Welcome to Knot ~ Season 2: #139. 樂少

我再忍唔住，一手將眼前人大力攬實，並且以強硬嘅姿態，向住青嘅咀係咁鍚落去。
兩個人四片唇，開始係到糾纏不清。
我強悍而貪婪地吸啜住青嘅香舌，完全唔俾空間佢去抖氣。
 
我雙手開始由輕撫佢塊面，慢慢演變成輕掃佢嘅肩頸，最後再變到開始不安份咁係佢身上亂摸。
「嗯…嗯嗯～」由於咀已經被我嘅吻封住，青只能由喉嚨間發出引人遐想嘅輕叫聲。
 
唔知係出於「報復」定「需要」，青嘅雙手都開始係我背脊亂摸，甚至乎已經向我嘅胸進攻！
「喂！」忍唔住鬆開吸啜緊青嘅咀，低頭叫停咗呢個女色魔「乜咁猴架你！」
「嘻嘻～咩喎！你夠摸我囉！」青紅住臉咁講，真係…呀！忍得好辛苦呀！


 
我二話不說，一手就拉住青嘅小手。
係，我深明呢一刻，根據劇情嘅推進，冇理由唔係繼續嚟個深深嘅擁吻。
但有所不知嘅係，本尊真係唔多喜歡當街當巷做真人Show俾人睇。
所以呢，我一手就拉住青，跑咗去的士站同青上咗架的士，好chok咁同司機講：「師傅，用你最快嘅方法，同我去上環。快！」
 
呢個師傅真係唔講笑，佢粒聲唔出來，好專注咁望住前面，雙手握實軚盤，腳亦到踏行油門。
「樂…不如去你到呀！」青由上車，就開始不安咁郁嚟郁去。
「吓？！去我到有排都未到喎！去你到唔係快啲咩？」我真係理解唔到青諗緊咩。
「我…我嗰到…嗯…唔係太方便嘛！」青吞吞吐吐咁講。


「怕咩喎？！你唔係話自己一個人住架咩？」我忍唔住提高咗聲線去問佢。
「…係…係，我係一個人住，但係…」青都未嚟得切講完，車手師傅已經好快手咁將我哋送到去青屋企嘅樓下。
 
「Baby，快！我哋快啲上去！」我急不及待想拉青上樓，點知…
 青竟然將我拉住咗：「樂…我…」
「做咩呀？」我不禁回頭攬實眼前人。
「我…我…」青邊想推開我，邊尷尬咁低住頭講。
我又邊會咁輕易放開佢呢：「做咩事啫？你由上車到宜家，就奇奇怪怪咁，係咪有咩問題呀？」
青再一次好大力，而且成功咁推開咗我：「樂…其實我…」




「青！！」一把雄厚嘅聲音，由大廈門口到傳過嚟。
我回頭一望，一個身型高大的男人企咗係大閘口，好似有啲嬲怒咁啤行我。
我忍唔住一邊望住呢個男人，一邊細細聲咁問青：「佢係…你亞哥呀？」
青並無回答我，反而係一枝箭咁跑埋去個男人到：「Teddy？！做咩會落嚟嘅？」
嗰個叫Teddy嘅男人一手拖住青：「見你放咗工咁耐都未翻，唔係落嚟搵下你囉！佢係邊個？」

青尷尬地望下我：「樂，呢位係Teddy，我…partner。Teddy，佢係樂，係我潛水班嘅朋友。我…頭先放工見到樂，咪同佢飲杯野，傾左陣計囉。佢好好人，送我返嚟之嘛！樂，唔該晒你！聽日…潛水班見啦！」
青講完一大段我聽唔明嘅說話，就拉住嗰個Teddy，行咗入去大廈入邊，留低我一個係到。

Partner… Teddy係TB？！係青partner？！
咁…咁我係咩？潛水班同學？！
青…Shit! What the fxck!