Welcome to Knot ~ Season 2: #116

故事已經講咗大約7、8個小片段。
Scarlett就只係靜靜咁聽，從無質疑過我講嘅任何內容。
其實Scarlett個頭腦真係好清晰，所有片段都唔依時序，但佢仍然可以好清醒咁去聽同組合。
 
我同Scarlett兩個不時由鐵盒抽出煙，再由我去講解背後嘅故事。
其實好多時都係我去抽，就只有當我沈溺係回憶太耐嘅時候，Scarlett先會主動咁去抽一支煙，將我由一個回憶漩渦拉去另一個。
 
望著手上寫有「2012-8-1」嘅煙，我輕輕一笑：「呢支…係佢嚟咗香港搵咗我好耐之後，第一次我終於肯見佢！」
我停咗一停，飲咗啖水：「嗰時佢真係煩咗路比好耐，路比死都唔肯講，係我唔想佢煩到路比，先主動約佢。」
回憶令我開始甜笑：「我記得嗰日約咗係尖沙咀。我去到嘅時候，就見到佢一個Kai子…即係傻仔呀…咁行嚟行去。你知唔知佢抬頭見到我個刻，佢個表情係…興奮、失而復得、但又怕嚇走我。總之之後俾我笑咗好耐。佢後尾佢同我講，呢包煙係佢係香港食過最苦嘅煙，因為等候見我嘅味道，係好苦好苦喎。」


講到呢到，我又陷入回憶嘅洪流，回想起我倆嘅片段…
 
Scarlett見我咁，就隨即抽出另一支煙。
相對其他嘅煙，呢一支煙身比較白同「堅挺」。煙咀上嘅日期，係「2013-7-13」。
「This one…」Scarlett對呢支煙所帶來嘅日期，顯得有啲愕然「This one looks quite "update"！2013，舊年？」
我點一點頭：「呢支係我留底架。」我深深咁吸咗口氣。
房間早就因為呢盒「陳年煙」而充斥住煙草味。
 
我邊苦笑，邊解釋：「自從Ocean出咗事，我覺得個世界好似咩都係灰黑色，我好掛住佢。但記憶中，佢嘅味道開始減退，我好想留住佢嘅氣味；但同時我亦好清楚自己唔會食煙。所以我有時會買包煙，點著佢由得佢燒…等我可以回憶下佢嘅氣味。」
我輕輕嘆咗口氣：「呢支，係因為我曾經遇上一個可以牽動到我個心嘅人，我以為佢可以救到我。點知…原來佢自己都自身難保。最後我選擇點咗19支煙去俾自己舒發下，呢一支，係第20支。」


 
Scarlett定眼望住我：「就係今朝早…你冇乜同佢講過嘢嘅嗰個人？！」
我苦笑，點一點頭。