[誤墜]係獅隧口落車 就出左事: ４４

原來間屋四四方方成個盒咁，係因為間屋本來就係叫『潘朵拉的盒子』。 

唔怪得小白既，即使邊個都唔會諗到件事會咁巧合。 

講完之後，大概我已經明白眼下發生緊咩事。

但係仍然唔係太相信咁奇幻既事，竟然係事實。 

最悲劇既係，難得黑家生左個黑白眼出黎既、竟然比人話佢先係唔正常，變左痴線佬、唉。 





見出面天都黑齊、我都唔諗住咁夜出去，點知白大叔仲話黑家既人應該仲搵緊我，唯有聽朝搵個時機再出發。 

咁就最好、唔洗等我諗原因話聽朝先去。 

我草草咁洗左個頭就返左入房。 

據白大叔講，我必需搵返儀式入面母女既『女』，帶返去間小屋。 

我知，佢應該就係講緊果個係到搵媽媽既細路女…… 





件事好似好簡單直接、但係咪真係咁簡單、冇其他曲折？我仲有冇忽略到其他野？ 

訓係床邊既我，背住門口、望住牆訓，但比聽日沉重既事情煩擾得全無睡意。 

即使係咁，成個白祠熄哂燈、百無聊賴既我唯有合起眼諗下今日聽到既野…… 

『踏、踏』……突然我聽到門既方向傳黎啲輕微既聲音。 

『踏、踏』……感覺得到是有個物體在接近我。 





下意識既我諗起黑目小女孩既雙眼、幻想佢就係走廊行近我床邊…… 

我一轉身就會見到佢係床邊望住我訓…… 

『踏、踏』……那個物體越黎越近。

你會唔會明白，面前未知物接近既恐懼、你唔知佢相貌、唔知佢動機、唔知佢幾時會到、只有等……

等既時間有幾長？明明係一秒，結果好似一分鐘、十分鐘咁耐。

究竟我擰唔擰過去好…… 

突然，我眼角見到、有一隻手……伸緊去我塊面到……