整晚,我都瞓唔著。
有太多回憶同片段,不斷係我腦海中出現。
回憶中,有Ocean、有啫喱、還有…
 
第二日,我帶住我對熊貓眼落去舖面。
啫喱準時8:30am嚟到,大家面對面時,竟然有啲尷尬。
「嗯…早晨。」啫喱先開口。
「早晨,唔該晒你。」我客氣咁回應住。
「其實…我琴日係樓上,咩都冇做過架。咁耐先落嚟係我…我一時搞錯咗,開咗Scarlett度門,咁我同佢say sorry,咁…佢又要幫手搬過去1號房,又要同佢解釋點解你又要搬返去住,總之…總之我同佢冇嘢架。」啫喱一口氣講晒佢要講嘅說話。佢其實係咪諗咗呢段台詞好耐?點解講嘅時候咁唔自然架!
「得…得。啫喱,我信你,你唔駛咁心急。」我被啫喱嘅靦腆樣引到笑咗出嚟「我冇話唔信你,你放心啦。其實琴晚我都同Scarlett咗一晚計。原來佢唔係我哋想像中咁架,係我哋諗多咗!」


 
「Sky,你…你終於都肯笑返。」啫喱好似發現新大陸咁,對住我,自己都咧嘴而笑。
我帶點無奈咁笑:「啫喱,對唔住。」
「嘎?!做咩又講對唔住?」啫喱嘅表情有啲誇張,我相信佢係想氹我開心。
「無…我只係覺得,我好似一直都拖住你咁。放心啦,我由台灣返嚟之後,無論點都好,我都會俾個答覆你。」我重申一次我嘅承諾。
啫喱沈默咗一陣。
「…無論點都好,我都會守護住你。因為你值得!」講完,啫喱就轉身返舖頭喇。
 
7月20日星期日嘅早上,天陰大雨。
因天氣唔好,出海嘅人自然係少啲;亦都因為咁,一朝早嚟Knot食早餐嘅人唔算太多。


 
我襯冇咩人,叫咗Kwan仔、楊言同Scarlett過嚟,同佢哋交帶咗我突然要離開香港嘅事,同Knot嘅安排。
安排好一切,我先請楊言同Scarlett繼續照顧舖面,等我有時間可以同Kwan仔交代下嚟緊7、8月所有Night Party嘅處理。
「Sky。」Kwan仔係我講講下嘅期間突然問「其實你打算…係咪去咗台灣唔返嚟架?」
「嘎?點解咁講?我當然會返啦。」我理直氣壯咁講。
「咁都好啲!」Kwan仔鬆咗一口氣「我見你講到去8月底嘅booking咁長遠,我以為你唔返呀!」
「傻瓜!」我笑一笑「咪亂講。Knot係我嘅心血,我點都一定會返嚟。」
 
就係我同Kwan仔交接嘅期間,門口嘅小撞鐘響起。楊言同Scarlett好齊心咁叫咗句:「Welcome to Knot!」
我自然反應下,抬頭一望,竟然係…佢?!
已有 0 人追稿