[誤墜]係獅隧口落車 就出左事: ４７

＊ 

白大叔最後已經完全無出聲，而小白就拉左我返入房、係佢個櫃到左摷右摷，最後摷左條白色連身裙出黎。 

令我不禁有啲懷疑佢係咪冇其他色既衣物。 

「阿壯……」小白已經將我ＪＯＨＮ既洋名無視左，決定左叫我阿壯。 

嗯？我擰個頭過去，見佢好似尷尷尬尬咁。 





「我想換裙。」唔好咁啦、你換咪換叫我入黎做乜。 

我即刻背住佢，揚左揚手：「哦，咁你快啲換啦。」 

「嗯。」之後再開始聽到微微佢脫下上衣下衣既聲。 

我心跳加快程度，應該比得上啲駛入大埔既紅ＶＡＮ。 

為左唔比自己太多野諗，背住佢既我、索性合埋對眼，掩住埋對耳。 





「阿壯……」唔係幻聽掛…… 

「阿壯！阿壯！」頂，真係小白叫我。 

我擰過去，並沒有如大家預期咁既感性場面。 

只係見到佢拉唔埋條連身裙既拉鍊。 

「你做咩掩住對耳？你呢……可唔可以幫我拉拉鍊？」佢怕怕地羞咁問我。 





但我留意到既只係佢白晢既玉背，同埋係正中心一條純白色既ＢＡＲ帶。 

「喂！做乜呆哂啊！」所以我再三係度講多次，同脫離常識既人接觸係一件好辛苦既事、不論係痴線佬定美女。 

我走左過去幫佢拉起條拉鍊，小白邊背住我、邊同我講：「其實要麻…煩你係因為、之…前都係阿爸幫我拉，但係而…加同佢吵架。」 

「用『嘈交』代替『吵架』會好啲。」幫小白拉好之後、我順手摸左幾下佢個頭。 

因為我已經聽到小白把聲有少少咽嗚。 

「你咪話都想要一個英文名既？」佢轉身望過黎，一雙白眼竟然有少少帶紅。 

「你叫素妮……不如叫ＳＯＮＹ好冇？」 

「好好聽！」小白終於笑返。 





「不過我唔識寫……」佢未講完既時候，我已經行返去佢後面。 

我環抱住佢，捉住佢對手、教佢係自己手背寫一次Ｓ、Ｏ、Ｎ、Ｙ。 

然後係佢耳邊講：「我唔會比你有事架……你信我。」 

小白攬住我手臂、依靠係我胸口『嗯』左一聲。 

白素妮……我絕對唔會比你有事，我發誓！