Welcome to Knot ~ Season 2: #106

輪到我低頭不語。
「Sorry呀啫喱…」我最後只可以無奈咁講「我諗…路比陪我過去會適合一啲。台灣個邊我好熟，又有朋友係到，唔需要擔心我。麻煩你，幫我睇住Knot，佢係我嘅心血同寄託。…拜託晒。」
 
全場一片靜默。
「Taz、樂少，你哋可唔可以帶路比過啫喱到呀？路比，可唔可以麻煩你幫我過啫喱到拎返我啲行李過嚟？我估呢一兩日我哋會飛到。」我再次提出請求。
「咁快？！」樂少俾我嚇咗一跳。
「又話冇機位？」路比問。
Taz一臉疑惑：「你嗰個咩朋友？咁勁？」
 
我只係笑一笑，並無打算披露任何資料。


到我再開口時，已經係另一個話題：「我…有嘢想同啫喱講。你哋可唔可以…」
靖首先起身：「行啦！過啫喱到執嘢啦。」
成班人跟住靖無奈咁離開咗Knot。
舖面，就只係淨低我同啫喱。
兩個人都冇講嘢，全場一片寂靜。
 
「我以為…陪你去台灣嘅會係我。」啫喱黯然咁講出佢嘅諗法。
「本來係。」我原原本本咁講出我一直嘅諗法「我本來諗住俾啲時間大家，培養下感情。我真心想幫我解開心結嘅係你，我真係諗住8月尾陪我過台灣嘅人係你。但係宜家…」
可惜，天意弄人。
 


「但係琴晚…」
「我知！我都以為經過琴晚，我可以放低一啲，但係…今朝一個電話，就已經推冧晒所有嘢…原來我一直都未ready。」
「但係我仍然唔介意去等、去陪住你…」啫喱突然拖住我隻手「我想陪你一齊去面對。」
「啫喱！我明白你嘅心意同諗法。但係…我真係唔知我呢一刻應該用咩態度同角色去面對我哋之間嘅事。」我將被拖住嘅手鬆開，語調愈嚟愈激動「我應該當Ocean係ex，定係我嘅partner呀？如果佢未死，咁我應該點做？又如果…如果佢真係死咗，我又應該點樣面對？至於你，我應該當你係朋友，定partner呀？」
再深呼吸咗一口氣，我將最大嘅心結，都打算講埋出嚟俾啫喱：「啫喱，你知唔知…當年Ocean出事前兩個星期，佢同我講，叫我俾佢玩埋個暑假，之後佢會修心養性，會少玩啲危險活動，會全心全意咁係我身邊，唔會丟低我。」
眼淚已經不由自主咁一直流落嚟：「我一直都覺得…係我害咗Ocean！唔係我講過話會擔心，佢唔會諗住chur埋個暑假，咁就唔會明知有暗湧，都堅持要落水！」
我已經泣不成聲。
啫喱無語。
 
頭開始劇痛，我用雙手抱住頭痛哭。


「啫喱…我真係好亂！俾啲時間我，去完台灣，我會俾個答案你。」
啫喱突然企咗起身，行咗埋嚟我身邊，輕輕拖我手，拉咗我起身。
佢雙手溫柔咁幫我抹眼淚，又幫我搓揉住兩邊嘅太陽穴：「我明白啦！我會好好幫你睇住Knot，等你返嚟。無論你嘅答案係咩都好，我都會等你！」
 
面對如此窩心嘅諾言，除咗眼淚，我重有乜嘢可以還俾啫喱？