假期既學校,真係好少人,我地可以話將學校變成我地另一個基地…
當我見到呀力既時候,發現miki已經趴係電腦枱上面訓到天昏地暗
「hi,你地好快腳程喎,miki佢捱左好耐喇,佢真係不眠不休咁去解密嫁,唔好嘈醒佢比佢訓下先,基本上大部份解左密既檔案都已經翻譯哂」呀力微笑咁講
「呀力,你話你有新發現喎,有咩料到?」我已經急不及待
「最明顯係呢一樣野…」呀力將佢mon移一移向我同肥康果邊
“lapallo 113213”…
「你地應該知咩事啦」
「點解會咁…即係有人又改變歷史多一次?!」我託異地問
「仲有一個問題係,點解file仲會更新既?唔係話已經好似冇左連接,唔會再有file出黎,file亦冇改變既咩」肥康問道。
呀力掃一下前面既劉海




「我都以為係咁,但見到呢個改變,我就係度諗,會唔會係呢個file依然可以睇到歷史既改變,但係就失去改變歷史呢一個功能」
「咁都有可能既,但我真係注意唔到歷史對依家有咩影響」我望一望窗外既景色。
肥康立即回應
「一係我地既記憶都改寫左,又或者佢改寫既地方好細微,對環境既影響少之有少,又或者影響既地方唔係香港都唔定…」
肥康敏捷既思考令呀力好似有d欣賞
「大隻康講得岩,不過篡改記憶只有一次機會,我諗咁麻煩又咁荀既野,個改寫歷史佬應該唔會咁得閒逐個改既」
「係呢,你仲有冇咩其他新發現」我問呀力
「講埋呢度先,頭先為左證明呢個file冇影響力,我做左個大膽實驗」
「唔係掛,你去改data定del data?」肥康驚問
「兩樣都有」呀力例牌笑容又出馬,唔通佢認為呢個人畜無害既笑容可以為佢帶黎暢通無阻既一切???




「你真係夠哂薑,你唔驚del哂d野,你又會消失咩?你下次玩d咁野唔該先出聲,比時候我寫遺書都好丫大佬,靠害咩」我一面頽氣咁講
「街市仔,比你寫遺書都冇用啦,你消失左冇人記得你,遺書都冇嫁啦,我相信呀力咁做係因為佢覺得唔會有影響既機率好大」肥康幫口道
「其實我有8成覺得係唔會有咩影響,果然結果如我所料」呀力又裝傻扮懵諗住蒙混過關。
大佬!咁姐係有2成機會世界有可能改變喎…
「唔好怒氣住,反正唔做都做左啦,睇下呀力試到d咩仲好啦」肥康又幫口
「當我去嘗試改data既時候,佢會自動回復番原來既data,即係唔容許我去修改,睇黎要改寫既話果d “鑰匙”就係關鍵所在」呀力仔細分析
呀力對番住個螢光幕
「最後一樣野,我覺得係比較有用同比較耐人尋味既發現係….我搵到一個好特別既txt檔案」
「係咩黎??」我同肥康同一時間問
「呢個檔案寫左鑰匙持有者既資料…」




咩話?! 姐係”歷史控制器”真係有超過一部,呢個真係好大既衝擊
「咁呢個持有者有d咩資料留左係度?」肥康問道
「呢度有一個應該係歷史控制器發送訊息既地址,如無意外呢個應該就係控制器既位置」呀力開左果個已經破左文字解密既txt出黎
「黃大仙…..xx樓」
「唔撚係掛,有冇咁岩得咁橋,你估拍戲咩大佬」我已經驚呆到有d語無倫次。
因為呢一個地址正正就係我同肥康起到果個可能係呀樂既地址
呀力見到我地反應咁大就問我地咩事
我同肥康就將係我地離開學校之後遇過既所有野,同埋分析到既所有野講哂比呀力知。
「原來發生過d咁既事…睇黎呢個呀樂值得研究研究,我一早已經預左會有咁既情況,所以我已經帶左d正野黎」呀力係電腦櫃果度搬左d野出黎
偷拍鏡頭…即棄手套…超小型米高峰…單邊耳機…萬能匙…
「嘩!做過賊啊呀力你?」我睇到咁多咁專業既道具,完全o哂咀,心諗做乜鳩
「其實我一直想扮私家偵探好耐嫁喇…哈哈」呀力拎左副眼鏡戴起左,然後唔知係邊度拎個煙斗出黎咬住。
「你唔係諗住就咁就去黃大仙果棟樓掛?」肥康眼都凸埋
「當然唔係啦,你地兩個邊個跟埋我去?」呀力咬住個煙斗真係令人將佢個煙斗一野塞落佢個死人口度
我望一望肥康,肥康又望一望我




「街市仔,你跟你老豆好似學過太極拳,世界和平既重任就交比你喇」
呢個時候,我明白咩叫友情,情與義,值千金….唉
「咁基地指揮總係要有個人擔當,等我勉為其難黎幫你地啦,呀力街市仔加油呀!」
跟本得佢一個人講哂
呀力係呢個時候一野拍落我膊頭度
「街市仔估唔到你識功夫嫁喎,一陣潛入佢屋企果陣,睇黎你都可以大派用場」
我望住肥康既身形,如此之龐大,走佬起上黎應該第一個就會比人捉住,無可奈何之下唯有去馬啦
「其實hack佢部機咪知部機收藏左d咩秘密囉,洗唔洗搞到我地好似特務咁呀,拍戲咩」我忍唔住要發下牢騷
「其實我已經做左,但裏面乜都冇,正常到好似新機咁,係咪好唔正常先,我認為呢個地方點都值得一去」呀力笑道。