沿途又要行崎嶇不平既石仔路,再者今次仲要帶住身驅笨重既肥康同埋弱質纖纖既suki,所花既時間比我之前挨住餓咁走仲耐一倍有多
幾經波折,我地終於黎到果張畫所示既視點,我手機開幅相出黎同我望到既景物比較一下,所有景物都幾吻合下,包括係遠方,再行多幾公里就到果座山,最大問題只係冇左座大佛像
「我地下一步應該點做好呀?」我按壓住小腿一路問肥康
但肥康有d上氣唔接下氣咁樣,一路拎手帕抹汗,仲喘緊氣咁
見佢咁辛苦,我唯有再拎部手機出黎睇多次幅圖
Suki亦都哄左上黎
「會唔會同佛像既手勢有關係呢?」suki 指住圖中果尊佛像
不過講起又真係有d怪,個尊怪佛像曲起隻手,又唔係舉直哂,舉到一半咁樣仲伸直一隻食指,咁係咩意思呢?」我低頭思量
肥康抹完汗好似舒服左好多,佢都拎起手機同我地一齊望果幅圖
「會唔會係指住上面,即係就叫我地上去,玩天空之城?定係學海賊王玩空島?」我打趣說道




「你唔好再發嗡風,你知唔知你無厘頭得黎又成日開口中嫁」肥康微愠既眼神望一望我
「講下笑姐,咦!我好似察覺到d野」我個心卜卜咁跳
「係咩特別野?」suki 見到我神色凝重左好多
「我岩岩無聊係度諗幅畫個時間,有d西斜,我認為係大約四五點左右,你睇下尊佛像有咩特別」我示意suki留心望住幅圖,而肥康都一樣好仔細咁睇住個佛像
「舉高左隻食指囉,應該最特別係呢樣」suki側起個頭都係滿腹孤疑既樣
「哈哈,你留意下,個佛像冇影嫁」我好自豪咁講呢句野出黎
「冇影又有幾特別喎」suki扁起個嘴以為我玩佢
但肥康好似即刻意會到我講咩
「冇錯係好奇怪,遠少少既樹都有d黑色既影子,呢幅圖處理光暗位都好精確,偏偏就係呢個佛像冇影,一定係有d野,你摩擦力又幾強」肥康用拳頭捂住下唇
「會唔會個影就代表d咩?會唔會係指住某個方向?但依家冇左尊佛像咁咪唔知咩方向囉」我輕輕問道




「區區影一個姐,其實好易搞,你去佛像果個位跟住做呢個動作咁咪知道個影指住邊到囉」肥康咧嘴笑道
「最醒就係你,你真係已經同呀力一樣咁鬼勁」
肥康冷笑左一聲,我過我睇得出佢心底有d開心
雖然諗到方法,但我地都唔係即刻去做,因為照幅畫既時間黎睇,我地仲要等多好幾個鐘先會有西斜既太陽光線
休息左陣我地就向住佛像個位走,行左一個鐘就差唔多到左果個位
呢個位之所咁易比我地搵到係因為雖然大佛搬走左,但個底基檯並無移走,由得佢就咁留左係度,檯上都封哂塵,成吋舊咁濟,顯然真係好耐冇人黎過呢度
休息到四點幾,我就走左上去檯上面,跟住佛像個動作黎做,影子隨我身體擺作而伸展,當我舉起食指既時候,影子裏面既我正正就係指住隔離果座山…
「仆你個街,搞咁多野原來都係果座山…」我有d覺得被玩既感覺
「唔好勞氣住,雖然話指住座山,但係個位有d奇怪,好似係山既背後」suki望到我影子指住左山後既一個位
「可能你個影唔夠大,所以睇唔清個位,不過應該都係山後無錯嫁喇」肥康單手遮眉遠眺對面既果座山




「事不宜遲,拿拿林過去對面睇下有咩料」我已經急不及待就衝去果座山,而suki同肥康亦跟貼我而跑
黎到山後面,感覺都係冇咩人行既路,周圍都係雜草
突然肥康指住一舊半身高既奇形怪狀既石頭
「你睇下舊怪石,會唔會係咩記號」
石既側邊都係雜草叢生…
我係石既側邊拎出我碌粗棍左撥右撥
「唔係喎,你地快d黎望下,呢度有d野」
我撥開左d草之後,肥康同suki都走左埋黎,我地見到有石級,仲好明顯係人工咁一級一級砌上去
「呢獲掂喇!」我地三個歡呼左一聲
天色漸暗,雀鳥都回巢,d雀仔都係咁叫,但我地冇理由黎到呢度就咁快番去,所以決定都係上去探個究竟先心息
發現左呢條秘度之後,上山既路亦都易行好多,但呢條秘度真係好難搵呀,兩個人拍住咁行已經逼到咩咁,我諗佢係預一個一個咁行上去,不過諗番起果日我行得咁辛苦先落到山,點知原來係有路落山既,真係好戇居
行到山既一半,我地都諗住休息一下先,天空已經隱約有d星星可以見得到
山腰有一個平地可以比我地坐係度,我就背後既背囊度拎左d琴日入貨既乾糧出黎,分比肥康同suki一齊食。
「希望唔好遇到豹啦,上次真係嚇到老母都唔認得」我咬左啖餅乾
「你條友丫,都叫你唔好講咁多野,萬一真係開口…中…」




講到黎呢度,肥康既聲音戛然而止
我望去肥康望緊既果個方向,兩顆金色小圓點既野好似閃左野
「肥康,suki,對唔住我唔應該講野嫁,其實我兩日前search過google,好似話只要乜都唔做慢慢後退,佢就唔會撲出黎,拿,依家我幫你地殿後,睇住隻野,你地慢慢落去,如果一有乜依郁,我會幫你引開佢」救到女神suki既話,就算犧牲我條命我都冇所謂,唔知點解有d感受到昔日黃花崗之役為革命就義既烈士心情….
Suki雖然驚到震得好勁,但佢依然唔肯離開我
「咁難得先可以同番你一齊,我打死都唔會走」佢用力捉實我既衣袖
「拜託你喇肥康!」我唯有拜託肥康幫手拉開suki,我諗肥康呢個兄弟唔會係襟兄弟掛,就算我真係瓜左柴都唔會食左suki掛,我腦海閃過無數既念頭,以前讀書都冇諗野諗得咁快…起碼保住佢地兩個先,佢地兩個手腳咁鬼慢,實做隻豹既晚餐,唉!~
「走!」我用力推開suki,然後拎起背囊入面既肉,同埋拎起枝粗棍擺好架勢,以防隻豹失驚無神衝出黎
Suki比肥康捉住慢慢退落山下面,而我卻慢慢靠近隻豹,同佢保持大約十米既距離,隻豹雙眼眨左幾野,但依然冇行動
睇見suki同肥康落左山一段距離,我都諗住退後落山,點知當我一吞後既時候,隻豹唬既一聲咆哮,就跳左出黎
我將舊肉掉到佢隔離,佢聞左兩聞,又望番住我
唔通佢唔肚餓?奶野喇呢云真係…