翌日下午,我又不留下一片痕跡離開Stephanie既房間。

已經喺Stephanie房間渡過許多刺激浪漫既晚上,大部份情況我都係瞓醒就走。

從來無我既個人物品留底,好似酒店Check out既情景。

呢個地方唔屬於我地,而係Stephanie。

你還你,我還我。




我同Felix順利去咗印刷舖頭落訂,仲買咗部份遊戲物資。

就喺準備離開一齊返Hall既時候,Felix同我講,佢女朋友Janice都喺旺角,諗住搵佢食飯拍下拖,叫我自己返Hall先。

「佢係果度,我地打個招呼。」Felix指住企喺某電器舖既。。林敏兒。

「。。。」我黎唔切反應。

仲未做好心理準備,已經行到去林敏兒面前。



佢淺啡色既頭髮紮咗鬢辮,著住純白色斯文鬆身背心同埋牛仔短褲,感覺乖巧又不失女人味。

「我Hallmate,佢叫書生。」Felix拖住林敏兒,同我介紹:「我女朋友Janice。」

「Hi.」我控制住表情,用最平淡既語氣同林敏兒講。

諗住唔care,無曬Feel,但當初傷你既女人企起你面前,原來內心都係好激動。

好想知道佢過得好唔好(睇佢同細個一樣咁靚,讀Law,又有Felix呢個好男友,應該過得幾好)。



好想知佢喺同我分手之後,拍過幾多次拖。

又好想知道,佢心入面仲有無我存在既位置,到底我係佢既初戀,定只係不堪回首既黑歷史呢?

實情係,No one gives a fuck。

這只是我一個人內心上演的獨角戲。

「Hello.」林敏兒同我扮作互不相識,好有禮貌咁打招呼。

「我返去先啦,唔阻你地拍拖。」講完再見我就急急腳走。

我唔想逗留喺呢個環境太耐,我既表情Hold不住。



即使眼前呢個人已經變到陌生人一樣,我卻不能當無事發生過去面對林敏兒。