好似係果日之後,我就大病左一場。 

幾日唔郁得,慢慢就唔記得左個公園、唔記得個約定、唔記得左小白……細路仔既野就係咁。 

原來我六歲果年,就係黎過隔田村一次! 

腦中投射既影像、好似跑過一大段走馬燈,我回一回神,望見眼前十分動人既女孩、同細個見到既白裙細路女好似重疊左咁。 

再留意佢對眼、原來小白已經眼濕濕、皺哂眉好緊張咁搖緊我……嘴上面做緊好誇張既口形。 





我諗其實佢係講緊野,只係我未完全回到神。 

慢慢,我恢復返正常,聽到佢講:「阿壯!你點阿!做咩事!」 

我已經坐起左個人、而佢雙手就捉住緊我雙膀好緊張咁望住我。 

果一刻,我同佢之間只有一手之距,我唔知點解好想攬佢入懷內,果種係好似重遇多年冇見朋友既感覺。 

但我冇,我保持左自己既理智、我只係一個過往既朋友、仲係咁耐冇見。 





「小白……?原來係妳……」我有點失神。 

「嗯……好耐冇見喇。」佢有點抽噎。 

「妳一早知道我就係以前同你玩過果個細路?」 

「嗯,我從來都冇忘記過。果晚我一眼就認到係你。」 
佢講完之後就擰左個頭埋一邊、臉龐微微鼓起來,好似有啲惱。 

「反而係你,到而加先認出係我!沉日仲要一見到我就走左去!」 





佢一下拍落我大脾個傷口到! 

我彈左起身,但、原本我應該『哇!』一聲既,點知之前果下痛完之後、竟然好返好多,拍落去都只係有少少感覺。 

「哼!伸對腳出黎!」佢坐左係一邊,開始解開佢帶入黎既白袋。 

「合埋對眼!」我照做,之後慢慢感覺到、佢倒左啲液體係我對腳既腳底到。 

之後每邊腳放左一粒觸感有啲奇怪既野係底、果陣種覺就係好多野吉住你咁、但係唔尖既、唔痛既。 
然後,小白就用純熟既手法最我隻腳連埋『粒野』一齊包紮好。 

「好喇,你可以擘返開眼喇。」見到既係佢拍左拍手、做左個『搞掂』既動作,好滿意咁笑左笑。 

我就覺得有啲奇怪……而且、腳底開始痕痕地,好似有『野』郁緊咁。 





「其實我雙腳冇咩特別傷到,點解要包起佢呢?同埋你放左啲咩係入面?」 

小白活潑咁笑左一下,然後企左係身。 

「你覺唔覺你身體既傷比平時好返快啲?」 

我點點頭。 

「你腳底果兩隻叫『推宮蟲』,係我阿爸係山上面發現,利用佢地既特性、專門對治創傷用架,佢肯比你用,你好彩喇!」 

哇頂!原來我腳底有兩隻蟲係到爬黎爬去!我諗左唔夠一秒已經成身毛管棟起哂。 

唔怪之得我上次係到,一起就踩落地就聽到啲『咔嚓』聲,原來係踩扁左啲蟲! 





搞到我即刻唔敢落地,但我見小白準備行出廳外面,就馬上叫停左佢。 

「咁你可唔可以話我聽你叫咩名?」我想知眼前令人心動既女生究竟叫咩名…… 

佢臉上既紅雲再次出現,低住頭忸怩左幾下。 

「你真係咁想知?」佢今次係第一次唔望住我講野,我都諗左諗佢係同塊地板講緊野定同我講。 

「想阿,話我聽好無?」 

佢走住好輕盈既步伐行過黎靠近我耳邊。 

「我叫……我……我淨係講比你一個聽,我叫白素妮,聽到嗎?記住了嚕--白素妮!」佢越講越細聲,好似好怕羞咁、塊面仲越黎越紅。 

然後一步一步彈左返原來既位置然後背住我。 





「嘻嘻,我好開心、我成世人咁大個女,最開心係今日!我會記住今日既日子架喇!」 

「食飯我再叫你啦!」之後就出左廳。 

白素妮……幾好聽丫個名,唔洗咁怕羞喎、正一傻妹黎既。 

聽住佢行出去既腳步聲,我就開始回復正常。 

我攤直隻腳、訓返係張床到,諗下等陣究竟要問啲咩、點問法,先會知道我最想知既野。 
---------------------------------------------------------------------------------------------------- 
佢上身會有少少似 
 
樣唔同,衣著似