我行左入去呢座唐代建築入面,我摸下周圍,裏面無封哂塵,應該有人時時勤拂拭,莫使惹塵埃…
樓底好高,天花有好多唔同既柱交接,真係有d似遊緊佛光寺
但裏面明明一個人都冇…大殿裏面亦都冇佛像係度,如果有佛像應該會有少少反光既野
我摸黑穿過大殿行左入去,完全唔見有任何既人
唔知點解有種好詭異既感覺,就好似身邊其實應該有人,但自己就完全睇唔到咁…但呢種感覺轉瞬即逝,我又唔驚鬼既,冇野既
推開裏面一扇門,眼前為之一亮
但明明冇燈,但呢個設計可以令到頭頂上既月亮巧妙咁由窗口照到入黎
係微弱既月光底下,我見到一部大牛龜放左係一張木檯上面…
大牛龜梗唔係一隻龜,而係一個CRT mon,即係以前大大部果d螢幕,mon下低有部細細既主機
「咁唔match既喂!......」因為呢度都幾空曠,所以聽到自己既回音




我行左埋去呢部主機果度,仔細咁打量
好似小學學校用果d機,我有呢個咁既感覺
唔係掛?!山卡啦地方都有電到既咩?
主機後面亦都有插住電線,但條線好長唔知駁左好邊,因為佢穿左出房出面,係山上面唔會用太陽能發電咁趣緻呀嘛?
我試下搵鍵盤同滑鼠,但唔見有…
有冇搞錯,有電腦有mon,但係冇mouse同keyboard,你係咪搞gag?
手多多既我用右手禁著部主機,手左我依然冇哂知覺,但我一於少理
主機燈即刻不斷閃爍…唔係掛?真係有電咁霸氣?
當我禁著埋個mon既,只見黑底白字不斷掃上,唔知run緊d乜野…我由佢load左一陣都好似未load完咁款,我打算出番去繼續探路既時候,出面傳黎腳步聲…
「邊個?!」我大聲吆喝




冇理由,呢度明明一個人都冇,唔係咁邪呀嘛?呢個明明唔係鬼故
我明明關埋左既門慢慢咁打開,咯吱咯吱既聲音係耳邊迴轉
「仆街喇,撞鬼喇!」
當我講完呢一句野既時候,門後出現左一個人
係就係鬼,不過係個鬼佬
呢個鬼佬身高六呎幾,個樣好老,你同我講佢有一百歲我都信,雙眼非常攝人,就好似可以將一個人既魂魄一野就取走,著住一套好稱身既老西,行埋黎
「hey,yo man,how are you? I’m fine」我嘗試用英文同佢鳩嗡一通
正當我想講埋nice to meet you之際,佢竟然講中文
「街市仔係咪?」呢個鬼佬老伯面露笑容
呢一刻我心中一震,點解佢會知道我個名?同一時間我醒起…bernando…




「bernando先生?」
「係,我就係bernando」鬼佬老伯又乾笑左幾聲
「到底…係咩一回事?」我已經唔知依家係咩處境
「點解…」
「本來同你一齊黎到呢度既呀樂依家比我送左去香港,你係咪都要番去香港?」bernando好和藹可親咁講
「咪住先,可唔可以解釋下呢家係咩情況先?」
「唔知你想知道d咩呢?」
呢一刻,我完全冇諗過bernando會係呢度出現,太多太多既問題即刻湧上腦,等住要問呢個lapallo既始作俑者
「首先,點解你會出現係度既?」
「因為你開著左部電腦,所以我就出現係度」bernando走左埋黎搭住我膊頭帶我左我去房既一邊,果度有一排有椅墊既木椅坐低
坐低之後,bernando開始講
「等我諗下點樣解釋比你聽,簡單d黎講,我係果部電腦創造出黎既人,我諗唔應該咁講,我係lapallo做出黎既…」
面對如此驚人既答案,我只能瞪堂結舌咁對住bernando
「你應該知道咩係lapallo,lapallo係一個控制歷史既工具,同時亦係歷史既意志本身」
「歷史意志?」




「冇錯,歷史佢係有意識,每當人類做出一d違背法則既時候,佢就會運作調整」
「調整?」
「例如將控制歷史既工具交比人」
聽到黎呢到我有d驚恐既感覺,唔通lapallo已經比好多人用過?
望到我迷惘既眼神,bernando好快就知我想問咩問題
「的確,由人類歷史演化進程至今,有好多人已經改寫過歷史…」
我吓左一聲,呢個答案雖然我一早已經咁諗,但估唔到由bernando口中爆出黎會咁有震撼力
「以中國歷史咁多朝代為例,好多皇帝都係author,每個朝代都會有人改寫歷史,果d咩開國明君,好多都係靠改寫歷史而令自己做皇帝…」
我聽到黎呢度我覺得好奇怪,有咩怪呢
「佢地用電腦改寫歷史嫁?」
Bernando打了一個哈哈,皮笑肉不笑咁講
「歷史控制器會變成最適合既形式出現係author面前,以前既皇帝就係用竹卷黎改寫…」
我幻想到如果咁多字要用竹卷黎寫既話….
「哈哈,你講得冇錯,所以佢地有d人會用更好既辦法…就係抹消歷史…」
聽到呢度我有d不寒而慄既感覺




Bernando所提及既快捷抹消方便係歷史上的確好多人會用,秦朝時代既焚書坑儒,甚至係元朝時既屠城,文革時候既批鬥,佢地摧毀左好多文化遺產,甚至係歷史,我地依家所睇到既所謂歷史,好多都已經變哂故事,因為已經冇乜文獻可以追溯,你睇下史記,由上古時代黃帝時代去漢朝都好,都係司馬遷所作番出黎,司馬遷冇錯佢寫史記係好嚴謹,但係都係從前人口述歷史黎記錄番黎,好多野都係從一d文獻裏面去知道,但佢本人係未見過,所以真實性都唔係話高得好緊要。
「其實改歷史,任何人都可以做到,但要改到符合歷史意志就好難…」bernando 嘆左口氣
我細細咁咀嚼呢句說話既意思
點解人人都可以改歷史?事實上,共產黨做既野一樣係改變歷史,六四屠城,可以改寫成普通既暴動事件,抗日既時候,共產黨話國民黨冇份抗日,只顧安內唔攘外,同樣國民黨又話共產黨唔抗日,自己邀哂功,甚至你話日本,佢地一樣改寫歷史,話冇南京大屠殺既出現,證據係偽造…

到底…咩係歷史? 定係比在上位者用黎蒙騙世人既小說….
手臂上既痛楚開始蔓延到我個腦袋…