Welcome to Knot ~ Season 2: #177. 啫喱

靜靜咁坐咗係「海天相連」嘅小露台，耳邊傳嚟嘅，除咗風聲同海浪聲，就只有匙羹搞動咖啡，同咖啡杯碰撞時所發出嘅撞擊聲。
「喂，你咪再搞喇。搞到入晒風，一陣肚痛你就知死。」對住面前呢個人，有時我都覺得自己太過“怪獸”。
Sky扁一扁咀，就放低咗隻匙羹:「你以為我重係BB咩？！入風！」
「哈哈哈～」我忍唔住笑咗出嚟「咁你知你係我心目中，永遠都係BB！」
Sky白咗我一眼:「咁你都知你永遠都係我嘅Oppa。」
Sky呢刻可以窒返我轉頭，我就知，我一直所認識嘅Sky已經追咗嚟，歸咗位喇。
 
30分鐘前…
Sky拎住兩杯熱咖啡，由工作台到行咗出嚟，向呢個啱啱返到嚟OC嘅我示意跟住佢上樓。
我知，我一路跟住佢行，OC嘅人就一路望住我，包括路比。


 
我哋坐咗係小露台，正當我重盤算緊點開口，Sky就已經開咗聲:「呢個地方，對我嚟講真係有太多回憶。」
「我知。」我暗暗嘆咗啖氣。「但人唔可以齋活係回憶中。」
「我都知。」Sky慢慢將望住個海嘅目光，轉為向住我。「其實我都諗住搵你坐底傾下，點知你就先搵我。」
我定定咁望實Sky，而出奇地，佢冇回避到:「因為我同你太過相似，我都有嘢要同你講。今次可以讓我先嘛？」
Sky輕輕咁點一點頭。
「我訂咗機票，今晚返香港。」
Sky瞪大對眼望實我，似乎想望穿我個頭，睇下我個腦諗緊啲咩。
「我知你係呢到重需要啲時間去處理，我又幫唔到咩手，不如返去幫你睇住Knot好過啦！」
「啫喱…你…？」


「傻妹，我知你一直都想我係幫你解心結嘅人，我何嘗唔想呀？！但嚟咗幾曰，我諗通咗啲嘢。自己嘅心結，應該自己解，你需要咁，我都要。你嘅心結係Ocean，而我相信，你已經解咗。我嘅心結…就係你。所以呢，我需要啲時間去冷靜下。」
Sky無出聲，就只係將目光放返係出面嘅海。
「我知道，最佳嘅時間已經錯過咗。」我又嘆咗一口氣。「我同你，就係timing唔啱。錯過咗就係錯過咗，無計。」拎起面前杯咖啡，我一飲而盡。
「我哋…」Sky終於開口。
「我哋永遠都係好朋友，好拍檔。」呢句說話，其實我頭先係車到已經練習咗過百次點去講。
「唔得！」反而Sky嘅反應，係出乎咗我意料。「我想做兩兄妹。你要繼續做我嘅好Oppa！」
 
我真係俾個傻妹激死。
我笑咗出嚟，伸長手臂，係佢頭上拍咗兩下:「乖~妹妹乖~」
兩個嬉笑咗陣，Sky突然好正經咁講:「其實你要講嘅嘢，同我想講嘅差唔多。不過我想加句 - Oppa，我信你。我信你同Spica無發生過任何事。」


對於呢份信心同交心，我只能覺得…好可惜我錯過咗一個咁好嘅女仔:「對我咁有信心呀？！」
 
Sky只係對住我笑咗笑，拎起咖啡杯向我敬咗一敬，跟住就無出過聲。
呢啲，可能就係心照。