「...咦...!」點解間舖頭,唔見左嘅?
 
「.....!」我而家好驚訝咁左望右望。
 
「...噢...原來...執左笠!」我講。
 
「...嗯...!」詠恩回應,死啦...點算好呢,打亂哂我嘅部署添。
 
「...我知有間叫(一鍋豐)都ok架,試唔試吓吖?」詠恩竟然開口提議?
 




「...哦...好...好吖!」我回應,就係咁...而家掉轉頭由詠恩帶返我行。
 
今次到我喺後面望住詠恩嘅背影,詠恩今日同平時一樣,只係著住好普通嘅t恤,
牛仔短褲,加上素顏...完全不修邊幅,但係已經深深咁吸引住我。
行左五分鐘左右,就到左詠恩講果間(一鍋豐)啦。
 
「...歡迎光臨,幾多位呢?」門口女員工好有禮貌咁問。
 
「...兩位...唔該!」詠恩豎起兩隻手指回應。
 




「...ok,依邊吖兩位!」竟然唔洗等位就入得喎,話哂都旺角吖...真好彩,
眼見其實啲位都full full地,就係淨返一張雙人卡位喺度,可能打得邊爐嘅,
多數都成班人掛。
 
一坐低詠恩就隊左啲紙埋離,睇睇先...原來係任飲任食放題,
是但啦...唔洗煩吖嘛。就係咁...我發板揀左最貴有海鮮食嘅價錢,
之後就叫詠恩點野食啦。
 
「...唔緊要啦,我請啦!」我開心回應。
 




「...咁...咁...唔抵吖嘛!」詠恩有小小唔好意思咁細細聲講。
 
「...你食多啲咪抵返囉,你食到架!」我笑笑口回應。
 
「...咩...咩喎,講到我咁大食咁。」詠恩回應,就係咁...我地再一次兩個人約會。

其實只係同事收工一齊去食飯姐,
不過咁嘅機會就好似等左好耐好耐咁。
 
詠恩本身係一個慳妹,平時買野、食野都諗過度過咁,
所以知道我叫左最貴嘅(海鮮任食套餐)佢緊係唔會洩底啦,
係咁點左好多海鮮。待應亦都好快拎左好多野食離,效率非常之高。
 
「...點解有午餐肉架?」詠恩有啲驚訝咁問,
 




「...我叫架!」我回應。
 
「......!」詠恩欲言又止,可能係覺得叫午餐肉唔抵啦,
但係我諗佢記得我鍾意食,所以收左聲。
 
「...係呢...,mandy姐份人點架?」我問。
 
「...其實幾好人架,你唔好睇佢成日都鬧人咁,
佢份人工作認真咋嘛,我知架!」詠恩認真回應。
 
「...但係睇個勢Yvonne 好似同公司啲人關係好啲喎!」我回應。
 
「...Yvonne係好識做人嘅,但係講做野點都係mandy好啲,樣樣都跟到勁足,
所...所以咪易得罪人囉,相反Yvonne 有時做野會得過且過,
咁啲同事覺得佢冇咁麻煩咪鍾意佢多啲囉!」詠恩講。




 
「...咁認真唔係唔啱,之但係有時都要識人情世故架嘛!」我回應。
 
「...有用咩,聽講之前mandy姐頂撞左老細,
之後好多時佢有啲咩意見想同上面啲人講都冇人聽!」詠恩冷淡回應。
 
「...得罪邊個老細呀?」我問。
 
「...咁...咁我又唔知喎,我地啲咁嘅職員仔,邊會咁易見到啲老細吖,
通常每個月都會有個老細落我地舖,我諗係果個老細掛,
講開又講...果個老細今個月仲未落離喎,咁奇怪嘅!」詠恩講。
 
「...有好多個老細架咩?」我繼續問。
 
「...好似有兩個,但係另外果個我就未見過啦。」詠恩諗一諗之後講,




鬼咩...佢講果個應該就係走左路嘅彪哥,緊係唔會再出現啦。
 
「...快啲食野啦,仲係掛住講多過食!」講到依度,詠恩就質左啲野食落我個碗度啦。
 
睇住詠恩食野個樣,再次重拾返當年嘅影像,睇住詠恩係咁食、係咁食,成個小林尊咁,
而我就好似冇食過野咁,時間好快就過,話咁快就已經夠鐘埋單。
我提議送詠恩返屋企,但係詠恩好似有啲錯愕咁,話我住得遠又冇揸車,所以拒絕左我。
算啦...我都知依啲野急唔離,同佢單獨食飯已經令我地嘅距離近左一大步架啦。
 
返到屋企,我如常咁沖涼換衫,搞掂哂之後,我挨住張床撳左一陣電話,忽然....
 
「....鈴鈴~」電話響起,竟然係思敏,而且...仲要係一個FaceTime,我到底...接唔接好呢?
 
「...喂...!」終於...幾秒後...我接聽左!
 




螢幕顯示清楚見到思敏,化左小小妝,普通t恤、短褲...,
地點應該係佢屋企自己間房入面,都成十一點幾啦,咁夜做乜呀到底?
 
「...嘩...做...做咩呀,咁夜嘅?」我有啲驚訝咁問。
 
「...聰...同各位觀眾打聲招呼先啦,做緊直播架!」思敏望一望我,
之後鏡頭對住佢屋企電腦個鏡頭,到...到底發生緊咩事?
 
「...吓...er...hi!」我好敷衍咁向住個鏡頭揮左幾吓手!
 
「...拿...各位睇緊直播嘅巴絲,離緊我嘅Channel,
會同歌手張敬聰crossover一齊為大家落區,介紹各區唔同嘅隱世美食,
大家記住訂閱我(大食懶花花花)嘅channel,密切留意啦... bye-bye!」
思敏講完BYEBYE就撳熄左個鏡頭啦。

「...搞咩呀思敏,乜野(大食懶花花花)姐?」我有啲疑惑咁問。
 
「...嘻嘻~冇呀,近排開左個YouTube 頻道,介紹野食嘅,
諗住搵你幫吓手谷吓啲人氣咁囉!」思敏輕鬆回應。
 
「...我咩都唔識邊幫到你架!」我無奈回應。
 
「...我識咪得囉,你話哂都係歌手,點都有啲知名度嘅,你淨係出現就得架啦,
其他野就交比我搞啦!」思敏一於少理,繼續拍哂心口咁,話咩都交比佢。
 
就係咁,喺半推半就嘅情況下我應承咗思敏。我唔知係因為感激佢幫左我老豆,
定係可憐佢之前嘅遭遇,或者係我對佢嘅傷害嘅內疚啦,總之思敏叫我幫手嘅野,
基本上我都冇能力或者冇理由去推。
 
同思敏傾左陣就收左線,佢個節目嘅詳細內容思敏亦都冇乜點交代,
只係話過幾日應該會約我出去食飯,順便拍第一條片咁囉!
到時又唔知要搞啲咩野啦,希望唔係啲咩麻煩野就得啦。
 
就係咁...好快又到第二日。今日耀哥叫左詠恩去倉度點貨,基本上全日都冇見過詠恩咁濟,
無計啦...做野緊要吖嘛,之但係...平時耀哥都真係好小會親自出手架喎,
吖...點解今次又會咁落力呢,真係不可思議呀!
 
就喺臨收工坐左喺度等緊打咭果陣...詠恩同耀哥終於都返左離,
詠恩仲拎住成堆單,上氣唔接下氣咁張啲單放返喺自己枱頭。
 
「...好忙牙?」我走左埋去佢枱邊。
 
「...係呀,做咩呀?」詠恩有啲唔耐煩咁一邊整理文件一邊回應,
鬼咩夠哂鐘都未走到,炆都好正常嘅。
 
「...冇....問吓姐!」我回應。
 
「....啪!」依個時候...忽然傳離開門聲,因為依個時間雖然文員同司機嘅我準備收工姐,
但係舖頭仲營業中,所以有客走入離係好合理嘅事,所以我都不以為然。
 
「...hi,耀哥!」一個男人走左入離,身後仲有個女仔添,咦...咪住先,個女仔咪...
 
「...咁晏呀,力王!」耀哥回應,睇離佢地都幾friend吓喎!
 
「...冇呀,帶個新人落離set場咋嘛,唔洗理我...自己搞掂得架啦!」男人笑笑口,
一邊講一邊帶住個女仔行左去其中一個場景位置度,而依個女仔...其實就係我個妹...
文蔚!吖...乜個衰妹今日返工咩?冇聽佢提過嘅!
 
我同佢暗中打左個眼色,之後佢就好留心咁聽住個男人講解一啲細節啦。個男人睇落四十歲左右,
170高左右、中等身材,留有一把長髮簡直就係(破壞之王)入面反派(黑熊)嘅反版,
帶住副眼鏡可能ARMANI所以千祈唔好整到佢,面上總係帶點笑容,講野非常斯文,睇得出係一個好好相與嘅人,
但係點解會叫做力王嘅?睇離佢就係老豆講好掂果個室內設計師,希望阿妹真係跟佢學到野啦。