Welcome to Knot ~ Season 2: #105

6：25pm
我拎住一小叠文件，拉開凳，坐咗係靖、啫喱、路比同Taz面前。
後門突然傳嚟急促嘅門鈴聲，啫喱幫我去開咗門，係咁喘住氣嘅樂少衝咗入嚟。
「嗄嗄…係咪未講架？嗄…嗄…好彩…趕得切。」樂少一手就拎起啫喱俾佢嘅水，一飲而盡「呼～幾驚趕唔切！我一放工舖都唔幫老細收，就跑過嚟喇！」
 
「其實…關你咩事呢又？」Taz不屑咁問。
「咩即！咁夠唔關你事囉！你重坐足全日啦。」樂少還口。
「咩唔關我事呀？！關靖事就我事！」Taz講完，毫無顧忌咁就一啖鍚咗落靖嘅咀到。
「嘩～」唔單止樂少，其他人都因為佢嘅大膽行為而嚇咗一跳。
「得！你嬴！」樂少無奈認輸「咁但係…關我Buddy事，咪又關我事囉！」


樂少講完，又轉頭望住路比，嚇到路比向後彈開咗：「你唔係想咀埋嚟呀嘛？！雖則呢排你係女咗，但我一早當你係兄弟喎，我唔玩bbl架喎～」
「耶～好衰架你，兜口兜面咁拒絕人，好hurt架嘛！」樂少嬌嗲嘅聲線，的確係令人「精神為之一振」。
 
睇住呢對活寶貝，本來已經蹦緊咗一日嘅我，都不禁稍為放鬆，忍唔住笑咗出嚟。
「咦？Yeah！我可以令到Sky笑！」樂少誇張咁叫嚷「都話我係Sky最重要嘅人…之一啦，你哋睇我氹得佢幾開心。」
我望望眼前嘅一班人，衷心咁對佢哋講：「好多謝你哋。係你哋令我知道，無論以後條路係點，我都重有你哋陪住我。」
 
吸咗一口氣，我決定如實相告：「我諗我同Ocean之間嘅事，你哋都已經知道晒啦？」
大家互望一下對方，點一點頭。
我繼續我要講嘅嘢：「今朝我收到我台灣嗰邊，一位朋友嘅電話。」


「係咪Cyan？」路比不禁問。
我點一點頭：「Cyan係Ocean嘅朋友。係我決定離開台灣個一刻，Cyan就全權負責OC嘅一切。今朝個電話，就係佢打俾我。」
啫喱欲言又止，最後都決定要問：「有…Ocean嘅消息？」
所有人都望實我，我嘆咗口氣：「嗯～Cyan想我盡快過台灣一趙。」
 
「…你…打算幾時飛？」啫喱再問。
「我想盡快。但我搵咗幾間旅行社，因為時間太趕，都冇機位。我搵咗個朋友幫手，希望佢會有消息。」我抖擻住精神，因為跟住落嚟，我要同靖重有啫喱處理好Knot嘅情況。
我將面前的文件推咗去靖嘅面前：「靖，我想麻煩你。呢封係我嘅授權書，授權你係我唔係香港期間，全權管理Knot。我已經簽定咗幾張支票以備不時之需。基本上Knot嘅運作，Kwan仔同楊言都知，我聽日會同佢哋講。我知你都忙，所以只係想你有時間就幫我睇一睇。」
靖點一點頭，睇咗面前嘅文件，抬頭俾咗個可以令我好安心嘅笑容俾我；「放心啦，Knot唔掂，我都冇租收。我唔會俾Knot唔掂嘅。」
「係呀。」Taz又撘咀「就算靖BB唔得閒，我都可以過嚟睇架。」


 
我轉向啫喱：「啫喱，麻煩你幫我跟下Knot嘅麵包同蛋糕嘅供應。有需要，你同靖講，可以找住數俾你先。」
「…」啫喱低頭無出聲。
「有問題？」我忍唔住問。
「你係咪冇打算，叫我一齊過台灣。」啫喱抬頭嘅第一句說話，就已經令全枱氣氛有啲僵。