Welcome to Knot ~ Season 2: #113

有幾耐冇見呢？應該都有一年喇。
呢一年，都只係過時過節，用whatsapp send個啲罐頭message就算。
要計，就係六月中嘅時候，我曾託過佢幫我搵H嘅資料。
 
間唔中都係啲Night Party，或者係Silence入面，聽到其他人提起過佢。
聽聞佢升咗職，亦聽聞佢身邊伴侶繼續不停轉。
但係無論傳聞如何，我都好清楚，佢同我都有一個難解嘅心結。
只係望…呢啲心結唔會跟我哋一世。
 
佢入到嚟就坐返係佢最鍾意嘅位置：吧枱前，對正我最常工作嘅位置。


我先叫Kwan仔研究下啲booking有冇問題，而自己就行咗去部咖啡機面前，開始熟練咁調配住咖啡。
 
我將一杯Hazenut Coffee放咗係枱面，另外遞咗張紙巾俾佢。
佢望一望我，我笑一笑，再指一指佢嘅膊頭。
應該係因為天雨，佢嘅膊頭有啲濕。
佢拎起紙巾，抹咗兩下，再係褲袋到拎咗個對摺咗嘅信封出嚟，係枱面到推咗過嚟俾我。
 
打開信封，一如我所料，係我同路比嘅機票。
但唯一出乎我意料嘅係…
我瞪大眼，望住眼前係到合上眼細味緊咖啡嘅佢：「商務客位？！」


直到呢一刻之前，我哋都只係用動作、眼神去交流，邊個都估唔到雙方講嘅第一句說話，係帶住咁大嘅愕然。
亦都可能因為咁，大家都笑咗出嚟。
 
佢示意想出去食煙，我就幫佢refill咗杯咖啡，同佢出咗去露天位坐。
「俾個account number我，我過返數俾你。」一坐低，我就開宗明義。
我明白因為暑假，每個機位都好緊張。我自己都撲咗好多地方，結果都係得個吉。
宜家佢搵到兩張聽日下晝就可以飛嘅商務俾我，一定係已經碌爆晒張人情咭，我無理由重要佢蝕錢俾我架。
 
「我唔想你係到左度右度，為咗張機票而計要賣幾多杯咖啡。」佢一直都眼望前方，呼出一個煙圈。
「太貴重，我唔收得。」我將機票推返俾佢。


「如果你覺得唔好意思，就包我一世係Knot免費飲咖啡啦。」佢稍為向前傾，再直視住我嘅雙眼。
「多謝你，Kyle！」無奈之下，我唯有收咗呢兩張機票。
 
我哋再冇講過任何說話。
簷篷外嘅雨水嘀嘀噠噠咁響，好似要為宜家嘅氣氛，加添幾分愁思。
對方靜靜咁飲完杯咖啡，就起身離座，踏住雨水，慢慢咁離開咗我嘅視線範圍。