無題: 掙扎
“Money cannot buy you love, simply because it is not enough.”
係香港，有一句名言，叫「男人唔可以窮」。
咁女人呢，女人又唔可以咩？
相信每一個人，都有唔同既答案。可能女人都唔可以窮，或者係，唔可以係弱者，甚至係，女人唔可以淫……
我媽媽自細就教我：
小眉，做女仔，唔可以靠男人。因為男人靠得住，豬乸都會變聖誕樹。一於自己雙手，自力其力，唔好貶低自己既身價，即所謂既做Cheap 自己。
當然，我完全明白媽媽講既呢番話，係肺腑之言。因為自細阿爸就已經包二奶，名符其實既拋妻棄女，消失於塵世之上。
媽媽好辛苦咁樣跑速遞，三千蚊人工，死慳死抵，供到我入大學。但係好可惜，我亦都報答唔到佢D咩。
因為我唔係做咩投資銀行，或者甚麼大進出口買賣，政府AO。我讀既係中文系，出黎做既係堪稱比清道夫更低賤既記者。
但係媽媽仍然安慰我：有自己既理想係好事。唔駛擔心我架，我仲有少少積蓄。我可以照顧到自己架，放心。
但係其實，我好清楚，如果我份工都無埋，屋企應該可以完全合符資格去拎綜援。
我曾經咁樣同媽媽開玩笑，但係媽媽就有D勞氣，話：拎咩綜援。做人最緊要自己靠自己。千祈唔好作踐自己，如果唔係人地知道左，會睇黎唔起，咁樣就一世。
媽媽成日都叫我腳踏實地，唔好作踐自己。
但係咁樣既清苦生活，又係唔係另一種既作踐方式？我真係答唔到口。
係呢個時代，安貧樂道，係需要一種無比既勇氣。
我自問都無咩物質要求。做記者啫，仲要唔係攝影既添，真係拎部手提電腦，或者紙同筆，已經搵（或乞）到食。
當然唔駛穿金戴銀，亦都唔會有咩名牌。我係果種係街頭出現，都唔會有人望一眼既電燈柱。
雖然如此，有時同番D同學、舊同事或者朋友食飯。都未免有少少洩氣，甚至氣餒。
就好似今日，我約Caroline 食飯。本來佢話要去置地廣場食，但係我一聽，極力反對，結果去左街邊大排檔。
但都唔平架。因為要就Caroline 係中環返工，食一個常餐依然要五十幾蚊。大佬，食左人地隻車咩。
但係我既返工時間比較彈性，自己又係觀塘返工，算啦，搭地鐵都唔算好唔方便啫，咪當就下老朋友囉。
Caroline 當然遲到，然後用左十分鐘開場白去批評呢度有幾難搵，同埋條街有幾污糟。「我都話我請你啦，去Landmark唔係咁貴渣嘛。」
我無奈地笑笑：「係我唔岩囉。搞Cheap晒。你條裙新買架，好靚喎？」
「Chanel，上個Season架啦。Out左，所以咪粗著出黎食麵囉。」哦，咩原來係咁。但係佢個價錢，就算折左，都應該係我既唔知幾十個月人工啦。
結果大家開始食麵。Caroline 係我果陣讀大學個大O 識既，之後覺得大家有時都志趣相投，就都幾熟，得閒都有約出黎。
不過入左職場幾年，Caroline 一年比一年變化，比香港變得更快。我依家成日都覺得，我已經追唔到佢既思考步伐。
就好似佢突然又幽幽地嘆左一聲，撥一撥佢香氣刺鼻既頭髮，問我：「小眉，其實點解你要搞成自己咁呢。」
我停下食麵既動作，筷子停係半空，一時之間，我都唔明佢講咩：
「即係點呀？」
「我既意思係，你假假地都係大學畢業，一級榮譽，唔駛搞到自己咁架？」
我真係唔識招架。然後佢已經開始發表偉論：
「第二個我真係唔會講，真係見熟，係姊妹先俾Advice你。」佢飲一口檸茶，然後五官乸埋一舊，好似前世無飲過大排檔既凍飲一樣，依家係度啜緊屎水一樣。
「就算讀唔到書，都一樣可以搵到好工。最緊要搞好D關係。我都係轉左做PR，依家先明白呢個道理。」
「你咪睇我依家身光頸靚，以為我好大花費。」Caroline有意無意又係我面前郁下佢隻手，「其實，全部都係我男朋友送架渣。」
「女人唔識做野，唔緊要，呢個世界有男人，我眨一眨眼，打一個手勢，大把人車出車入。」Caroline 講完，又自豪咁挺一挺胸。
唔係想講衰野，但你成34C，梗係打一個手勢就可以召喚晒D兵出黎啦。但係我有咩呀，我係緊急情況下俾人召去赤蠟角訓低做緊急降落渣。
於是我就搬番出媽媽既古訓出黎講：「我個人都無咩要求既，靠人不如靠自己。」
Caroline 就即刻用伸食指左右搖擺，強烈否定：「No, no, no. 人生在世，一定要歎世界。如果自己做唔到，梗係要搵貴人幫啦。」
然後，佢竟然大模斯樣咁強調：「依家呢個世界，已經笑貧不笑娼架啦。」呢個時候，佢電話響起，一接聽，把聲即刻高八度，你可以話好煩，但係似乎聽筒對面，應該相當受落。
「唉，唔知你咁多呀，你Book到先再講啦。係咁啦，拜拜！」
睇到Caroline 輕咬下唇果個樣，我唔知點解覺得甚至有點飽。
Caroline 呢個時候拎個電話禁禁禁，然後話：「俾D野你睇。」
我一望，發現果然係湖光山色，白雪皚皚，美不勝收。「我最近識左個新男仔，做Fund架，佢邀請我去北歐睇極光。坐First class，住別墅，嘩，正到呢……」
我一呆：「咁依家個男朋友呢？」Caroline若無其事：「佢梗係唔知，我最近都同佢冷戰緊。」
「下，點解呀？Richard，應該仲係Richard呀呵？」係Facebook 仲見到佢地懶係恩愛架喎，點會……？？
「早排，佢向我求婚。痴線，粒鑽石得卡半，細到睇唔到，我梗係即刻拒絕啦。佢於是就嬲左我，小器到死。」
我暗暗計算，卡半鑽石，起碼都要十幾皮喎，咁都唔應承？Caroline 悶哼一聲：「我之前有位同學結婚。佢老公係大陸開廠，粒鑽石起碼兩卡。幾閃呀！呢D唔係物質問題，係尊嚴問題。」
「呢D野一世人得果一次。我估唔到Richard咁頹，仲要係番香港Propose，佢唔係呀嘩？佢真係以為我Market value 低到一定要嫁俾佢？太天真。」
愛情要講到去market value咁複雜？望住我杯奶茶，我真係睇唔透。Caroline 見我無出聲，以為我做左Good listener，於是佢自顧自繼續：
「於是我一怒之下，又岩岩蒲果陣識左呢個男仔，佢又邀請我去旅行，我咪去囉。果然無走寶。果個星期，係我一生人中最美妙既時刻。」
「依家又約我農曆新年去日本呀，唉呀，我依家真係唔知點好啦。嘻嘻嘻～」
我完全無言以對。媽媽，女人真係唔可以Cheap？CY夠話唔會選特首啦。呢個世界無絕對架。
「我地呢一代，已經無咩機會，更加要識得善價而沽。小眉，理想唔可以搵飯食架。就算你真係要做記者，都唔可以做獨行俠啦。多D巴結上司，尤其是男上司，好受呢一套。擦下佢地鞋。同佢地飲下酒，食下飯。到時上到位，日子唔同左，你就會明白架啦。」
「咁同做雞有咩分別？」我真係想衝口而出。但又因為傷到Caroline 既弱小心靈，我深深呼吸左一下，將說話硬生生咁吞番落肚。「我會試下架啦。」結果我聲音細小咁樣講。
返公司果陣，我好後悔約左Caroline出黎。本來我想吐下自己既苦水，點知倒番轉頭，俾Caroline 係度講佢D廣東省生存之道100條。唉。
有時，我都真係想放低我既所謂底線，然後向現實低頭。畢竟連生存機會都未講得上，又點樣講所謂更高層次既尊嚴？
又但係，面對住自己既上司，我又點樣可以拋個身出黎獻媚呢？
「眉旨因，你果篇稿寫得好差！你知唔知？」
我老細成日係言辭上攻擊我，一早已經係家常便飯。
「老老實實，得罪講句，你寫既野真係顯唔出你竟然係讀中文出身架囉？成篇野同你個名一樣，都係唔知做咩，不知所謂！」
我冷靜咁望住佢，無出聲。因為媽媽既教導，咁多年黎，面對事無大小既不平事情，我都習慣左忍。同埋，就算依家我份工已經同最低工資差唔多，但我真係唔可以無埋呢份工。
我真係唔想淪落到去茶餐廳洗碗。到時真係自己同自己做Feature都得。
「依家寫野，唔係文筆好就得架！係要Sell得！係要吸引到眼球！」佢繼續發表演說，然後開始自吹自擂，講自己點樣當初跟依家既大老闆打天下，先有今日既成就。
Sorry，佢講既各種，大家平時都已經聽得夠多。所以亦無必要係呢度再寫多次出黎。請各位自行想像。
「你如果想係繼續做落去，我唔該你醒醒定定，搵D好野，寫佢出黎，得唔得！」老闆兜左幾個圈，終於佢行到我前面，然後突然間，現出佢一既副色相：
「只要你聽話，做好D，我相信你唔會無前途既。」佢隻臭手，一野疊左落我個膊頭度。
我想講，呢個情況，已經唔係第一次。
講多少少，呢位慷慨激昂，講漂亮話係上黎振振有詞既細老細。佢叫馬子涼，大家都稱呼佢為萬梓良。如同後者飾演既許多經典角色，佢一樣都係無人性，冷血，而且異常好女色。
哎呀，唔覺意暴露左我已經差唔多係剩女既身份。但係唔緊要啦。
但好可怕既係，佢並無萬梓良既果種霸氣。佢係一個乾巴巴好似行將就木一樣既另類文藝青年，而且散發一種令人難以言喻既毒拎氣息。我完全唔懷疑佢個電腦依家係download緊AV，或者上緊高登。
佢個人又高又瘦，各種關節異常突出，令人諗起一種非洲獨有既怪鳥。怪石嶙峋，十分可怕。佢經常著住一件大號既鴨屎綠色風褸，但係遮掩唔住佢病弱既身材。金絲眼鏡背後，眼神經常散發住令人不安既異樣光芒。
我真係唔明呢個人當初係點樣上位。但係唔緊要，呢個世界太多野，我地都唔明架啦。
依家佢疊隻手係我個膊頭度，下一秒，佢就唔知會將隻另一隻手放係邊。我一直都知道佢對我係有D野，但估唔到，咁快佢就真係郁手。真係睇死我，唔會告佢性騷擾？
佢個淫穢既眼神，就係話俾我知：「我睇死你唔會。因為我食硬你。哈哈哈哈哈！」
我個心頭又諗起Caroline 岩岩講既野，同埋我阿媽講既野，真係一陣陣悲哀。同埋：我雖然係剩女啫，但都未去到咁既程度，要呢D咁既質素既，先肯睇得起我，以及非禮我呀嘩？
我決定，繼續恪守我既底線。膊頭一縮，就向右移開左一步，無聲無息地。然後我木無表情咁樣答佢：
「係，我會繼續俾心機，如果無野既話－－」我本來想講「如果無野既話我出返去」，然後即刻閃返出房。但點知佢得手不成，已經暴跳如雷，向我大聲指罵：
「你依家咩事！下！你依家咩態度呀下！」佢D好似基因異變既長手係我面前亂咁揮舞，於是又開始加插一D莫名其妙既罪名，我根本唔想聽落去。無大大打一個呵欠，我已經好有禮貌，講真。
而就係呢個時候，有人敲門，然後打開門，伸左個頭入黎。
來者一臉訝異：「哎呀，原來你地真係係度呀！」佢著住老式既阿叔式西裝同皮鞋，拎住一大疊文件，就係我地既老頂。亦即係萬梓良既上司，老莊。
萬梓良變臉功夫果然到家，即刻由惡鬼咁既款，變到聖誕老人一樣：「係係，你搵我？搵小眉？」
老莊無咩頭髮，得番幾撮小毛，成日都滿瞼通紅，尤如關公。但佢一D都唔正經，成日嘻嘻笑，令人覺得佢可能更加似周伯通，或者係曾經擔任個六合彩主持既夏春秋（再一次暴露年齡層）。
「我其實真係想搵小眉。不過，你地開緊會？有要事？我唔阻你？」老莊雖然老，但係依然活力十足，此刻甚至邊講，邊郁手郁腳，個人彈下彈下咁。好似好搞笑咁。
萬梓良即刻把口泡過油一樣：「無，無咩事，都係教人小眉點樣可以再進步一D，你搵佢，你搵佢先啦，我地一D都唔趕，哈哈哈。」空洞既笑聲，口沫既橫飛，討厭之極。
老莊揚一揚眉，就做左一個「請」既手勢：「咁呀，小眉眉，黎我間房再慢慢講啦！」老莊忽然轉講普通話，於是小眉眉就變左小妹妹。佢成日都鍾意咁樣叫我。
雖然係有D輕挑既意味，但係老莊就絕對唔會無啦啦疊我呢D小妹妹膊頭。呢個就係個根本性分別。
去到老莊間房，佢當然無又指住我黎鬧，只係好客氣咁叫我坐低。然後話：「開門見山啦，你覺得你係度做野開唔開心？」
我再豬，都知道唔可以輕易講真話，否則，除時會惹來殺身之禍。「開心。」聲線，就好似平板電腦一樣咁平板。
但係老莊都係聰明人，佢似乎完全明白我既意思：「哈哈哈，後生女，一開始頭幾年，始終係有D困難既！」
老莊接落黎又問：「咁你覺得自己工作表現又如何？」
我怔一怔，不知不覺，一道寒意開始從腳板升起。唔係呀嘩，個萬梓良見我唔肯做佢既禁臠，咁快就要殺人滅口？
「都……都過得去既。」我估唔到，係生死關頭，我都係窒左。「老頂，我－－」
老莊溫和咁笑左一笑，單手一舉，阻止左我：「明白，明白既。我都有成日同小馬傾起你既工作表現，你做成點，我都明既。」
但恐怕老細你唔知到小馬講野究竟有幾成真呢？老莊似乎睇得穿我個心想講咩，依然維持住溫暖既笑容：
「小馬個人其實無咩既。有時可能對女仔，尤其是D後輩，可能緊張D啦。我係知道既。或者，你都唔駛太過將佢既嚴責放係心上。」
老細不愧為老細，竟然可以將萬梓良既美好一面，包裝出黎。唔怪得依家無人信報紙啦已經。我好想笑出黎，但係竭力咁樣忍住。
可能老莊覺得我呢個樣有D奇怪，佢神情略為驚訝：「總之，唔駛亂諗太多既。有D咩不滿，你可以直接同我講。」
我真係好想一次過數晒萬梓良D衰野出黎，但係終於，還是忍住無講。「知道老細。」
「但係我都真係想要D創新野報導下。我唔介意慢慢等，最緊要到最後有人睇，有Sound bite。例如財金界，有咩人物值得寫下咁，你不如返去再諗下？就算八卦既都唔緊要，我地唔放係報紙，就可以放係其他地方。就算係大長篇，都無問題。」
「係既，老細。我會再去度度。」老莊就眉開眼笑：
「嗯，咁就最好啦，我真係睇好你架，等你好消息。」
未炒得，咁都好D，於是我鬆左一口氣，乖乖退下，回到座位。趕埋幾篇稿，偶爾見到萬梓良仍然係房入面，透過玻璃窗，用一雙賊眼，係我身上不斷打轉，我知道，佢一定仲未死心。
唉。終於等到佢走左，全部同事都走埋。九點幾，我決定今日既OT到此為止。拉起大布袋，走人。又坐地鐵碌返黃大仙個公屋屋企。
阿媽已經訓左，但好彩都仲有餐湯同飯食下。慳番唔少。黃大仙公屋，香港其中一個最窮既地方。但係呢度亦都係我長大既地方。
呢度對於我黎講，拉鐵閘聲，打牌聲，甚至係孩童互相你追我逐既叫聲，都有一種莫名既安全感。
食完飯，洗好碗，我繼續為我既專題報導努力。依家寫財經新聞也好，正章頭條也罷，一樣都要娛樂性豐富，最好連邊個富商既名媛既遊艇生活都寫埋出黎。
但係其實呢D一早有同行跟到實一實，而好多財經界人士，一係就係過份曝光，根本無人有興趣睇；一係就係潛水潛到唔知點，如果寫多少少就會告你誹謗。所以，唔係其實唔難，係真係好難。
我一邊睇舊報紙雜誌，網上新聞，睇下有咩報導，但係始終，仍然和之前咁多個夜晚一樣，不得要領。間房各種紙張都已經疊得如天般高。「有咩故事會有趣？會有人想睇？」
我咬住鉛筆，不知不覺間，就瞌著左一陣。但係因為凍，突然一陣冷風，就已經將我嚇一嚇，扎醒左。
因為過份反應，個人向後彈左一彈，背後成堆雜誌跌晒落地下。
我掩住嘴，制止自己失聲大叫。然後輕輕嘆一口氣，坐係地下，開始逐本逐本雜誌疊番好。
嘩，呢D財經雜誌都好耐，起碼幾年架啦喎。我順便翻揭一下，嗯，但係都好似無咩發現咁。
但再睇下睇下，竟然俾我發現到一齣新聞。
「著名財金界人士，瓦解地鐵恐怖自殺式炸彈襲擊」？
我忍唔住去細讀當中既詳細報導：「著名股評人歐尚文，人稱Alan，在恐怖襲擊後，仍然在醫院昏迷。根據乘客事後憶述，當時Alan和恐怖份子乘坐同一班列車，在同一個車廂。他和他的公司同事首先發現恐怖份子的炸彈。而經過一番智力和勇氣的周旋，成功聯絡到警方，裡應外合，攻入車廂，將兇徒制服。」
「又據聞，到最後千鈞一髮之際，Alan及時阻止炸彈爆炸，成功阻止香港的一場史上最大浩劫。事後，特首也向昏迷中的Alan表達慰問。而送上鮮花的香港市民，更是不計其數。但很可惜，Alan至今依然昏迷不醒。醫生認為，Alan再度蘇醒的機會極微，大有可能在醫院，今生今世以呼吸機渡過餘生。」
歐尚文，呢個名好熟。既然係股評人，即係財演啦，唔係係電視見過，就係報紙曾經刊載過佢既評論。
為救人不惜犧牲生命？有無咁偉大？「事實上，歐尚文還有一位太太，但兩人一直貌合神離，有消息更透露，其妻早已不顧而去，懷疑是『跟佬走』。Alan懷疑戴綠帽後，一度無法振作，幸得一位神秘的紅顏知己支持。在意外發生後，其妻子依然未有露面作出探望，而其紅顏知己亦未有出現……」
唔通，唔通係因為呢個Alan大受打擊，所以先唔要命咁樣去同呢個恐怖分子拚死一搏？有趣喎。
呢個Alan之前有一定既知名度，只係香港人實在太係善忘，所以慢慢先開始無人再留意佢。依家佢已經係植物人，老婆又已經唔見左，真係算係人間既悲情咯。
但係我只係一個文字工作者。我應該只會理會既係，新聞價值。植物人都唔會覺得痛苦架啦？如果可以搵到呢個Alan既老婆出黎的話，相信都要有人有興趣想知道，點解佢可以咁狠心，老公訓係醫院咁耐，佢都竟然可以不聞不問。
人性真係可怕。我係幽暗陰冷既斗室中，又微微嘆左一口氣。即刻上網，做番D新聞既資料搜集，發現呢個Alan，的而且確係一個不可多得既才俊，但係自從婚變以來，辭去大公司既職位，反而自己開公司，直至慘劇發生。
完全唔知佢老婆係咩人，Google入面，真係相都無張，睇黎佢老婆並唔活躍，相當低調。至於所謂既紅顏知己，更加係無人再有提及過。只係佢公司既另一個秘書？員工？差遣？合夥人？完全唔知。
真係咁神秘？但係咩都無，真係好難刮，或者，都係從佢老婆入手先……應該花D功夫，會有所發現。
係呢個喇。
我一躍而起，感謝上天俾我一個機會。無錯，我一定要自己靠自己。我唔能夠俾其他人睇死既……
但係係呢個時候，我斷估唔到揀既呢個訪問，竟然會令到我既人生，出現咁翻天覆地既變化。
但係我知道，我首先要爭取老細們既Approval。不過我知道，我一日唔屈服係萬梓良既淫威之下，佢一定會即Ban無情講。所以，就算有Proposal，俾幾多佢都一定全部碎晒。
我咬咬牙，決定唔跟規矩都要，今次我決定直上老莊果度，等佢直接決裁。只要佢首肯，萬梓良呢隻擦鞋精，仲唔係聲都無得聲？
如意算盤當然自己黎講，會打得好響。但係到同老莊講，佢不斷點頭，但係都係問左一句：「咁小馬知道未架，佢有無咩意見。」
「佢未知……」
「下？」老莊微微一笑，「咁好似唔係好岩規矩呀嘩？」
「老頂，你聽我講先。」我急起黎，「如果馬生知道，佢一定會……」
「會一定唔俾呀嘛！」呢個時候，萬梓良氣急敗壞咁衝左入黎。
老莊彈起身，指一指：「小馬，我知你性急，但係入黎之前，都要敲門呀嘛。」
萬梓良即刻深深一鞠躬，其哈巴性格立即表露無遺。「對唔住，老細，係我唔岩！但係小眉咁樣做，完全Skip左我，係佢唔岩，我必須要即刻指出黎！」
我面如土色。但係好明顯佢已經無將我放在眼內。然後佢繼續噴口水：「依家唔係人身攻擊。老頂你識我咁耐我不嬲都係對事不對人。依家小眉咁樣做，完全Skip左我，係對成個Management structure不尊重！所以未講個單新聞，我對成件事既處理手法，已經覺得好有問題！」
頂，你岩岩先講完，又再重覆講一次。
呢個時候，萬梓良先盯住我，雖然無平時照肺咁離譜，但係語氣一樣都係好唔客氣：「你對我唔滿意，你可以同我講。你依家就咁同老莊講你想做既採訪，係完全無尊重作為你上司既我！你依家咩事呢呢下？係咪我對你既工作表現不滿，你就要咁樣作出無謂既反抗呢，呀下？」
只要識得萬梓良耐少少，就知道佢一激動就會係咁「呢下」、「呀下」。我個人認為，仲難聽過講粗口。
我無出聲，而老莊繼續一貫既慢條斯理。「小馬，我明白既！我明白既！」除慢慢除低個老花眼鏡，就話：「後生女係衝動D既，但係佢都係想做出一D成績俾我地睇啫，出發點係好既，你都唔好放在心上。佢下次都唔會架啦！」
老莊似乎都對我既建議表示興趣，於是見萬梓良係度，就嘗試想搵埋佢一齊傾：「小馬呀，咁你其實都應該聽到小眉既計劃，你覺得做唔做得過？我個人覺得都好似OK喎。」
萬梓良不愧為馬屁王。我知道佢聽到老莊呢句，佢一定唔係即刻表示完全做唔到，果然，佢即刻快如閃電咁回答：
「我覺得，如果可以有幾個問題解決到既，咪可以做囉！但係！」
一啖砂糖一啖屎：「我唔覺得呢個問題可以解決到喎。」
「咩問題？」
萬梓良即刻侃侃而談：「首先，果位歐尚文既老婆，究竟去邊度搵呢。天下之大，佢可能根本唔係香港，咁我地如果搵唔到，又點樣做呢個訪問呢？第二，就算我地大海撈針啦，真係搵到佢出黎喇，我地點樣說服佢訪問呢？第三，咁樣我地算唔算係歐尚文既傷口灑鹽呢，我地咁樣做，合唔合乎新聞道德呢？」
我心入面忍唔住冷笑：我係度做野咁耐，從來唔覺得會有諗過新聞道德。分明就係萬梓良係唔係都要加鹽加醋加多一個入去，整到成套野好似好有說服力咁。
但係老莊就同我講：「咁小馬講既野，又唔係完全無道理。小眉，你有無諗過點樣解決呢D問題？」
呢個時候，又點樣可以退讓呢？於是我拍心口，話：「老莊，放心，我一定可以搵到歐尚文老婆既消息。然後勸服佢做呢個訪問。」
萬梓良嘿嘿一笑，係背後放冷箭：「搵？幾時？我地要等你幾耐？唔通你搵一年，三年，五年，我地就日日坐係度等好消息，咁樣呀下？」
「一個星期，只需要一個星期，我一定可以查出歐太既下落。」
老莊點點頭，同萬梓良講：「做記者，最緊要有火！我幾時都係咁話。就咁啦，就咁啦，好嗎？如果到時小眉無貨交，我地再向佢大興問罪之師，好無呢？」
「好啦，好啦，小眉，你出番去做野先啦。」我即刻如獲大赦般，飛奔而出。可以見到，萬梓良既表情，相當難睇。就好似我D毒男Friend話，AV Seed Download到99%果陣停左咁既樣。
行出左一小步，亦都可以係未來既一大步。但係自己一個人，的而且確係無咁易將一個人搵出黎。於是，我要去搵外援。
搭車去另一個舊區入面差唔多要全部拆卸重建既商業區，我沿住昏暗既樓梯上樓。去到三字樓，轉入一個細小既走廊，左手邊有一度木門，隔壁寫住一個就快跌既牌：
葛氏偵探社
其實去搵老朋友，都係因為有公事，自己都覺得有D衰。而見到自己淪落之餘，老朋友亦都唔方搵到兩餐，心裡面當然難過。
自力更生既人，多數都無好結果。
七八十年代果陣，資訊未有咁發達，香港既偵探業既一度好蓬勃，你睇半斤八兩既許冠文都係開偵探社你就已經知。但係隨著互聯網流行，科技愈黎愈先進，加上外國既偵探業，直頭有間諜級水準，有D甚至請左FBI中情局果D做顧問（我都係聽人講），所以香港根本上已經完全無得撈。你依家仲會唔會聽到有人做偵探？
而我呢位朋友，繼承既係父業。佢阿爸小葛，係一個名噪一時既偵探，係舊一輩，甚至名頭同金田一一樣咁響。但當然，去到我朋友呢代，就完全搞唔掂啦。
禁左幾下門鐘，都無人應。順手一推，門竟然應手而開，而且夾離住一舊灰塵跌落黎。我即刻一邊撥頭髮，一邊匆忙走入。發現寫字樓，根本上空無一人。而且地方似乎好耐都無人打掃，塵埃積成厚厚既一層。
「喂，有無人呀……小雲？」我隨口呼喊幾聲。又用手四圍揮動，防止吸入過多污濁物。
「我係你後面呀。」
我大吃一驚，急忙回頭一望，發現果然，我老朋友，著住殘破工人褲，帶Cap帽，係我後面，做鬼臉。
「呀！嘩！嚇鬼死！葛小雲－－你做咩咁鬼鼠！」
小葛，葛小雲。矮矮地，有一張娃娃臉既女仔，係我屋企人親戚果邊朋友識。由細玩到大，我地成日都有疑問，究竟係咪因為佢父母覺得佢似IQ博士入面既小雲，所以先將佢個名改成咁。
「咩鬼鼠呀，我想同你打招呼架，係你自己無聲無息入左黎。真無禮貌。闖入私人地方，你係賊，我可以報警。」
小雲既聲線依然係清脆得黎低低地B，而且說話簡潔尤如小朋友。好聽就叫可愛，唔好聽就叫弱智。但係雖然如此，我仍然選擇同佢做一個擁抱。
小雲似乎都幾受落，但係半晌佢又突然一聲驚呼，然後推開我：「八婆，無見一排，個胸又大左係咪。」
我漲紅臉：「痴咩線，亂講！」「無亂講！」小雲既眼直情好似射出死光一樣，係我心口不斷打轉。
我十分無奈，但仍然慣性即刻雙手交疊，放係胸前：「同你一樣都係飛機場，OK？」
小雲繼續怪叫：「老娘唔係飛機場。我都有一個小山坡……」我完全唔想繼續呢個話題，於是攤開手，索性開門見山。
「今次黎，係想拜託你……」
「下！拜託咩呀！我打算唔做啦喎。」小雲直截了當。
我大驚失色：「下，唔係呀嘩！終於都支持唔住啦！」
「係呀，你又唔早D黎接濟下，依家真係完全唔掂啦。市區又重建，又迫我搬遷，租又貴十幾倍，索性唔做啦。阿爸俾我既家業，就係我手上，毀於一旦。」
小雲歡快既語氣，令我覺得字裡行間入面再增添幾分既憂愁。
「我打算結婚算了。」小雲似乎已經愛理不理，雙手插袋。
我又再一次震驚，「下，你幾時都拍拖？做咩唔話知？」
小雲責怪我：「你咁忙，你有間唔中搵我呢個老朋友咩。仲好講，Whatsapp 都唔見你覆一個。哼！」
「係啫……但係。」我亦都唔覺意刺中小雲既痛處，「你唔似有拍拖而穩定到會結婚喎，係咪呃我……」
小雲又一陣怪叫：「眉旨因，我殺左你！」佢上前作雙手掐死我狀。但係好快佢就氣餒：
「係，我係無男朋友，但你又好得我好多咩。」
相對無言，唯有淚千行。無比寂靜。
兩個女仔，咁既時候，一個唔小心，就會爆喊。但係兩個人加埋差唔多拎得生果金啦，眼淚都無謂徙啦。此時此刻，又欠缺觀眾。
我唔敢出聲，小雲就開口：「但係結束營業係真既。我打算唔做，然後將搬遷費拎埋出黎，去讀下書算。因為真係無生意。」
我估唔到，呢個世界，真係一山還有一山低。我都叫做窮出身慣，但係小雲呢種，名副其實叫家道中落，而且係直插果隻。
小雲反而疊疊我既膊頭，安慰返我轉頭：「小眉，唔緊要啦。我好多野都已經賣晒或者丟晒。如果你要委託大型工作，我恐怕已經幫唔到你啦，不過－－」
「搵人呢……我都唔會出面幫你搵啦。但係線索既野，總都會理順都一D既。」我見柳暗花明，大喜過望，差唔多要即刻同老朋友再黎一個相擁，但又驚小雲又再次發癲，大造文章，我只係咳嗽左一聲，然後回答：
「係，咁太好喇！」
「睇下你幾冷淡。你呀，平時完全唔出現，一黎就只係搵我做野。人情冷暖。」
「對唔住啦，一陣搵你食埋飯啦。」
「梗係要。」小雲伸手指出我既鼻樑，好似要開出一個洞咁樣。
「咁，你究竟想搵一個咩人？」小雲打開桌上一部舊式電腦。我於是就我既新聞構思，講左一個大概。
小雲O嘴：「你只係得咁多？你手頭上只係得咁少料？」
我點頭。小雲柏檯：「你真係當我係生神仙呀？連名，樣，身型，本資料全部咩都無，你叫人點查？」
我自知理虧，但仍然努力申辯：「咁，至少，呢個歐尚文，都係知名人物。我以為，你應該可以一步一步咁，抽絲剝繭……」
「你估真係咁容易？」小雲冷笑一聲。「唔係Friend底，我真係一野轟你出門口無情講。你等等，我睇下database有無咩料先。」
我低頭作左一個敬禮：「今次真係麻煩晒你喇。」
「唉，識著你都真係三生有幸。」小雲飛快咁樣係鍵盤上面打，睇左一陣，開始喃喃自語：
「呀，嗯……咦。」
「係咪有D咩發現？」
「嗯，唔算無……但又唔算有。」
我真係好想講：你係咪即係撚化我先？但係對老朋友，要俾多D耐性。於是我只係問多句：「唔明，咁即係點呢？」
「簡單講。」小雲拍一拍手，「歐尚文個老婆，其實之前都有人搵過。」「下？」
「而且，搵佢既人，唔係第二個，正正就係佢老公，歐尚文！」
下，點解會咁？詳情究竟係點？
「完全唔清楚。只係係Detective 既Directory 入面，曾經有過咁既紀錄。但係神奇地！」
「點？」
「最近大量紀錄遭到大幅度既刪除。依家好多關鍵資料，已經不復存在。」
「下，點會咁架。」柳暗花明完，原來先係山窮水盡。點解我會咁黑仔架……如果查唔到，我點樣同老細交代？唔通今次真係要同萬梓良同度春宵先掂？
千祈唔好亂諗。千祈唔好亂諗。「真係一D資料都無留低？」
「有，佢老婆叫做陳可宜。英文名：Emma Chan。係咁多。資料庫入面有既野，就係得咁多。」
「所以到最後究竟佢老公搵唔搵到佢老婆，佢老婆做咩之後又再失左蹤，完全唔知。嗯……有意思。」
小雲既靈魂返黎了。「咁啦，小眉，你俾D時間我。呢單做埋我金盤洗手，起碼係有定無，我都俾個答覆你。OK？」
說罷，小雲自動取消飯局：「下次先食啦，依家要開一開Turbo，睇下中間發生咩事先。呀哈哈哈。」
我真係唔知應該點多謝小雲好，只好立即從大布袋拎銀包出黎：「咁不如我俾住一D酬金你先……」
但係點知小雲一下子回絕：「唔駛，唔駛。呢單野我唔收錢。我自願既。」「下，咁唔岩規矩架喎。」
「總之唔駛就唔駛啦。」「人情還人情數目要分明喎，阿媽至細教落。」「都話唔駛啦！」
一輪爭執過後，小雲終於大喝一聲：「你都無咩邊個錢扎袋啦，留番黎傍身啦。」我即刻無聲出。然後小雲聲音放軟，就話：
「況且真係要你俾，你都未必俾得起。係咁，唔好阻住我做野。我會盡快覆你。」
我都已經唔敢講話我要一個星期內要知道個音訊。老朋友幫到咁，仲想點？還祈求甚麼？
做女人唔能夠Cheap。但係受人恩惠，唔通又代表性格好高尚？
呢個世界，真係賤物鬥窮人，而我依家，竟然仲係自己朋友既乞衣兜上，挪飯食。咁樣又好好？
我真係唔識答。
唯有，依家只有一條路，一心一意咁，做好呢單訪問。其他野，唔能夠再諗。再諗，我驚我會癲。
＊ ＊ ＊ ＊
雖然萬梓良既臉色一日黑過一日，但係我都忍辱負重，唔多理佢，終於去到近個禮拜尾，小雲約我去海滂傾單野。
你可能會問，點解唔去Starbucks pacific coffee果D，但答案好簡單，因為我地兩個窮家女都俾唔起三十幾蚊一杯熱咖啡。
雖然係好凍，但算啦，咪當抖擻精神囉。最緊要條線唔好完全斷左就得。咁樣我先可以繼續玩落去。
只但係，小雲既回答令我極度失望：
「對唔住，小眉，我都已經盡晒力。但係可以搵到既，我已經搵過晒。歐尚文朋友唔多幾個，大家只係知佢同佢老婆分開左。原因係點都唔知，但係佢地並無辦到離婚。換句話說，去到呢一刻，呢個陳可宜，依然係歐尚文係香港既合法妻子。」
「陳可宜係香港既屋企人，亦都完全搵唔到。真係好神秘。而更加令人覺得可疑既係，雖然之前明明歐尚文發散晒人去搵佢老婆，照理應該會有D野留低。但係最近竟然俾人地清除晒。我都真係百思不得其解。」
「但係果個人，做野十分之乾淨俐落，完全無任何痕跡留低。」
我聽到呢度，已經覺得完完全全地灰左。「所以，小眉，好抱歉，真係幫唔到你D咩。」
我茫然睇住個黑色既海。今夜寒風份外凜冽：「唔係既，你都盡左力架啦已經，我明白。」因為風實在太刮眼，我大力一眨，竟然眨著左幾滴淚水。
「嘩，嘩，咁你又唔駛喊既。」小雲笑起上黎，「雖然網上就真係咩都無留低啦，但係我仲可以提供兩樣野俾你。」
小雲遞左個黃皮既文件袋俾我。我繞開線，打開一望，發現一張相。面形尖尖，個人睇黎弱不禁風，高高瘦瘦，有模特兒身形既女仔，並無鏡頭，只係若有所思咁樣望向遠方。
佢雖然無化妝，但係眉宇間有一種非凡既魅力，散發出黎。雙眼睇起黎有靈魂得黎，又帶一點唏噓同滄桑。尤如明星一般既氣派，就係呢D人。
自己都係女仔，仲要已經係賣剩蔗，有咩辦法唔能夠自慚形穢。我雙眼發直，望向小雲。小雲托一托粗框眼鏡，點點頭。
「無錯，佢就係你要搵既人，陳可宜，Emma Chan。」
「我的天。」我既低呼聲，已經俾陣陣北風怒號所蓋過。
「仲有，呢度有個地址，睇黎你今鋪要北上去強國啦。」小雲補充，「似乎陳可宜離開香港之後，去左首都既藝術學院，報讀左果度既藝術課程。」
咁，即係有瞄頭啦。「之但係……」小雲最鍾意，就係講D唔講D，然後將最重要既野放左係最後面先講。
「佢去讀呢個課程，已經係好幾年前既事。果陣歐尚文都未曾昏迷。呢個課程要讀幾耐，真係唔太清楚，始終你都係記者，留番少少野，俾你去查。」
「有可能佢根本無去呢個課程，有可能佢讀讀下已經跟人嫁左走左佬，亦有可能佢已經畢左業，係五湖四海發展。依家睇落好似有線索，但係搵落亦都唔容易。」
唔好再講呢D咁令人洩氣既說話得唔得呀。學政府宣傳片話齋，絕處都可以逢生啦。依家無論點，都要見一步，行一步架啦。
小雲見我意志堅定，亦都無再講D咩。佢笑笑，大力拍我胸口一下，根本就係乘機抽水：「咁你努力啦。仲有……」
「唔好太過勉強自己啦。做人……都唔一定要出人頭地既。」
當然。我點頭明白，然後示意我地離開呢個咁凍既地方。但依家唔係要出人頭地呀，我只係想交功課，保住份工，僅此而已渣。
廣東話講親「搞成咁」，都唔係用黎形容好野。但係講真，搞成咁，又邊個想？
大家都只係茫茫既大海到垂死掙扎啫。可能掙扎都無用，鯊魚照樣游埋黎。但唔通真係咩都唔做？
到最後都係要睇自己既造化。未到最後，我一定唔能夠輕易低頭。
不過一如預料，萬梓良繼續都係大力反對我呢個Idea。「你痴左線，叫公司開公數俾你飛去首都搵個可能根本唔存在既人？然後公司仲要突然少緊個人？下？無可能！」
我打眼色，向老莊發出求救訊號。老莊：「嗯……」薑果然係老的辣，但係我依家真係唔能夠再退架啦。於是我豁出去，話：
「公司唔出機票酒店俾我唔緊要，我自己出錢。但係呢單新聞，我一定要做。」我握拳：
「我亦都可以拎埋無薪假。真係到時交到份功課，我先返黎。」
老莊慢吞吞：「咁你打算要幾耐？」「一個月……三個禮拜……半個月……」見到兩位老細神色陰晴不定，我繼續討價還價。
老莊拍一拍身上既灰塵：「咁啦，三個禮拜，三個禮拜後你返黎，有就有，無就無。咁樣好唔好？」
我大力點頭：「得，無問題。如果到時無貨交，我願意引咎辭職。」
「咁又唔駛……唔駛咁誇張。」老莊哈哈大笑係上黎，嘗試緩和一下氣氛。
「嗯……小馬，你仲有無其他意見？」
「我無咩意見，既然係老頂既意思。小眉又咁肯為公司，自己出埋旅費既話，咪俾佢闖下囉。」佢係都要加一句：
「人有時都要撞下板先會識得成長既！」
我為之氣結，但係都唔好意思係老莊面前再同萬梓良頂撞。老莊呵呵笑：「哈哈，都唔一定既。今次阿眉可能幫我地挖左D世紀大猛料出黎呢。我對佢好有信心。」
萬梓良扮晒野咁作出深思狀，然後佢突然之間竟然講：「咪住。」
我同老莊一時都唔知萬梓良想打咩主意，只得等佢自己再講落去。
「始終阿眉都係經驗不足，我都係唔會放心。老頂，請你俾我同埋佢一齊去首都，做呢單新聞。有D咩都有個照應。我亦都可以一直提供一D監督，同埋指導。相信咁樣，安排會好好多。」
唔係咁大鑊呀嘩！！？！？！？？！！！！
我即刻打出SOS眼色俾老莊。但係老莊好明顯係收唔到，或者扮接唔到，佢甚至大力向上一跳，「Great！有小馬你睇住，咁就太好啦。成件事萬無一失。不過你公司都唔能夠無左你太耐架。如果到時D野差唔多搞定，你就返黎先啦，好唔好？」
「好！老頂，你交俾我。我一定會搞得妥妥當當。」擦鞋下屬永遠答應老細，都講到勁爽快。
「好啦，我地唔好阻住老頂做野。小眉，過黎我房，傾下我地黎緊既工作安排。」
大鑊，今次真係大鑊。
估唔到道高一尺，魔高一丈，正諗住可以避開萬梓良，但係依家好似自己掘左個火坑俾自己跳落去咁。
入到房，萬梓良確保度門閂好，百葉簾遮住出面人既目光，佢開始掩面，然後高聲狂笑。但係笑聲十分之難聽，好似好多隻狼狗係月圓之夜嘷叫一樣。
「眉旨因，你以為咁樣就可以避開我？你實在太年輕啦！哈哈哈哈哈！依家仲有得同你一齊出差添，我問你死未。」
我忍唔住，質問：「你明知我唔鍾意你，點解你係都要拉我同你一齊？」下一句無講：你究竟係咪心理變態？雖然其實，唔問都知。
萬梓良獰笑，隻眼碌到差唔多跌出黎一樣：「我知你係唔鍾意我呀。但係我要你知道，我係你上司，我食硬你！你如果唔聽話，我一隻手指都可以捽死你！」
「咁你依家究竟想點。」天下間點解要有咁樣既一個人渣做我老細。點解。
「哼，你想知？你想知既話，你乖乖聽話囉。只要你聽我既說話去做，我唔會點條黑路俾你行。」我低頭。唔係因為志氣頹喪，而係我真係唔想佢既口水直接噴射落我塊面度。
「淫棍。」我咕嚕左一聲。但係好明顯萬梓良佢聽唔到。「下，你講咩野，大聲D，下？」
「無野。我無講野。」
「哼。你唔駛旨意可以博表現，取得老頂歡心，就可以走得甩。我唔會俾你咁易走得甩。我隨時都可以要求生不得求死不能。嘿嘿嘿。」萬梓良好明顯已經諗住咩都唔做，到時侵吞晒我既功勞。
到時又話我出左好多意外，全靠佢先可以搞番掂D野咁啦。
細老細，永遠都係其中最克人憎既一個階級。往往堵塞大老闆言路既，就係呢D人。只要呢班人隻手遮天，然後你又咁唔好彩Under佢地，你真係永世都無得翻身。
就算你巴結佢，可能好D，亦都可能更差。因為呢D人多數都其身不正，痴埋去，隨時亦都會同時被問斬。所以辦公室既野，真係好危險，又複雜，唉。
依家萬梓良既司馬昭之心，可謂路人皆見。「眉旬因，我要你今晚留低，同我一齊開夜車。所以，今晚要一齊食飯。」
我直頭頭也不回：「Sorry馬生我出去做野先，今晚我阿媽生日。下次啦。」
萬梓良咬牙切齒：「你老母上個月你先話佢生日！！」
「今日到我契老母生日。馬生，契老母，同契弟一樣都好重要。我出番去做野先。」係呢個時候，我亦都完全唔客氣。
對住佢，真係一秒都唔可想留低。我要花好大既氣力去說服自己，唔一拳打埋去佢塊肉酸面度。相信佢腫起上黎塊面，會更加之樣衰。但係為左自己痛快，我都唔排除自己係可見既將來會咁做。
唔知係咪阿媽有第六感知道我今次既旅程都唔方會順利，佢好擔心。「其實唔駛咁辛苦，你之前都唔駛因為要跑新聞而離開香港既。點解今次突然之間要咁做？」
「阿媽，係你同我講，做人要自食其力架嘛。」我一邊執行李，一邊用較為溫柔既聲線回答。
「係啫……但係無啦啦行開咁耐……我會掛住你架嘛。」老媽子面上一皺紋一條又一條咁震動。我都唔忍心，就拖住佢隻手，話：
「唔會啦，做完好快就番。你唔駛擔心喎。我唔會好似衰老豆咁走左。」「你係至好講。你知道啦，你呢個人，面精心懵……」
終於老媽子再老三老四咁樣哦左我一陣，「記住著夠衫」＼「要識得保護自己」講左無限咁多次，就自己訓左覺。
凌晨一點幾，我仲未訓得著。我睇番歐尚文之前既著作，以及佢上電視既鏡頭。雖然金融我唔熟，亦都唔知佢大部分野講咩。
但係係人都知，呢個係一個極之成功既專業人士。起碼呃到下我呢D無知婦孺。
出色既人，永遠頭上都有一種難以形容既光環。可能係佢自己既經驗、自信，以及表達演講能力，以至大家都覺得。
咦，呢個人，真係得喎。然後明明佢無講咩，大家都覺得：
佢講野真係好有Point！
咁樣咁出色既一個人，點解老婆走左，仲下落不明呢？女人既心，有時究竟諗緊咩，我自己身為女人，亦都唔明白。
靠左住好人家，安安樂樂做少奶奶唔好咩？唔通，佢又要好似我阿媽咁講，做女人，都係靠自己，千祈唔能夠賤賣自己？
可能，呢個歐尚文人前人後都係兩個樣。佢係花花公子，所以老婆至不顧而去……
我估都係。金融才俊，大多數搵得多錢都係身痕架啦。一個小三都唔夠，仲要小四小五小六……可能去到小學都畢業為止。
唔怪得我阿媽話，男人靠得住，豬乸都會變聖誕樹啦。
或者，到時碰到呢個歐太，其中一個問題，一定要問呢個。等我將佢抄低係記事本先。
但係，如果已經兩人反目，又點解唔索性離埋婚？做咩係都要為件事，留低一條尾巴？
我完全都唔明白。其實人生在世，我地究竟想要既，又係D咩野？
我望住Emma Chan幅相。明明係郎才女貌……
呢一刻，我真係睇唔透……
＊ ＊ ＊ ＊
我故意托公司D人訂飛機票。因為我知道一定會有人洩露俾萬梓良知。以佢既性格，到時一定又會同我同機，甚至同一行或者隔離左右。咪搞我。
我一早網上搞早幾班機，然後係最後一刻先Cancel公司張機票。咁樣，就算到時萬梓良發現，亦都已經太遲。
呢個只係一個人既孤獨旅程。搭飛機最好都係一個人自己靜下，訓下，就算。我無胃口，亦所以無食任何野。我根本唔想有其他古靈精怪既人係我附近。再整個萬梓良係飛機，仲慘過俾恐怖份子劫機。
最好，就係盡快搵到歐太Emma出黎，然後約到佢訪問，任務完成完，即刻走。
不過呢個世界，又邊有可能咁好彩。