當我訓醒既時候,已經係晏晝既三點鐘。
最衰都係肥康,其實都唔關佢事,最衰係隻死人on9 hdd,搞到我無覺好訓。
平時係呢個時候,蓮姨都會過黎同老母打牙骹,啖下午茶。
蓮姨係老母既表妹果邊既親戚,我三年級果陣佢就搬左去隔離屋,從此我老母同佢就好似姊妹咁。
無論係午飯定晚飯,蓮姨都會過黎痴餐,我細細個會好期待,因為佢每次都會帶d正餸黎加料。
雖然晏晝唔見蓮姨,我都冇乜為意
直到去夜晚7點半既時候,我有種不祥既預兆


我問老母




「老母呀,今日成日都唔見蓮姨既?佢係咪返左大陸?唔見你地提起既」
老母吓左一聲
「邊個蓮姨呀?樓下賣魚果個陳伯老婆?」
「你地鬧交咋掛吓話?有咩唔對唔著,三口六面咪講清講楚囉,做到小女人咁有乜為」
老母一面錯愕咁望住我「我真係唔知邊個係蓮姨,我仲要煮餸,你行開執定碗先啦」
雖然老母個樣好似好真誠,但我都仲係覺得佢地係鬧緊交
於是我出門口禁隔離屋個門鐘,打算幫老母講下好說話。


...等左一分鐘都未見有人開門




正當我以為蓮姨出街而轉身走人之時
門開左
但佢唔係蓮姨,而係一個睡眼惺忪,渾身酒臭既大叔
唔通蓮姨溝到仔?
「唔該呀蓮姨係唔係度呀?」我問
「屌,邊撚蓮姨呀,推銷x線電線既快d走啦」中年漢爆哂粗
「唔係呀,呢間屋果個女主人呢?」
「我咪係屋主囉,屌!」呯的一聲,木門就關上
比個中年漢失驚無神屌到一面屁,我竟然無嬲,相反,我開始意識到恐懼既來臨






消失....


蓮姨佢憑空消失左....
點解會咁?
我即刻狗衝番屋企
「老媽子,蓮姨佢唔見左呀!!!!!佢去左邊??!」恐懼籠罩住整個心
「邊個蓮姨呀,我都話唔識囉,你係咪痴左線」
「你表妹個遠房親戚呀蓮呀」
「我表妹遠房戚?你係邊度聽番黎」老母滿腹疑惑既樣已經證明蓮姨既存在已經消失


洩哂氣既我打比肥康
「嘟..嘟..嘟」唔會連肥康都消失埋掛?




「喂,街市仔,睇黎有大穫野發生」
「我個蓮姨唔見左」
「你又係咁?」
「咩我又係咁?」
「我個老死同學呀力佢消失左,本來今朝想話過d檔案比佢同我一齊破解
但電話果度冇左佢個聯絡電話,打去佢屋企變左一間公司電話,就好似
根本冇呢個人存在過一樣...」
我mak大個口,根本唔知講咩
所有野都超越我地理解既範圍,呢d明明只有係漫畫先會出現既劇情,依家活生生展現係我地面前。


呢個時候,肥康講左一句令我好震驚既野
「街市仔,有冇諗過同個file有關係?」
兩樣野差天共地,點拉埋一齊諗呀??
「唔係喎,琴晚凌晨我地del左個file,唔通.....?」我額上開始冒汗




「常識已經唔可能為我地解決任何問題,我地只可以循呢個方向去諗」
肥康穩重地講呢番說話,但我知佢都好徬徨。


「依家你隻hdd已經駁左去我既總server果度,容量方面唔洗擔心住,我試下睇下可唔可以諗辦法
將琴晚del左果個file復原,如果可以復原到,話唔定呀力同你既蓮姨都會翻到黎,
我今朝曾經試過用正常既方法黎recover番del左既資料,但唔成功,我一陣會出去買d工具,今晚再努力試過」
「咁真係指意哂你,肥康,我真係想講聲我愛你」
「屌你老母咪撚gay,你不如出街睇下有咩變化左,如果你del既野會影響到現實世界,咁唔單止係蓮姨,其他野都會有變化。」
呢次應該係我同肥康傾得最耐電話既一次