黃鼠狼特務II 赤地(搬家原故,本站停止更新): 章四:烏有國度
凹凸不平的山路上,吉普車駕駛著,車裡坐住身穿迷彩軍服,戴太陽眼鏡的人.他見到前方有一團異物擋在路面上,便停下車子,脫下太陽眼鏡,果然鋪在路面上的是鐵釘,如他預料的一樣.四看周圍確保沒有埋伏後,他才走下車,把鐵釘踢到一邊.回到主駕駛座上,一把鋒利的刀從後架住他的脖子————————
「唔想死嘅,就依我指示去做.將call機同槍交俾我.」
心裡焦急的軍服男還得保持鎮靜,依照指示把傳呼機和槍丟到後方,趁機瞄一下倒後鏡,後面那人戴著面罩,雙眼盯住他看,似乎在告訴他不要試圖反抗.
「開車去你要去嘅地方.」面罩人迅速把手上的刀替換成手槍.
感覺到槍管貼在頭顱的軍服男只好重新啟動引擎,面罩人身體躲在椅下,留下一只手用槍指住軍服男,以防他有機會反抗.
「你負責嘅係邊一層.」
「六...六樓C區.」
「Good.」
環形集中營 上午八時三分
吉普車駛到保安亭前,門衛看看坐在主駕駛座的軍服男後,便開啓閘門,讓吉普車進入.吉普車駛到地下停車場的車位停下後,面罩人立即把軍服男幹掉,脫下悶熱的面罩,露出本人的樣貌,是區可頤:「任務開始———— 」她把軍服男的迷彩軍服脫掉,穿到自己身上.偽裝成守衛後,她把屍體搬到車尾箱.
為了這次任務,區可頤剪了一頭短髪以配合偽裝.可是不合身的裝束總令她感到不自在,
「我到左呢度嘅停車場.」她輕聲跟張穎琳説,並看看牆上的閉路電視:「See me?」
「睇到.」張穎琳從駭入的閉路電視畫面看到區可頤:「只有我睇到.」,區可頤從步姿,神態上都盡量模仿軍裝人員,複習好幾遍後,她才推開鐵門,混入環形牢房.
「Angela,我需要知道陳教授嘅特徵.」
「白色短髮,圓臉型,身型肥,㩒紅色指甲油.」
「Oh....」張㯋琳嘗試從特徵找出目標,卻發現集中營裡所有被囚者也被剃光頭:「圓面嘅都有唔少,紅色指甲嘅.....未發現到.」
「唔緊要,我親自搵.」區可頤抬頭看看這七層高的建築物,再看看設置在中心點的監視塔.看來要展開一段艱辛的搜索工作————————————
-------------------黃鼠狼特務II 赤地------------------------
-----------------------章四:烏有國度--------------------------
------------------------------------------------------------------------------------------------------------------------------------------------------------------
顏影寒奄奄一息的扒在角落,他身上充滿種種被折磨的痕跡,瘀血,燙痕,甩皮.身體失去知覺的他,再感覺不到痛楚.
鐵門被推開,姜思傑被丟了進來,站不住的他失足摔倒,頭撞向地板.
「喂......喂....」顏影寒瞧向姜思傑:「喂........」,對方只是以瞪大的眼睛面向他,沒有其他反應.顏影寒唯有繼續持在角落,對住牆壁發呆.
「攞去....」姜思傑語氣虛弱道,他放開緊握的拳頭,露出藏在掌心的針筒.
「腎上腺素?」顏影寒不敢相信姜思傑拿到了這東西.
「我趁佢地唔為意....偷左少少返嚟....」
「真係得呢個方法?」
「你諗到其他咩?」
顏影寒握起針筒,看著裡面的液體碎碎唸:「都好.....可以瞓返一場好教.」,説罷,他朝手臂狠狠插,一股強大的力量從手臂肌肉分散至身體各處,所有知覺通通回來了,包括痛楚.
「佢地應該注意到喇,要盡快行動...」姜思傑望向牆角落的閉路電視.
「我地行喇!」顏影寒遞手向姜思傑,姜思傑卻動也不動伏在地上:「我咁嘅身勢只會拖累你,唔洗理我㗎喇......你走先....」
「你唔係要為你老婆報仇咩??」
「呢個係我唯一向你補償嘅方法......」
「時到如今仲講呢D做乜撚嘢呀??嚟啦!!」
「走呀!!」姜思傑用盡力氣撕叫著,又打走對方遞來的手.
顏影寒見況,留下一句:「你永遠都係黃鼠狼特務.....」,便離開牢房————————
區可頤路過一個又一個的牢房,被抓來的人不外乎是近年的失蹤人口.每一個也被吊在天花板,赤裸的身體帶有不少傷痕,眼神空洞,看似只剩下軀殼.看到此景,實在不敢想象他們遭受過怎樣的對待.
一股腐敗的異味傳到了區可頤的鼻子,令她不得不遮住鼻子,目光轉向傳出異味的那扇鐵門.
「我印象中呢度好似係幅牆嚟㗎喎.....」
「嗯....建築圖冇標註到呢間房,應該係後期加建嘅.」
隨著門被打開,裡面的景象讓區可頤打了一個顫抖———————幾個穿著保護服,戴口罩的人正在用水喉對血淋淋的屍體堆灑水,清洗乾淨的屍體會被丟到連接焚化爐的輸送帶.剛剛被丟到輸送帶的一具屍體.......正正是陳教授.
區可頤憋著呼吸,拳頭越握越緊,手臂青筋露現,她目睹陳教授逐漸消失在熊熊大火中,立即關上鐵門,讓自己冷靜下來.監視塔的守衛察覺到她有異樣,盯住她看.曝露的區可頤唯一能做的,就是跑——————————
----------------------------------------------------------------------------------------------------------------------------------------------------------------
她把92式手槍持在胸口旁,這是名為中心軸鎖定的持槍戰法,雖然準度會有所偏差,但碰到任何情況也可以快速應變,更有效地避免被奪槍的危險.
「情況有D棘手,佢地將所有出入口封鎖哂.」張穎琳道.
「可以hack入佢地系統?」區可頤邊說邊擊殺路上的守衛.
「閘門系統同閉路電視系統係獨立分開嘅,而且防火牆仲厚好多,以我嘅技術,格硬hack入去嘅話.....」
「會點?」
「IP位址會暴露.」
聽到這裡,區可頤愕住了.可是這是目前唯一的辦法.
「萬事小心.......」區可頤説:「我唔想再失去身邊嘅人....」
「陳教授....死左?」張穎琳猜道.
「嗯.....」
哀傷的氣氛令雙方也沈靜了一陣子.
「Angela...我會保護自己,唔駛擔心.」張穎琳關閉麥克風,開始駭入程序,一按下鍵,就像置身網絡虛擬世界,呈現在她眼前的,是由無數0和1組成的高厚城牆——————
幾個守衛搜挖著,誰也沒為意到躲在架後的區可頤.
「嘭——嘭————」槍聲響起,他們回過頭來見到兩個守衛的屍體.
區可頤出現把其餘守衛一拼幹掉.奪去他們的手槍,又一守衛從後用槍指著區可頤:「睇你走得去邊~」
「Your ass.」區可頤用槍打穿天花板上的水管,水柱湧出噴到守衛身上,她再掏起電擊槍來一擊,電得對方瘋狂抖動再倒下.
「呀!!!」前方三個守衛被擊飛至牆上,''啪''的一聲,脊椎骨看怕碎裂了.
區可頤看呆了,究竟是誰能有如此的破壞力?直至見到顏影寒的身影,方解答心中的疑問.
顏影寒解決眼前的敵人後,也發現了區可頤,從不合身的裝束和軍服上的血跡,看穿她並非這裡的守衛:「你係邊個?」
「想由呢度逃出去嘅話,你需要我.」區可頤道.
「乜話?」顏影寒乾笑一下:「係你需要我呱?」,他指指一堆被凍結的屍體.
「做人除左要有力量之外,仲需要有智慧.」區可頤用手指點點自己的腦袋.
「你究竟邊撚個?」
「話哂都算同學,咁都認唔出我?」
顏影寒覺得這種口吻似曾相識,好像是高照中學6A班某個討厭傢伙,不是好像,根本就是,6A班區可頤!
「哈哈.....Holly moly,竟然係你....」
「你份人如果成熟D嘅話你話幾好呢?唔駛好似依家咁,比人捉埋入嚟.」
「至少喺需要嘅時候我會企出嚟,唔係閃閃縮縮.」
區可頤瞧瞧來勢湧湧的追兵,再把目光移到顏影寒:「跟唔跟我走隨便你,不過我敢肯定嘅係你冇其他選擇————————」
--------------------------------------------------------------------------------------------------------------------------------------------------------
張穎琳關上電腦後,抬起放在櫃旁的汽油桶,把汽油倒遍各處,點燃打火機,倒在地上,任由火焰燒光裡面所有東西.她雙手緊握手槍,趕快地跑,卻被一個粗壯的大漢擋在路前.
「唔好過嚟!!我會開槍!!」張穎琳用槍指著大漢,雙手抖個不停,對方見到大笑起來:「哈哈哈哈!!我賭你根本唔敢開槍!!」
「萬一我真係開槍呢?你等收屍啦!」
「依家投降仲嚟得撤,我可以輕手D~」大漢一步一步迫近她————————
「啊呀呀!!!!!」顏影寒把力量集中到拳頭上,鎚擊地面,形成一道冰牆擋住敵人.他們殺出一條血路,途中若彈藥用盡,便拾獲敵人丟下的彈匣補充.由第五層殺到第四層,由第四層殺到第三層,第二層.
監視塔,一個守衛掏出狙擊槍,裝填子彈,瞄準顏影寒的頭顱,扣動板機的一剎那,區可頤及時把顏影寒拉到掩體後,顏影寒才逃過一刧.守衛氣得滿口髒話,氣憤同時,還不忘報位:「佢兩個喺二樓B區,有掩體.」
「Copy.」附近的守衛收到消息,立即往二樓B區進發,把兩人包圍————————兩人只好乖乖就範.
「嘭——————」一記槍聲震驚在場的守衛,監視塔的守衛被突如其來的子彈擊斃.數十個穿防彈背心的特務穿破頂蓋的玻璃跳下來,把守衛一一幹掉.區可頤和顏影寒啞口無言,對望一眼,搞不懂這些突然出現的人是甚麼一回事?
一位身穿藍色西裝外套,斜瀏海齊頸短髪的女士從特務之中步到兩人面前:「我知你地有好多疑問,不過我地唔係壞人,放心.」
「我都唔知講咩好...」顏影寒漸漸感到天旋地轉,體力透支昏倒.兩個特務隨即把他抬走.
「詳細情形我之後會向你地解釋,當務之急係離開呢度.」女士伸手遞向,示意把區可頤扶起.
「我地要點離開?」區可頤知道有追兵追來,要逃脫並非易事.
「我地飛.」女士道,指向頭頂上的龐然大物————————
引擎的聲音從雲層中竄出,隨著聲音越來越響亮,一架碳纖黑色戰略運輸機穿過密雲出現.顏影寒醒來後,看到圓形機窗外的雲朵,才發現自己身在空中.區可頤躺在圓形機窗旁邊的座位,看著窗外一片片白雲從眼前略過.
「我....瞓左幾耐.....」顏影寒走到區可頤旁.
「約莫四個鐘左右.」區可頤的目光專注在天空上,沒有怎樣理會顏影寒.
女士留意到兩人放空的樣子,便坐在他們旁邊,一同望向窗外:「從前,有個住喺唐樓嘅細路女,佢認為最開心嘅莫過於望住飛機由頭頂飛過.雖然其他居民都嫌飛機噪,但係對細路女嚟講,飛機代表自由.嗰個細路女嘅名.....叫藍曉玲,即係我.」
兩人把目光移到藍曉玲上,期待她的解答.藍曉玲又望向那群有説有笑的手下:「我地係''烏有國度'',一個唔受任何政治勢力影響嘅獨立情報組織.呢幾年嚟我地遊走世界各地,親眼目睹有權者向無權者嘅種種欺壓,亦見到敢向有權者反擊嘅勇士.自從你地黃鼠狼冒住危險企喺大街向公眾披露真相,我就開始留意你地,不過烏有國度作為一個秘密組織,行蹤要謹慎,加上當時局勢緊張,唔方便搵你地.」
「玲姐,我地將於十分鐘後抵達總部.」一名叫勇仔的手下告知藍曉玲道,藍曉玲見兩人疑惑的眼神,說:「我知你地唔會咁輕易相信我,不過我好有誠意邀請你地加入烏有國度.希望你地慎重考慮.」
顏影寒覺得諷刺,笑言:「一種大財團收購小商戶嘅概念?」
「隨便你,你想嘅話都可以咁講.只要唔好拎''冚家Link''同我地比較就得喇.」藍曉玲覺得這個比喻有點貶意,但還算可以接受.
時間:上午十時二十一分 地點:不詳———————————
四面環海的島嶼上,戰略運輸機慢慢降落至甲板,到達烏有國度的基地本部.
機艙門打開,依山傍水的美景映入眼簾,他們被山上流下來的瀑布吸引住目光.
「歡迎嚟到''來世''.」藍曉玲微笑說.
「你肯定呢度唔係伊甸園?」顏影寒從未見過這樣清澈的湖水,這裡簡直是文明城市以外的一片樂土.
「Pinky?」區可頤見到張穎琳正在欣賞這裡的風景:「你點會喺度㗎??」
「你朋友遇到危險,好在我及時派人救佢.」藍曉玲道.
「你冇受傷嘛?」區可頤跑去找她.
「冇~係佢地護送我嚟到呢度~」張穎琳攤開手,表示自己毫髮無傷.區可頤高興地跟她來一個擁抱.
「嚟,我帶你地參觀下本部.」勇仔帶領他們參觀本部各個部門,首先是研發部.
藍曉玲向他們展示櫥窗上一件件行頭:「碳纖維護甲,底層採用聚酯纖維材質,透氣排汗.M1911手槍,單排彈匣,方便隱密持武.AS Val微聲自動步槍,一體化消音管,暗殺嘅最佳選擇.P90衝鋒槍,高射速,穿透力強勁.我地有自己嘅武器工廠,每隔一段時間就會有新貨送嚟.」
然後到培訓中心,這裡分成數個獨立房間,可以透過玻璃窗看到裡面見習生練習對打的情況.見習生A勾拳揮向見習生B,見習生B避過後,拉扯對方的手臂,把他摔到地上.動作欠靈活,但對新人來說算是不錯.
「我地會不定期召慕新成員,對佢地進行陪訓.陪訓過後,就正式成為我地嘅特務.」
顏影寒,張穎琳和區可頤三人發現在場所有人之中,就是他們年紀最小,瞬間感覺到自己的渺小.
「重點嚟喇.」來到信息中心,牆上的液晶顯示屏顯示著Woodpecker的標誌,勇仔指著其說:「我地收到情報,Woodpecker喺兩日前同奮銳黨嘅發起人洪又達會面.奮銳黨係激進組織,Woodpecker嘅公眾號召力又大,兩個組織會面,好大機會係計劃緊D乜嘢.」
「洪又達....我一直覺得佢有D古怪...睇嚟我嘅猜測係冇錯嘅.」區可頤説.
「棘手嘅係...我地唔熟悉Woodpecker,唯有向呢條友套話.」顯示屏又彈出洪又達的個人資料,藍曉玲眼球轉向區可頤和張穎琳那方:「聽講你地識得一個Woodpecker內部嘅人.或者佢可以幫到我地?」
「其實....」張穎琳跟區可頤對望一眼,區可頤苦笑一下,側頭望向其他方向:「其實我今次只係為左救陳教授先行動,既然陳教授死左.....我都冇留喺度嘅必要.」
「同唔同我地合作,你地可以慢慢諗.不過我諗你地都需要個地方休養,唔介意嘅話,我地有幾間空出嚟嘅房~」藍曉玲道.
「依家唔係休息嘅時候....」顏影寒說:「我仲有緊要事要去做....馮佩妮而家好危險.....」
「關於呢點.」藍曉玲語氣變得沉重,轉眼對身旁的勇仔說:「勇仔,帶佢地去宿舍區休息.」
「跟我過嚟.」乘搭電梯,走過一段路後,藍曉玲和顏影寒來到一間病房的玻璃窗前.看到房裡的景象,顏影寒鼻頭一酸,眼角泛起淚光.