Welcome to Knot ~ Season 2: #115

再唔情願，鐵盒最終都係被我打開咗。
 
Scarlett好奇咁望向盒嘅入面 - 大半盒嘅香煙。
Scarlett不明所以：「Sky？你…You don't smoke， right？」
我點一點頭，但並冇以任何言語去回答佢。
 
我隨手抽起一支煙。
微微泛黃嘅煙身，因為長期嘅擠壓，顯得有啲殘破。
煙咀嘅部份，有原字筆嘅痕跡：「2012-1-12」。
 


我輕輕一笑，開始我嘅自說自話：「Ocean佢係一個好出色嘅咖啡師。出色到…當人人都話煙同酒會影響一個人嘅味覺同嗅覺嘅時候，佢會反其道而行。佢會覺得煙同酒先可以幫佢沖調到更有味道、更有感覺嘅咖啡。」
 
我望住支煙出咗神，停頓咗幾秒，先繼續講：「佢有個好得意嘅諗法，佢相信凡事都要有所保留，唔需要去到盡、用到盡。所以無論係煙、酒、咖啡、甚至女人，佢都會事事留丁點。」
 
我又抽起另一支煙，同樣地，煙咀嘅部份用原字筆寫咗：「2012-7-25」
我苦笑一下：「每次飲酒到最後一啖，佢會留返；成包咖啡豆佢會留底最後一粒；女人，佢會係同對方最開心嗰時分手。煙…每包最後一支，佢會留底。呢，呢盒就係佢2012年開始儲嘅最後一支煙。」
 
Scarlett由我手上接過煙，望住個日期，再望一望我。
我明白佢想問咩：「啲日期，有時係只係一個好普通嘅日子，但如果佢係好煩惱嘅時候，一日可能已經chur到一包、半包煙，咁個日期，就有啲特別嘅意思。」
 


我望向枱上，我第一支抽出嚟嘅煙：「好似呢支，係我去台灣之前嘅事。究竟有冇咩特別意思，就真係只有Ocean先知。」
 
我瞄一瞄Scarlett手上支煙嘅日期：「呢日係Ocean生日後一日。佢生日正日我陪佢出海、陪佢玩，大家都過得好開心。但亦都係因為太開心，我好無安全感。我唔知幾時佢會突然趕我走、趕我返香港。人馬就係咁，最鍾意亂諗，愈諗就愈轉牛角尖。第二日天未光，我就自己拎埋行李，去咗機場搭飛機返香港。與其俾佢飛我，不如我飛佢，咁可能會瀟灑啲。到佢發現我走咗，佢就自己chur足一包煙。呢支，就係最後個支。」
 
 我將煙放近自己個鼻，嘗試吸取點點煙草嘅氣味，腦海中不期然轉住一首歌：
「…想念你的笑　想念你的外套
想念你白色襪子　和你身上的味道
我想念你的吻　和手指淡淡煙草味道
記憶中曾被愛的味道…」