《精武．黑俠》: 第四章：心戰

當我還在床上看著天花板等天光的時候，電話忽然一震，原來是收到振聲傳來的短訊。
「有發現，速來。」
看過訊息後，我便起床梳洗，數分鐘後便已換好衣服出門。從家開車到振聲家需大概一小時，幸好早晨時份路上尚算暢通，開盡油門，只需半小時便已到達。
我一到地牢，便急不及待問：「咩事，發現到啲咩？」
「你估得無錯，真係有料到。原來班學生見完社工之後，全部都係轉介咗去同一個心理醫生到覆診。」振聲盯著屏幕說。
「咁佢係邊個嚟？」我問道。
振聲從google chrome搜尋一下，便將那心理醫生的檔案顯示了出來：「Ken Kwan 關偉和，42歲，香城大學臨床心理學博士，香城心理學會院士，曾任醫管局轄下醫院任職臨床心理學家，現為私人執業。」
振聲接著說：「咁奇怪？私人執業但係學校會照pass啲case俾佢跟？佢應該收得唔平架喎照計。接埋啲學生case又唔會幫到佢上位，佢又唔係要儲經驗，我諗唔到有咩原因佢會接呢啲嘢嚟做。」
從屏幕上關偉和的照片上，他已散發出一種一看便知不是好人的氣息，我說：「我諗而家大家都同意，呢個人係有啲唔妥啦，要知道背後佢究竟同學生自殺有冇關，我地就要去搵吓佢先知啦。」
此時電話「叮」一聲響起，收到突發新聞的通知。




「恐慌！教育局局長寓所遭打劫！」
我馬上叫振聲將電腦轉去新聞網站。
「昨晚凌晨時份，有賊人闖入教育局局長胡克勤寓所內，擊暈五名保安，襲擊局長，並劫走約二十萬財物逃去。」網上新聞的頭條專欄寫著。
振聲笑著說：「呢條友都算醒目喎，報完新聞通咗我地天，但又識講我地係賊，自己就企喺高地，咁樣想迫我地出嚟都易啲喎。」
「佢咁做係想通知佢啲同黨有人搞緊佢，叫佢地做好準備。佢知道我地無咁快搵到哂其他人出嚟，咁樣就變相俾多咗時間佢地去做嘢。我地而家係同緊時間競賽。」我雖然看似一無畏懼，但心裡我其實亂得很，面對這般的困境，我們根本分身不暇。既要去調查關偉和，又要找出背後到底有何人。
我突然想到一個方法：「振聲，幫我book個時間，我要去見一見呢個關偉和，我決定今次用陳真呢個身分去會會佢。至於你就喺到儘量準備好裝備，我有預感好快我地就會有一場大戰。」
「Right here for you, Mr. Wayne.」振聲開玩笑地說。
我也笑了：「我好似無見過Alfred都要出動架喎。」
振聲說：「梗係有啦！咪去救Batman嗰陣囉，你唔好要我救你添呀。」
我同振聲也開懷大笑，也算是行動前一種先放鬆心情的方法。










關偉和的醫務所位於高級商業區，呎價不菲，看來他的薪金都應該不少。
到了醫務所的層數，走進去後先見到光亮的大堂，旁邊是招待處，坐著兩位樣貌標緻的接待員。
「早晨，我姓陳，BOOK咗十一點見DOCTOR KWAN嘅。」我禮貌地說道。
接待員看著我微笑一下，便低著頭開始按著電腦：「陳真係咪？」




她見我點一點頭，便吩咐我在內堂的梳化上坐一會。
不用五分鐘，她便揮手向我示意，叫我進去咨詢室。
一開門進去，裝修簡潔整理，玻璃架上放滿了證書獎狀，實在難以讓人質疑其專業資格。
關醫生先托了托他的幼框眼鏡，對我揚手說：「陳真陳先生呀嘛？請坐呀。」
我到了他辦公桌旁的皮質躺椅上徐徐坐下。
關醫生接著說：「陳先生係有啲咩唔妥？有唔妥嘅可以盡情講哂出嚟喎。」
我把我預先GOOGLE過的抑鬱症病徵說出來：「醫生呀，唔知點解呢，我FEEL到我自己真係好唔妥，我會郁啲就發脾氣，有時又會無啦啦個人心情好DOWN，好想喊嗰種，我真係唔識得去控制，我仲試過掟爛哂屋企啲嘢。仲有我成日都訓唔著，個人成日都好攰咁。」
關醫生一直拿著筆在寫下我的病徵，過了一會後便開口：「陳先生，我初步就認為你係患上咗抑鬱症，不過就唔需要太過擔心嘅，呢個病如果處理得好，係有得根治嘅。嗱你而家慢慢訓低先，我地了解吓點解你情緒會咁低落先。」
關醫生嘗試用言語技巧去引誘我說出原因，不得不承認他套人說話的技巧的確不錯，可是我根本沒有甚麼低落的原因可言。
一陣對話過後，我漸漸打開新的話題：「醫生，你估我會唔會好似班學生咁走去自殺架？」
關醫生沉默了一會，接著說：「咁班學生之所以自殺又唔完全係因為抑鬱嘅。」
我偷瞄了他一眼，發覺他竟面露一絲不應該出現的笑容，氣氛亦因此而變得不尋常。
我問道：「咁仲可以有啲咩因素架？會唔會我都有埋架？」
關醫生察覺到我一直望著他，便收起了笑容，伸出手來看一看手錶，看著我說：「對唔住呀陳先生，今日我地已經夠鐘啦，如果你需要多次咨詢嘅，我寫返個覆診週期俾你，你可以出去搵返姑娘約時間啦」
他已知曉我想反套他的說話，想不到他原來亦是個頗為攻心計的人，看來這次我終於遇上對手了。




「好啦好啦夠鐘啦要食飯啦。」忽然有把熟悉的女聲從門外喊著。
關醫生應聲便走去開門並擁著門外的那位女子。
擁抱過後那位女子看了過來，露出了詫異的眼神，說道：「哥哥？」