Welcome to Knot ~ Season 2: #138. 樂少

死就死啦！


「好！係你叫我直接問架。」
我吞一吞口水，又暗暗吸咗啖氣：「其實我唔係想知我係你第幾個partner，我只係想知你對我係咪真心。我唔想我對住你就痴心一片，但你就當我痴9咗線。你以前點玩點蒲我唔理，我只係唔想同你一齊嘅時候，你重會好似以前咁玩，或者其實係玩緊我！我…我輸唔起！」
 
青聽完我一輪嘴咁講，就只係繼續瞪大對眼望實我。
但我開始留意到佢胸口有啲起伏，應該都係開始激動嘅先兆。
唔知係咪頭先用晒啲勇氣，宜家見到青咁樣，我開始有啲淆底。
我慢慢咁將自己個屁股，移開少少…少少…再少少，希望可以拉開我同青嘅距離，心諗：「就算佢車巴埋嚟，我都可以反應得切啩。」


 
青突然擘大個口，大啖大啖咁吸氣。
而我，亦都做好心理準備，預備迎接青的怒吼！
「姚樂天！」女人真係往往會俾到好多意料之外你。青溫柔咁呼喚我嘅全名，不禁令我全身都軟晒。
 
「咩…咩事？」我決定先自隊半罐啤酒，壯一壯膽。
青伸手搶咗我手中個半罐啤酒，又係一飲而盡。
「呼～」青重重咁呼咗啖酒氣，再抬頭望實我「姚樂天，你同我聽清楚！」
「咩…咩呀？聽咩呀？」我吞吞吐吐咁問。
「我都知…紙係包唔住火，遲早都會有人同你報寸！」青幽幽咁講「我認，我係識你之前玩得好癲。但遇到你，唔知點解…我就好想定落嚟。」


「我？！」究竟我做過啲咩呢？「我做咗啲咩呀？」「唔好問我點解，我都唔知！」青又再開一罐啤酒「以前…我都係同TB一齊，no label…都係第一次。唔知係咪因為大家個關係再平等啲，冇話一定要B去照顧G，我會覺得舒服啲呢？」
 
「吓？！」我繼續只係識得係到天然呆，都唔知俾咩反應好。
「你唔信？」青微微將頭側埋一邊，嘟住咀、瞪大眼咁望住我！噢！呢個無辜樣，你叫我點頂？！
青見我繼續天然呆，就繼續講：「我講真架！以前我係點，我唔想再多講。我只係想俾你知我真心想定落嚟，我…我真心想同姚樂天一齊，你明唔明？」
 
就係青嘟住咀哄埋嚟嘅一刻…
呢一刻我真係忍唔住，要爆喇！
我一手將青向自己一拉，青順勢就跌入我懷抱。我輕輕托起佢個頭，再使出我嘅迷死人眼神，情深咁望實青：「Babe！話我知你唔係玩我嘅。哼？！」
青由下而上咁望住我，輕輕咁點頭：「嗯！我係真心想同你行落去，唔係玩你。」


佢對水汪汪嘅大眼睛，開開合合嘅朱唇，再加上呢個仰望嘅角度，想殺死人咩？！