電腦無啦啦多左d唔知咩既檔案係度(上): 第三十七節

既然手頭上都冇咩可以參考，咁唯有真係要係呢幅圖度花d心思…
雖然感覺上冇咩可以期待，但始終得番呢一樣野我地係可以做到
我係肥康手中拎左幅圖黎睇，個背景真係果座山，呢個角度我回望左好多次，果陣離開座山既時候，每行一段路我就會休息下，擰番轉頭睇下行左幾多路，真係化灰都認得…
「肥康，係我印象裏面，我冇見過呢個位有尊咁大既佛像喎」我見到河岸邊有一尊好大既佛像係度，到底有d咩含意呢?我真係諗唔明，我真係冇咁好聯想力
「我地點都要親身去一去嫁喇」
肥康係佢果個扎西德勒既糌粑袋仔，拎左本地圖出黎，我諗呢d咁既野都係呢一兩日佢係附近買
我望左本地圖幾眼，好快就搵到岡堆鎮既位置，我諗果座山應該係呢一頭，因為我之前遇到既呀秋，佢老母話過佢住既地方就係岡堆鎮隔離
「丫係喎!其實唔洗煩，我打比呀秋咪得囉」我係銀包取出呀秋果張卡片出黎，打左個電話比佢
佢話後日啟程，而且可以載我地三個去佢屋企，順便請餐家常便飯都好…
但我地呢一兩日都唔係無所事事




我地有再去沙拉寺睇多次幅真正既原圖，但感覺冇咩特別，同手機影差唔多，呢幅畫睇落有少少殘同黃，話哂都擺左好多年，算係保養得唔錯，呢卷畫野就咁就收埋左係倉庫角落既一個木箱裏面
雖然此行無功而還，但我地順道都預備左唔少野
既然要再入虎穴，丫唔係，係豹穴先岩，我地一定要作好準備
其實都冇咩可以準備，我地決定帶幾枝粗棍同帶定d生肉黎旁身，雖則作用不大，但聊勝於無，有好過冇
整頓好之後，我地就出發去呀秋屋企
半日既車程，話多唔多，話少唔少，我地三個都顯得有d不安，好清楚我地做緊既野同玩命無乜分別，不過如果唔咁做，肯定返唔到去未來
顛顛簸簸既旅程，我地都無暇分心去欣賞西藏塞外既好風光
黎到呀秋屋企，事隔一個禮拜，景色依然
而小麥田果邊已經有個身影揚下揚下
原來老婆婆向住我地揮手，於是我地三個就去左屋裏面休息




時間上面，依家大約係晏晝三點幾，我地諗住直接出動，但入黑之後可能會有d危險，被呀秋相勸之後，我地都決定留宿一晚，聽日一朝先上山
係出發之前，我有將d生肉醃製過，係晚飯既時候有拎出黎加料，所以可以呢一晚都可以算係大魚大肉
食過晚飯之後，我拎部手機出黎比呀秋睇下張圖，問下佢對呢張圖有咩意見
呀秋佢話比我聽，好耐以前的而且確有尊佛像擺過係果個位，但後來日久失修無人打理，所以政府派人拆左佢，依家唔再存在嫁喇
聽到呢個消息，我地都幾納悶，因為有可能都係徒勞無功，最後返唔返到去未來既香港都係未知之數
當晚呀秋既兄弟都係隔離鎮，佢地係果邊都有宿舍可以住，偶爾先會番黎食餐飯，所以我同肥康就暫時訓住呀秋細佬果間房，而suki就自己獨霸一間房
到左第二日既朝早，因為呀秋有事做，所以就冇再送我地
我地再三番四次道謝後，就直接出發行去果座山