我被初戀女友瘋狂報復: 外傳:第五話

「我返嚟啦!」返到屋企,已經見到爸爸媽媽係廳度,依個係罕有現象,因為佢地既工作關係,要佢地係平日一齊係屋企已屬萬中無一,但最重要既係佢地面色沉重...
「小柔,過嚟丫...」唔同我細個果時果把溫柔既聲音,而家媽媽把聲俾我一種冰冷既感覺...
「小柔啊...」爸爸望左一眼媽媽,跟住繼續講,「最近...係學校好嗎?啱啱上完美術班呀?」
「嗯...今日仲畫左幅畫...」我俾左幅畫爸爸睇,係幅公園既素描。
「嗯...咁就...」爸爸又望一望媽媽,「咁係學校識左咩同學?」
「吓...女校...咪女同學囉...」我開始覺得啲對話有啲古怪...
「其實我地想問...你係學校識左咩人?」媽媽終於忍唔住插嘴。
「咪講左女同學囉...咩人啫?」我開始有啲不祥預感,我盡力希望唔好成真...
「小柔!」媽媽突然用嚴厲既語氣喝罵我,我當堂個心震一震唔敢出聲...
「媽咪...」爸爸安撫一下媽媽,跟住講,「小柔...媽咪有個朋友...知道你係學校識左個高年級既...而且...仲見到你地錫...」


我既不祥預感已經成真...
「我地送你去女校,係怕你識左啲唔好既男仔...都估唔到你地咁...」爸爸無講落去,又望一望媽媽,希望佢接落去...
「我知...可能你仲細,唔知自己既取向...所以我地幫你伸請左轉校...或者...轉左男女校,你會...你會變返正常人呢...」媽媽講完將個擰去一邊,唔敢正視我,但呢一句話已經傷透我個心...
「咁即係點呀?」雙眼已被眼淚濃罩,我好希望係我聽錯...
「小柔...」媽媽都忍唔住喊...
「咁我即係唔正常呀?吓?」我好想竭斯底理大嗌,但已傷透心既我已無力大嗌...
「唔係呀,小柔...你聽我講先啦...」
「唔聽啊!唔聽啊!」我抱頭撳住耳仔,用最後既力氣講左令我後悔既說話,「我憎死你啊!」
我衝左出門口,走左上街度。果晚落住大雨,我任由雨水淋落身上,希望沖走我心中既悲痛,我已分唔到面上既係眼淚定雨水。我咩都無帶,走左出嚟,身上只有就快無電既電話同淨返十幾蚊既銀包...
「喂...珊啊...我...」迷糊間,我打左俾陸綺珊,但我唔知講咩好...


「喂...喂...係唔係小柔呀?做咩呀?」
「我...我...啊呀...」我喊到講唔到野...
「你係邊呀?我過嚟搵你!」
於是佢就搭的士過嚟接左我返佢屋企。係車度佢無問我發生咩事,淨係攬住成身濕晒既我...
「好彩今日老豆返夜更,綺霞又去左學校宿營...嚟啦,沖個涼換左啲衫佢...」
佢遞左套衫俾我,我就去沖涼...
「沖完喇,過嚟飲柸熱朱古力,暖啲嫁,套校服俾我啦...」
「點解...你唔問我發生咩事既?」
「我而家唔想知,等你想講果時先話我聽...」佢攞左套校服行開左,「你肚唔肚餓呀?我煮個麵你食丫。」
「唔使喇,我唔肚餓...」飲住柸朱古力,暖意流入我心...


「你應該攰喇...你訓我張床丫,我...」佢想行出間房...
「今晚可唔可以陪我一齊...」我低頭拉住佢手...
「吓...好喇...開收音機俾你聽,等你無咁悶丫...」
收音機傳來一段鋼琴開場演奏聲,我認得主音把聲,係首舊歌...
~窗邊雨水~拼命地侵擾安睡~
~又再撇濕亂髮堆~
「我地係唔係做錯事呀?」經過媽媽既責罵之後,我覺得錯果個係我,我唔應該同綺珊相愛...
佢無出聲,錫左我額頭一下,跟住將我擁抱入懷。
~別怕~愛本是無罪~
「傻妹...唔好理其他人...我愛你...」
~無須逃走~世俗目光雖荒謬~
~為你~我甘願承受~
我地緊抱一起,一邊擁吻,一邊將身上衣服脫下...
「攬實我...唔好放手...」
「嗯...一定...永遠...」


~願某地方~不需將愛傷害~抺殺內心的色彩~
~願某日子~不需苦痛忍耐~將禁色盡染在夢魂外~
「啊...唔好意思...」劉家雄聽完我既故事之後忍唔住喊出嚟,又論論盡盡咁將包紙巾整跌落地...
「踫!」佢起返身時個頭撞左張檯一下,好大聲,仲差啲將檯上柸水整瀉。
「嘻嘻...哈哈哈...」見到佢撳住個頭個樣,本來心情唔好既我都忍唔住笑。
「笑返喇咩?」佢捽住個頭講,「笑又過一日,喊又過一日,笑住過好過喊住過啊!嘩...痛死我...」
「傻瓜...」