睇下佢平時會做咩。
首先,我地嚟到一間小學...
「家姐...」一個女仔走係學校走過嚟,佢大概小六左右,「呢個係...」
「佢係我同學,叫羅小柔,依個我個妹,綺霞...」陸綺珊對住個女仔講,「叫姐姐喇!」
「姐姐...」綺霞束住馬尾,感覺斯斯文文,同陸綺珊好大分別。
「返屋企喇...」見到陸綺珊拖住綺霞,佢平時既吊兒郎當性格好似突然唔見左,有啲似家長既感覺出左嚟...
「你真係跟到返屋企喎...喂,你好換衫做功課啊!」陸綺珊講完,就去廚房洗米,「喂,你留唔留係度食飯嫁?」
「吓?哦...好啊...」突然我聯想到我地好似一家人咁...
「姐姐,你可唔可以教我做依題呀?」
「哦,好啊...嗱...咁既,依度...」
「我返嚟喇!咦?有同學嚟左呀?」過左無耐,佢地爸爸返到屋企,「佢留係度食飯嫁?」
佢爸爸睇落有啲粗魯,應該做體力既工作...
「嗯...煮埋啲餸就食得喇!」陸綺珊攞住一碟餸由廚房行出嚟...等等,係唔係差緊個人呀?
「我媽媽係舊年因為意外過左身...」食完飯,過左陣,因為夜既關係陸綺珊送我到車站搭車,同時佢亦講關於佢屋企既野...
「於是你就要身兼母職...」
「嗯...開頭果時真係唔係好掂,好彩老豆都會教我幫我,而且佢都開始賭少左,以前佢一個禮拜賭幾場馬,而家佢一個月都係玩兩三場,再加上綺霞佢都算乖,係有時扭下計咁...」佢一路講佢屋企,佢眼神一路流露出溫柔既目光...
「我係唔係太多事...因為我既一時任性,勾起你一啲唔開心既回憶...」
「吓...唔係...咩唔開心回憶...學我阿媽話齋,日子係咁過,開心又一日,唔開心又一日,點解唔笑住過呢?」佢講得好輕鬆,而我亦明白佢成日嬉皮笑臉既目的係埋藏佢內心既悲傷。
「講件事俾你聽丫...」佢繼續講,「果時綺霞啱啱出世,初初我好妒忌佢嫁,因為老豆阿媽淨係睇住佢忽略左我,直至綺霞幾個月大時,阿媽將佢抱落我手度,果時我又唔識抱,佢突然殿嚟殿去,我驚我抱得佢唔適服整醒佢喊,正想俾返阿媽時,佢睜開眼望住我好似想喊咁...突然,佢對我笑...嘻嘻...嘻嘻嘻...」
由佢甜蜜既笑容我可以感受到果一刻既溫暖及甜蜜,亦令我聯想到細個媽媽抱住我既感覺。
「所以我好錫佢嫁,有時啲男仔蝦佢我會幫佢出頭...嗯?做咩喊呀?明明係開心事嚟嫁!」
「我...開心到...喊啫...」佢用手指將眼淚一下一下抺去。
「傻妹,喊咩呀...」佢行近我面前,雙手慢慢攬實我,令我感受到佢嬉皮笑臉下藏著一個溫柔既心,而我地亦開始擁吻...
今次再無人對我地指指點點...
「嗯...做咩你眼紅紅既?」劉家雄既問題將我帶返嚟現在。
「無...有沙...入眼...」我用沙啞既聲音回答。
「哦...廁所係果度,你可以洗乾淨你眼...入面既沙...」
我即刻衝入廁所洗面,對住塊鏡既自己雙眼通紅,明明對自己講過唔再諗...點解...
「我返嚟喇...咦?」大門打開,原來係劉家雄既媽媽返左嚟,「有同學嚟左,佢就係你女朋友仔呀?」
「梗係唔係!」我地兩個異口同聲講。
「我走先喇,打搞晒...」我拎起書包準備離開。
「哎呀,我仲煮埋你飯添...」
「係囉,留係度食啦,多個人多雙筷啫...」
「唔使喇,屋企煮左我飯啊...」攞埋畫簿,我已行出左大門,「唔使送喇...」
「你整喊人呀?」
「梗係唔係啦,痴線!」