電腦無啦啦多左d唔知咩既檔案係度(上): 第七節
呢一刻最緊要淡定，要相信肥康既能力...
好想開post去高登問下?唉不過d人實以為我on9，一定話我file係數碼世界
都係聽肥康話換件衫就落左街，睇下del file仲會影響到d乜野
「乜玩到咁大呀!...」見到既景象令我目定口呆
本來前應該係間大型既屋院商場，但依家變成一條行車天橋...
我再環顧四周，好彩見到街市賣魚個陳伯仲係度。
原本唔止del人，連地方都可以改造既咩?
我諗起肥康提過，佢電話聯絡人果度唔見左佢同學呀力個手提
我拿拿林拎起左電話出黎睇
最近一次whatsapp 既人係miki
但...頭像好似唔同左既?
冇理由嫁，唔通我讀書讀到精神錯亂?
我放大miki 個頭像黎睇，miki變撚左樣呀!
仔細d睇，個樣好熟口面，唔知係邊到見過
思緒好混亂，我翻查下我同佢既whatsapp紀錄有冇特別
「哈哈...」最後我係用呢句同佢完結話題既
冇變過，所有野都係一樣，除左個樣。
咁suki呢?
我又打開同佢既對話whatsapp
好彩，女神頭像冇變過，但我好似未同話佢講野...
「hi，suki，你相唔相信係電腦禁一個制就可以改變現實世界?」我第一句同佢講既野就好似痴線佬一樣...
suki好快回左一個奸笑既icon比我
「呢個世界好多野都係科學解釋唔到，我估有可能既，哈哈」係我耳邊又響起佢令人心曠神怡既笑聲
「其實喇嘛教信有真神既咩?」為左延續話題，我求其問D野
「唔係，喇嘛教係佛教既分支黎，從藏語文既文獻可以睇到佛教既最原始哲學，教義。」
「咁點解轉世靈童會發出一d 好奇怪既類似預言既野既?」
「我估係咁既，因為轉世靈童之所以能夠被知道佢既身份，一定係佢本身有種超越人既能力」
「呢種能力就係預言?」
「而通常既預言都係用一d比喻既形式，好少直接會話比你知將會係咩地點發生咩事。」
「你相唔相信真係有呢d預言?」
「唔~你估下?」suki又露出詭譎既笑容，從佢打既icon可以知道
「你應該係個幾理性既人，係咪呢」乘機讚下女神，搏取好感先。
「唔話你知，出街先，一陣再傾」女神咁就走左
係周圍行完一圈，見到最大影響都係冇左個商場
有d細舖仔既老闆又好似唔同左，我唔知係真係換左，定係del個file所造成
係呢個時候，肥康識趣咁打黎
「街市仔，你過黎我度先，似乎有d濕滯」
講完個滯字，電話發出嘟嘟嘟既聲，我都慣左喇...
去到肥康果度，肥康唔知係度搞緊d咩線路
「黎左喇?你坐坐低先，我整埋呢度就ok」
我是但係疏化搵左個位坐低，精神壓力比左超越我負荷既負擔比我
「我已經有辦法可以恢復番原來你del左既file」
「真係? 屌你正呀喂」
「不過...」
「不過d咩?」我急切追問
「事情唔係咁簡單，係我對下file果陣，發現所有file都唔同哂」
「即係點樣?」手心湼左一把汗
「我先問你一個問題，1927.4.12係一個咩日子」肥康奇怪咁提出一個問題
「第一個畫面我會諗起蔣介石上海清黨事件，做咩?」
「不愧係歷史迷，之前咪提過我用一個txt既檔案名做密碼既?我追查番個建立日期就係1927.4.12」
「我係咁樣推理，我地del左果個"0406"file係呢日既其中一個時間」
「咁0406係分鐘定係秒?」
「呢層我唔多清楚，你應該知道咩係"蝴蝶效應"掛，冇睇過套戲都應該有聽過」
「係」
「我同學呀力係上海人，我懷疑會唔會係冇殺到原本應該死既人，而之後冇死既人導致呀力既呀爺或者太公死左」
「咁樣呀力就出唔到世!咦諗番起我老母果邊好似貫藉都係上海」我恍然大悟
「我之所以會話濕滯係因為當del左一個file，同時會影響其他file既變化，
你del一del之後，首先最顯注係多左4個file出黎，然後其他file有d size大左，有d細左。」
「咁如果放番原本個"0406"file番入去，咁咪亂到hihi?」
「所以我咪話好大件事」
「另外，有個問題我想問你，點解miki個樣會變左?」
我即刻打開個頭像比肥康睇
「咦?呢個咪係果段短片裏面果個光頭女人?」
睇真d又真係喎，乜咁大整蠱呀!miki整完容仲要出家做尼姑?
丫唔係!應該問點解miki會變左光頭女人?
「肥康，事情有d崎嶢，不如我地先將個"0406"file 先放番入去，好唔好?」
肥康dup低頭沉默左一陣
「如果放番入去又會影響到好亂，但如果呀力可以出番黎，咁可以依靠佢既推理智慧」
「乜呀力咁勁既咩?」
「呢個人個腦唔知咩構造，yr1 就已經有professor 比錢佢讀phd，你話咩料喇」
天才既世界原來有另一個天才世界
突然間我覺得自己好渺小
「無計可施，死馬當活馬醫啦，我就放番個file入去睇下會點」
一條綠色bar不斷掠過眼前，個file已經成功放番入去
冇野發生既?
「上次我地都係冇野發生，可能冇受影響只有我地」肥康答
我拎出電話，蓮姨個聯絡電話果然出現番
好yeah!乜都番哂黎，真係好想大叫你要唔要射一甩呀，爽歪歪呀
我急不及待就打比蓮姨
「喂，蓮姨!」
「咩事呀街市仔?」
「冇呀，我好掛住你，你依家做緊咩?」
「哈哈，冇呀，同你uncle係樓下茶餐廳撐緊枱腳姐」蓮姨充滿甜密既聲線
uncle?邊位呀?
冇人識你喎
「肥康，似乎有d怪野發生，我番去搵蓮姨先」
「好咁我都去搵下呀力係咪度先，今晚約齊人黎呢度開會...不見不散」