步出學校,岩岩就開始日出,時間過得好快
但肥康拖住沉重既身驅睇落有d唔妥
「肥康!做咩呀,失戀呀?哦!唔通你既miki同呀力孤男寡女共處一室,驚有損失所以唔開心,係咪呢?」我同肥康半開玩笑
「你可唔可以收下聲呀」肥康突然好大聲咁同我講野
我同肥康靜左一段路程…
「sorry,我唔應該咁燥」肥康突然開口
嘩,呢個肥仔越睇越可愛,點算
「我都唔應該亂講笑既,係呢,做咩頭先係學校你全程都冇講野既…」
肥康又垂低番個頭唔出聲
呢個時候,身為一個好朋友靜靜陪住佢,已經足夠,佢會講既自然會講出黎。




「街市仔你有冇遇過一d比你厲害好多既人,你知道點都追唔上…」
「有呀..你咪係其中之一個囉,AL 3條a咁撚勁」
肥康苦笑左幾下
「呀力條件乜都咁好,高又高過我,靚仔又靚仔過我,而我偏偏咁努力既電腦都唔及佢…呢個世界係咪公平既呢?有時我係度諗既然有個咁勁既人,有個我冇辦法超越既人,咁我努力黎做咩呢?」肥康一氣口講左一大段好有感情既說話。
我一直以為肥康都係鐘意電腦既毒撚,對人既感情唔會話太上心,睇黎我錯估左佢,原來佢一樣咁有人性。
「咁你咁講法,世界上好多人都應該冇人生意義啦係咪?喂你勁我咁多,我係咪又唔應該有目標先」我稍稍安慰一下肥康
「一心以為有一個領域有我既專長,我既人生會稍微有d意義,有d改變,會唔會太天真呢」肥康憂鬱地望住太陽差唔多升哂上地平線。
「肥康,放心啦如果你有熱誠恆心,一定會超越到呀力既,我對你有信心」我拍一拍肥康既膊頭。
「街市仔,你條友好心咪扮心理治療師啦,真係好噁心呀」肥康似乎復活過黎,又一副開朗既臉容。
不過真係估唔到,肥康都會有咁既煩惱,睇黎呀力既超班實力一直困擾左佢好耐,可能見到自己既作用開始變為一隻可有可冇既卒仔,有d覺得自己被忽略。佢又真係諗多左既,起碼我都未咁諗先啦。






一番到屋企,我就死蛇爛鱔咁攤在係梳化果度
「久違既屋企呀,等我親吻下原始屋企既體味先…」爭在未痛哭淚流
一恰就恰左幾粒鐘,直到老豆老母番黎
「快d起身執乾淨張枱啦,呀蓮兩公婆一陣過埋黎食午飯呀,整到咁亂失禮死人咩」老母一記喝罵將我整醒左。
真係好唔習慣,呢個蓮叔,到底係乜家伙,當你身處係一個你冇記憶既世界上面,你係唔會明白果種奇怪又唔知點好既感覺。
食飯既時候,蓮叔叔仲好親切咁夾舊雞屎忽比我
「街市仔,我知你最鐘意食舊雞羅友,但千其唔好用羅友諗野,哈哈!」
連我鐘意食雞羅友都知,呢個蓮叔實感好似仲大過我。




慢慢,我好似接受左蓮叔呢個人…
人係咪有資格去控制歷史呢?世界應唔應該由人去控制?一個人既存在應唔應該由人去決定? 現今社會,生死尚且唔能夠輕易決定,好多國家都廢除左死刑,如果由歷史控制器去消去一個人既存在,又算唔算係殺人呢。而創造一個人會唔會取締左神既地位? 我帶住好多好多既疑問番左入房。


攤左係張床度,久久未能入睡,又係既,頭先食野之前都訓左幾粒鐘,依家好難訓番嫁喇。
望住已經冇左hdd既電腦
「唉,近排太多野諗,好想上高登排解下果種咁既鬱悶感」
唔係喎,幾個月前肥康好似送左隻舊hdd比我得閒做back up,雖然話得百幾Gb,但依家都可以用住先既…
經過一輪裝嵌,我已經成功搞掂。
其實我放左d咩入去已經冇咩記憶,可能係save低d game呀,歌呀諸如此類既野。
唔係喎!可能會有back up我果張病毒wallpaper?
我翻轉哂所有file,wallpaper我搵到你喇!!!...就奇,window 預設果d就有…
灰心下我又上高登
歌仔都有得唱啦 「一開心上高登,不開心上高登…」
「msn過不了春季….倒數65日」




唉msn 咁快就要收皮,話哂都用左咁耐,好似已經變左一個習慣


我打開好耐都未登過入過既msn,睇下仲有幾多人online
咦?!
係老死果行friend list點解多左兩個人我係唔識既
[email protected]
[email protected]
呢個兩個係咩人黎嫁,我真係冇記憶,我連幾時加佢地都唔知,冇印象…
我慢慢去搵呢兩個係咩人黎
我試下打開呢位呀樂同呀雯既對話紀錄,裏面又乜都冇,好奇怪…
再碌落去睇下 「低b同學會」?!
原來有我同呢個lok同man有共同既m群!而m群裏面總共有四個人?!
包括我---街市仔,肥康,樂,雯(以上係m群係匿稱)
如果大家有玩過msn既m群都應該知道,m群係有得翻查番對話紀錄。




我立即就禁對話紀錄黎睇
一開之下,最早已經係兩星期以前
呢個神秘既呀樂放upload左一幅圖,就冇任何既對話紀錄
我click入去果幅圖見到有條link,我跟住條link係網址果度打
只係彈出一句
「this file cannot be found…」 見到呢句野真係有d納悶,到底係咩黎呢
我再睇下msn 入面d file,發現我同呀雯開左一個共同file係已接受檔案果度,但入面又係乜都冇…


冇乜線索唯有打比肥康問下
「喂? 肥康心情好番d未呀」
「咩事呀?」
聽落把聲,肥康已經變番以前咁樣,真係好,如果佢又係咁沮喪我真係唔知點算好喇。
「咁既,你對低b同學會呢個m群有冇印象」我直接到達問題既核心
「…」




「記唔記得曾幾何時你入過呢個m群?」
「一瞬間好似有d印象,但又好似唔知咩黎」肥康回答
「我就真係冇印象,但呢個group只有我,你同埋一個呀樂同一個叫呀雯既人係度」
「呀樂同呀雯?!」
「你有印象?」
「完全冇,如果呢個係同學會,咁呢個group有我同你,姐係佢地有可能係中同黎,但真係冇記憶…」
「唔通del “0406“file del到連自己既記憶都冇埋?」我有種預感
唉呢獲真係大件事,仲唔知會唔會唔記得埋其他野添嫁…
「唔排除有呢個可能既,不過點解全世界都唔記得蓮姨同呀力,而我地又記得先?」
諗諗下又係喎
「如果記得d唔得記d都弊啦」
「我諗到喇,一係你去搵下畢業相,如果佢地係中同,咁應該會影到佢地,如果佢地真係del file而消失,咁就應該搵唔到佢地,我估係咁」
肥康雖然冇呀力咁有推理力,但佢有時諗到既細微位,我估呀力都未必諗到
「肥康你真係醒爆,我相信你有能力同呀力去到不相伯仲既境界嫁!」
「咪傻啦,收線喇,我要訓訓,有野再搵我…」