Welcome to Knot ~ Season 2: #108

啫喱幫我拎咗個喼上樓。
但係唔知點解，佢係樓上逗留嘅時間，比我預期嘅耐。
15分鐘後，啫喱終於由樓上落咗嚟。
亦都係直到嗰刻，我先醒起Scarlett嘅存在。
 
「無事呀嘛？咁耐嘅？」究竟我嘅提問，係出於關心、一或妒忌呢？
「呀~ 無事。你個喼我幫你拎咗入1號房架喇。另外我都幫你同Scarlett講咗聲，佢知你會係到。」啫喱並無正視住我，反而我覺得，佢有啲似回避緊我嘅目光「我返過去先，費時Taz又拎晒我啲酒出嚟偷飲。」
啫喱一講完，就一支箭咁走咗去喇。
 
靖同路比一直都坐咗我身邊。


「啫喱佢…無事呀嘛？！」原來靖都覺得啫喱有唔妥。
「點解你個喼要拎去1號房，而唔直接拎入你間房呢？」路比提出佢嘅疑問。
 
「死火！」靖突然大叫，並且轉向我「你有冇同啫喱講過關於Scarlett嘅事？」
「邊個Scarlett？佢有咩問題？」路比完全聽唔明我同靖講緊咩。
我微微點一點頭，向路比解釋：「嗯！Scarlett係Taz係美國嘅朋友，我請咗佢暑假幫手，宜家住咗係樓上我間房，所以我個喼入咗1號房囉。」
再轉向靖：「我琴晚有同啫喱提過Scarlett係BDSM愛好者，兼對佢好有意思。叫咗佢自己小心啲架喇。」
「BDSM？」路比嘅驚呼，惹嚟我同靖嘅側目。
「細聲啲啦你！大驚小怪」靖皺住眉講「唔傷害到人，其實咩都冇所謂。最緊要係雙方都舒服、接受到。」
 


「咁…其實，你同啫喱宜家點？」路比試探式咁問。
「…」我低頭無言。
「朋友嘅作用，就係喺你諗唔通嘅時候借個腦俾你，幫你手諗。」靖搭一搭我膊頭，亦都鼓勵我去講。
「唉～」我以一聲無奈嘅嘆氣，作為我嘅說話嘅開始「我都唔知。」
「咁你鍾唔鍾意佢先？」路比急趕住問。
「我…我在意佢。佢係我心目中佔有一定嘅位置同分量。」我嘗試分析自己嘅心態「但係宜家…」
三人一陣沈默。
 
「咁你同佢…」路比吞吞吐吐「呀…你同佢算係…情侶？」
我搖頭：「應該…唔算。」


「朋友？」路比再問。
「…我哋…應該係『友達以上、戀人未滿』。」我似乎搵到個合適嘅形容詞。
「『友達以上、戀人未滿』？」但靖好似唔滿意我嘅回答「咁你哋有冇…咩先？」
路比都好關心呢條問題嘅答案，整個上身向前傾。
 
面對呢條問題，我應該點答？
「我哋…唉！」我決定以點頭及沈默，嚟回答呢條問題。
係咪我錯覺？點解我覺得路比佢面色一沈嘅？
靖就曖昧咁一笑：「床都上埋，咁重『友達以上、戀人未滿』？」
「我以為…」我低頭，好似一個做錯事嘅小朋友咁「有時間可以去培養下。」