果晚返到去,我問左老豆一啲關於耀哥嘅野。從老豆口中得知,旺角舖一向都係彪哥負責嘅,
所以旺角舖所有嘅員工都係由彪哥請返離,至於主管依個位點解會比耀哥坐呢,就連老豆都唔知。
雖然話彪哥走左佬,佢之前請落嘅人都應該踢走姐,但係冇證冇據,冇理由莫須有咁踢人走嘅,
咁做會好影響其他員工嘅士氣,亦都會比人覺得老闆係一個唔講道理嘅人,
所以就算要炒佢,都真係要搵到一啲佢出賣公司或者嚴重錯失嘅證據先可以。
老豆仲叫我暫時唔好打草驚蛇住,等時機成熟先煎佢地嘅皮,拆佢地嘅骨喎,
講到好似研究點食乳豬咁。
 
第二日好快又到啦,今日我繼續如常返工,但係今朝返到去,咦...點解多左一個人喺度嘅?
同Yvonne一樣都係一個中年女人,我諗差唔多有五十歲,好瘦好細粒、短髮、




衣著方面同Yvonne完全相反,Yvonne 係典型OL look,而依個女人就著左拖鞋、
爛牛仔短褲同背心,大髀上面仲有個紅玫瑰紋身添,到底依個咩人離架?
 
「阿肥...依幾份標書,今日之內搞掂佢!」女人點緊阿肥做野,睇離有啲power咁款。
 
「...咦...依個邊個離架?」女人留意到我嘅存在。
 
「...係...係新離嘅司機。」詠恩回應。
 
「...哦!」女人哦左一聲望一望我,之後就冇理到我做自己野啦。




 
「...喂...你地搞咩架,我個客詐哂型啦,跟緊啲得嘛?」過左一陣,女人忽然走左埋耀哥度開佢火喎。
 
內容大至係話耀哥佢地跟啲野跟得唔好,搞到女人個客比說話佢聽,
不過女人有女人講,耀哥一於小理,繼續hea佢...係咁易點吓頭咁,
搞到女人都冇哂佢符,之後仲嬲嬲地咁捉左詠恩入pantry度briefing佢添,殺氣非常之重。
 
幾個字之後,詠恩佢地出返離,女人好快又出左去,
而詠恩亦都好快整好啲單,之後同我一齊過左倉度執貨啦。
 




「...喂...果個女人乜水離,好似好有power咁嘅,連耀哥都忌佢三分咁喎!」執緊貨果陣我問。
 
「...點解你咁多問題架,以前識你都唔係咁嘅!」詠恩一邊點貨一邊回應。
 
「...咁係點架?」我回應。
 
「......!」詠恩好似忽然諗起啲野咁,deadair 左冇應到我,
為左令大家冇咁尷尬,我冇再問野...好專心咁繼續執貨,
但係過左幾分鐘之後...
 
「...果個女人叫mandy係我阿姐離嘅,聽講係全公司最top嘅sales,
據傳全公司有一半嘅生意都係佢接返離,所以連耀哥都要比面佢。」
詠恩忽然間又肯答我喎。
 
「...你跟佢嘅?」我問。




 
「...算係啦,阿肥就跟Yvonne啲野多啲嘅!」詠恩回應。
 
「...有冇辦公室政治架?」我再問。
 
「...講真,邊間公司冇吖!」詠恩好理所當然咁答。
 
「...唔怪得啦!」我講。
 
「...咩呀?」詠恩問。
 
「...唔怪得個阿肥好似唔洗做咁啦,乜都比哂你做。」我回應。
 
「...人地埋到耀哥堆吖嘛,仲有Yvonne係耀哥喺第二間公司帶過離嘅...緊friend架,
mandy姐幾做得野都冇用啦。」詠恩有啲無奈咁講。




 
「...乜依度都搞小圈子架?」我有啲驚訝咁問。
 
「...邊間公司冇吖,唔好理咁多,做自己咪算囉。」詠恩繼續念念有詞,好似睇得好化咁。
 
「....嘟嘟...!」傾傾吓,詠恩忽然電話響喎。
 
「...喂...係...mandy姐!」應該mandy打比佢。
 
「...哦...哦...,你等等,mandy姐搵你喎!」詠恩講講吓隊左個電話比我,唔知搞咩呢?
 
「...喂...阿聰牙!」mandy姐笑笑口咁講。
 
「...係!」我回應。
 




「...唔好意思呀,我個客忽然要我即刻過去佢度睇睇個場,
唔知可唔可以車一車我過去先呢?」mandy姐好有禮貌咁問,
睇離佢份人都冇想像中咁差姐。
 
「...哦,是但囉!」我輕鬆回應,就係咁...詠恩好緊張咁拿拿聲執埋要送嘅貨比我,
我就開左部車過去公司接mandy姐啦。
 
「...唔該哂聰,阿恩唔好返上去啦,跟埋我去幫手。」mandy姐一揪二掕咁,
拎住好多野上車,仲捉埋詠恩去添。
 
其實佢地要去嘅地方都真係有啲遠,係元朗嘅一個大型商場,好型果個點呢,
我去到商場門口放低佢地都已經成十二點咁濟啦,拿拿臨出返九龍送完第一單貨都差唔多成點鐘啦,
快手做多兩單,泊低部車食飯已經兩點幾,今日真係多貨送,
食完飯即刻跳返上車諗住可以快啲派哂啲野佢可以準時收工啦,
點知今日真係超塞車,直頭係去到邊塞到邊,幾經辛苦先派完最後一張單,




望望隻錶已經成七點鐘咁濟,仲要喺屯門,返到出旺角收工最快都七點半。
 
「...嘟...嘟...!」正當我坐喺部車度飲緊可樂,準備開車回程果陣,電話忽然響起。
 
「.....!」我拎起個電話,猶豫左一陣諗緊聽唔聽,因為係一個不知名嘅電話號碼。
 
「...喂!邊位?」最後我都係聽左,因為驚係啲客call。
 
「...喂,阿聰牙!」一把女人聲,把聲好熟咁喎。
 
「...係!邊位?」我回應。
 
「...mandy呀!」原來係mandy。
 
「...哦!點呢?」我問。
 
「...收左工未呀?」mandy有啲唔好意思咁問。
 
「...未,喺屯門啱啱送完貨諗住開車返旺角。」我回應。
 
「...唔知可唔可以入一入離元朗接一接我呢?」mandy繼續用唔好意思嘅語氣問。
 
「...ok!」屯門入元朗都好近姐,所以我好快就應承左,唉...睇離冇八點半都收唔到工啦。
 
我劈住入去都要成廿分鐘先到,入到商場上落客區,
離遠已經見到mandy姐企左喺度黑哂口面咁,身邊仲有一大堆雜物,
再望望...乜...原來連詠恩都未收工,而家企左喺堆雜物隔離。
 
我即時落車打開度車門,叫佢地上車坐低先,啲雜物緊係留返比我搞啦。
搬哂啲野上車之後,我就開車送佢地返公司啦。
 
「...阿恩!你都唔係第一次架啦,錯完又錯...搞咩架你!」開車無耐...mandy姐開始插詠恩,
仲越插越high,不過聽落詠恩又的確係幫唔落嘅,以前識佢果陣都已經係出名大懵,
成日好似發緊夢咁,但係估唔到詠恩出離做野之後都冇咩點變,上次已經唔記得帶倉匙,
今次聽到佢幫個客落單又落錯,叫佢帶啲樣板去佢又錯咁真係搞唔掂架喎。
 
「.......!」眼見詠恩只係頭耷耷咁不斷點頭,我又咩都幫唔到佢,唉....真係慘。
 
好快我就車到佢地返旺角,我地一齊將啲雜物質返哂入倉之後呢,
mandy姐就自己走左啦。眼見得我同詠恩兩個喺度咁好機會我無理由會唔好好把握架。
 
「...唔該哂!」詠恩細細聲咁講。
 
「...唔洗客氣!」我回應。
 
「...係呢,洗唔洗返去煮飯呀?」我問。
 
「...吓...er...今日收咁晏,叫左阿媽煮。」詠恩回應。
 
「...咁...不如一齊食飯囉。」我膽粗粗咁問。
 
「...咁樣...樣!」詠恩有嘅猶豫。
 
「...洗衣街果邊有間一人一鍋邊爐喎,不如試吓囉!」我繼續進攻,
因為我知道詠思都幾鍾意打邊爐嘅,之前聽小苑講,好多時冇乜時間買餸
,詠恩就會去超市求其執啲野返去打邊爐就算。
 
「...好!」詠恩只係諗左幾秒,竟然咁爽快就應承左,連我都打左個突!
 
「...咁...咁行啦!」我講,就係咁...今次就係我地散左之後嘅第一次約會啦。
 
我帶頭慢慢咁行過去洗衣街果邊,詠恩就跟喺我後面,
行緊果陣...我每行幾十米都會回頭望一望,好驚行行吓擰返轉頭詠恩會失左蹤咁,
但係每次詠恩都係發緊呆咁跟喺我後一兩個身位,就好似領隊帶住團友咁款,
...詠恩呀...你可唔可以跟貼啲架?
 
行左十零分鐘左右,就去到洗衣街,但係....點解....