碟機入面播住孽導演既愛情片,唔係你佢、就係佢呃你既劇情,竟然睇到我地既冰霜美人--白素妮眼濕濕、鼻紅紅咁。 

我見小白睇到入哂戲、咬牙切齒好傷心咁,咪打算搵啲零食陪佢睇戲,哄下佢開心。 

隨手拎左包朱古力熊仔餅比小白食 。
 

「哇!餅入面果啲咩黎架?」一白將熊仔咬開一半,驚奇地問。 

「朱古力囉。」 





「原來朱古力係咁既味,好甜阿!」小白竟然連朱古力都未食過。 

「上面隻熊個樣好似你阿,壯,哈哈!」佢拎起一塊餅放係我個頭既方向,然後單起眼。 

「真係好似!」我諗以佢宜加既視覺,應該塊餅就係我個頭…… 

我故意賭氣,一手就拎左塊餅、放左落口:「唔似喇宜加。」 

「最後一塊黎架!無喇!」小白輕拍我手臂。 





「比返隻『阿壯』我阿!」估唔到佢咁大反應,仲要將隻熊改名就『阿壯』--我個名阿。 

係小白打罵緊我既時候,我靈機一觸、走左入我妹間房。 

拎左隻熊公仔比佢。 

 

小白馬上眼前一亮:「真係送比我架?」 





我都未答佢,佢已經搶左上手然後摸住個熊仔頭話:「阿壯,你個頭好軟棉阿。」 

佢已經即刻將熊公仔改口成為『阿壯』。 

我靈機一動打算逗住小白玩:「咁你今晚係咪諗住抱住阿壯訓?」 

點知小白竟然眼睛轉左圈,調皮一笑:「可以考慮下既~」之後就攬實『阿壯』--即係隻公仔阿,繼續睇孽導演既戲。 

而依貓就繼續間唔中扮唔覺意經過電視機前面。 

打打罵罵就咁過左一個下午。 

如果可以以後都係咁幾好呢…… 





夜晚果餐,我同小白翻勻廚房同雪櫃之後,草草煮左啲野、食完就算。 

因為佢話想入房……睇我細個至到小學既相。 

佢話想見下同學係點樣、返學係點、校服係點。 

見到佢咁好奇、我就放低其他念頭,滿足咁耐以黎都未返過學既佢。 

由幼稚園睇到中學,由記念冊睇到班相、仲笑我小學個樣好肥、好呆,喂、個個細個都係咁架啦! 

咁就過左一個久違既安穩日,但、好像忘掉了麼…… 

「我沖涼先喇……你有無衫比我換?」小白身上仲係果條白色連身裙。 

「有,我拎入去廁所掛起佢,順便幫你開熱水啦。」





寧靜既小廳充斥住小白與花灑濺射而出的水柱相互碰撞的『切切』聲、流水聲,偶而還有一、兩聲聽得出是因舒服而呼出的小吟。

坐係小廳上既我真係--百般滋味呀!

小白沖完涼之後,就著起左我妹既一條長襯衫……岩岩蓋過短褲既長衫顯出修長既玉腿、潔白無暇。 

帶濕氣既白襯衫令小白既『餡』若隱若現。講真,果種女朋友既感覺令我馬上想撲倒小白落床。 

佢沖完之後就到我,間屋就得我同小白、既然佢又默認我地既關係……仲當我求埋婚--!

但--乘人之危,同隻禽獸、同隻689又有咩分別?

雖然不停猶豫、矛盾、內心交戰,但最後我都係放棄念頭、因為事情好像還欠缺了什麼……





好啦,雖然理智已經控制左我自己唔咁做、但到我沖完涼出返黎之後,直情連機會都無埋、因為佢早已經抱住另一個『阿壯』訓著左。

我摸摸小白個頭,帶倦意既我就爬上床同佢一齊訓。睇黎我都改善左睡眠習慣,跟圍村人一樣早訓左好多。 

* 

『啪啪啪!』一陣騷亂嘈醒左我。 

個天未仲光,應該係深夜時份。 

擘大少少眼,發現小白唔係我身邊! 

『啪啪啪!』好似有人係門外面拍到鐵閘…… 

睡眼朦鬆既我走過門口既防盜眼,望下出面咩事…… 





我阿爸雙眼滿佈血絲咁係咁拍緊道鐵閘…… 

正當我倒抽一口氣,由睡意正濃轉而嚇了一醒既時候。 

打算馬上開門比我阿爸。 

「草!你做咩?」左手方傳黎我阿爸既聲。 

我呆一呆,再望一次防盜眼、發現出面雙眼滿佈血絲既『阿爸』已經無影無縱。 

「無,無野。」唔通我發夢夢遊? 

「無就訓啦。」之後佢走返入房關門。 

…… 

點解頭先我無聽到我爸出黎既腳步聲、同埋開房門既聲既? 

而且、諗深一層,我又點可以肯定到,叫停我唔好開門既人--真係我『阿爸』