多得Kyle幫忙,我同路比先可以係呢個咁繁忙嘅暑假到,有兩個咁舒服嘅商務機位飛去台灣。
 
呢次嘅旅程,對路比嚟講,似乎係一個開心嘅開始。
由佢登機個一刻開始,佢一直就係座位上左㩒右摸,唔諗住放過任何一個設施。
見佢玩得咁開心,坐近窗邊嘅我都忍唔住望住咗佢。
 
「呀~」路比終於發現我嘅目光「Sorry呀Sky!我都知我好似太興奮。咁你今次過台灣又唔係去玩,我無理由咁開心嘅。Sorry Sorry!」
我笑笑搖一搖頭:「咪傻啦,邊關事?!我見你玩到好似個小朋友得咁開心,都覺得開心。」
 
「吓?!真係架?」路比似乎受到鼓勵咁「咁我繼續玩得開心啲俾你睇。」


「咪玩啦。」我真係忍唔住捉住佢隻手「一陣俾人趕你落機呀。」
「嘻嘻…」路比突然唔好意思起嚟「其實呢…我好驚起飛同降落嗰下。Sky你可唔可以…一陣起飛個時…借隻手我拖住呀?」
「當然可以。」我本能反應回答,但係又覺得有啲唔妥「但係你…驚飛機起飛同降落架咩?以前都唔覺你係咁架?!」
「呀…係囉,唔知係咪人老咗,所以驚死啲啩。」路比一邊講,就已經一手拖實咗我。
我都冇佢咁好氣,由得佢拖住,再轉頭望住我最愛嘅天。
 
兩個鐘唔駛嘅機程,好快就完。
當飛機LAND咗嘅時候,我抽返被路比再一次拖住嘅手,因為我想望一望錶。
時間係5pm。
我同路比依依不捨咁離開舒適嘅機位,向住桃園機場嘅入境櫃位出發。


 
出咗離境大堂,我見到一個熟悉嘅身影 - Cyan。
對上一次見面,已經係大半年前嘅事,當時佢同佢女朋友小淇嚟香港玩,重住咗係Knot。
如果計上一次係台灣見,就更加係年半前嘅事。當時我已經返咗香港,但個幾月都會飛過台灣一次,為嘅就係希望可以盡快收到有關Ocean嘅消息。
嗰時,都係Cyan車接我往返機場。
嗰時,我都係住係OC。
 
Cyan見到我同路比都顯得好興奮,分別同我哋都擁抱咗一陣。
「Sky、路比,你們好。好久不見啦。還好嗎?」Cyan不失台灣人嘅熱情咁同我哋擁抱住。
「還好啦!小淇呢?」我忍唔住四處張望。


「她在OC等你們呀!來,走吧。」我同路比各自拉住自己嘅行李,跟住Cyan向停車場出發。
已有 0 人追稿