「...喂!!」
 
「...喂!!!」原來詠恩叫緊我。
 
「...係...做...做咩呀?」我回頭問。
 
「...夠鐘啦喎,仲唔走?」詠恩問。
 
「...咦..哈哈...係喎,係喎!」我笑笑口回應。
 




「...做咩呀?」詠恩見我仲未行,有啲疑惑咁問。
 
「...冇呀,今晚屋企冇煮飯,都唔知食乜好!」我尷尬回應。
 
「...旺角大把野食啦!」詠恩回應。
 
「...係呢,你今晚洗唔洗返去煮飯呀?」我再問。
 
「...今晚牙...!做....做咩姐?」詠恩開頭好認真咁諗左一諗,之後有啲緊張咁問。
 




「...冇...今晚屋企又冇煮飯,睇吓你有冇飯開姐,如果冇嘅話,
我知道佐敦有間粥底邊爐好正架,咁......!」我講到依度。
 
「...咁...咩...呀?」詠恩回應。
 
「...咁...不如一齊試吓囉?」我再問。
 
「...er......!」詠恩諗緊...個樣有啲猶豫不決咁,到底佢考慮緊啲咩呢?
 
「...唔...唔好啦,仲有啲手尾未跟,下次先啦!」結果詠恩都係拒絕左。




可能連續食兩晚又真係多左啲嘅,咁唯有下次先再約過啦。
 
比佢拒絕左之後,我唯有一個人死死氣走啦。落到街漫無目的咁遊,行到附近間美心快餐,
好嘅一餐唔好嘅又一餐,行左入去是但叫左個焗豬扒飯就坐埋一邊食自己啦。
食緊果陣我諗吓諗吓,老大都好耐冇搵過我啦喎,之前唔係講好左一有浠琳身世消息就即刻通知我架咩?
奇怪啦...隔左咁耐都冇聲冇氣嘅,唔通...份報告...真係攞唔返?
 
正當我諗到入哂神嘅時候,詠恩竟然出現。
 
「.....!」佢啱啱買完野食,捧住個餐盤行緊過離,見到我之後...
又係成個人呆哂唔知點算咁嘅樣。可能覺得啱啱先拒絕完我約佢食飯,
轉個頭又自己走左離食唔好意思啦,但係眼見周圍啲枱都坐滿人咁濟,
而且已經比我見到嘅情況下,詠恩唯有好無奈咁向住我行埋離。
 
「...坐吖!」我起一起身講,於是詠恩坐左埋我對面。




 
「...唔好意思呀,因為我趕時間,所以諗住快快翠翠食完個飯走囉!」詠恩主動解釋。
 
「...冇野喎,哈哈...!」我有啲尷尬咁笑,之後都唔知講咩好啦,大家耷低頭食飯。
 
「...係呢,今日好似好忙咁喎,搞緊啲咩大壇野呀?」我打開話匣子。
 
「...吓...係...係呀,公司入左批意大利雲石枱,成五十幾張,咪要安排收貨同入倉囉。」詠恩回應。
 
「...係牙!」我hea應,因為其實都唔係好了解公司啲野,
得閒真係要惡報一下先得啦,第時對住詠恩都唔洗冇野講吖嘛。
 
「...趕住去邊呀?」因為見詠恩都食得幾急吓,而且仲望左幾次錶,所以我問。
 
「...冇...冇野呀!」詠恩唔肯講。




 
「...我有揸車喎今日,不如我車你去啦,唔洗食到咁急,對身體唔好呀!」我提出。
 
「.....!」詠恩冇回應,不過食野明顯慢左落離。
 
就係咁,等佢稍為慢啲咁食埋佢個海南雞飯之後,我就帶住詠恩去攞車啦。
其實部車就係泊左喺始創,過一條馬路就到啦。上車後,我問詠恩要去邊度,
佢依然係神神祕祕咁,只係話去置富,至於做乜野、搵邊個就一律都無從得知。
我見詠恩擺明唔想講咁款,開車期間我都冇再追問啦,只係間中聊佢講兩句關於公司嘅野。
我發覺我講公司野嘅時候,詠恩通常都好肯回應,但係每當話題一涉獵到自身或者屋企,
詠恩嘅自我保護機制就會啟動,對所有問題都唔作出回應。
 
部車好快就到左置富,喺我打量緊應該喺邊個位置停果陣...
 
「...求其搵個位放低我得架啦!」詠恩又忽然變得緊張,好似好想快啲離開咁。




 
「...就依度啦!」隔左十秒左右,詠恩再一次催促。
 
「...禁區離喎,要前小小先得呀!」我回應,詠恩雖然心急,
但聽到我話係禁區,所以繼續無奈咁唔出聲。
 
再過多十幾秒,終於都過哂禁區線,於是我慢慢咁將部車停埋一邊,開門放詠恩落車啦。
 
「...唔該哂!」門都未開哂,詠恩已經急不及待咁跳落車啦,之後向住商場門口方向跑左入去。
 
諗諗吓,其實頭先食完飯都匆匆忙忙咁趕住去攞車,冇去過廁所...而家都真係有啲急急地,
於是我放低左部車,行左入商場搵廁所去啦。其實去廁所都只不過係借口離姐,
好奇想睇吓詠恩到底搞乜野先係重點。吖...明明都係遲佢半分鐘左右,
但係一行到入商場詠恩已經冇左影啦。
 




我搵廁所之餘,不忘搜索詠恩嘅身影,可惜都係未有收穫。
小解完畢...諗住行返去部車度啦,但係一出商場...,
詠恩竟然就企左喺商場門口巴士總站等緊巴士,
而且身邊...竟然多左個人?望真啲原來係浠琳!!!
 
浠琳著住白色t恤短褲、拖鞋、咩住個黑色索袋,
個頭仲濕濕地咁應該啱啱喺置富個室內泳池度練完水,
哦...原來詠恩咁趕就係趕住離接浠琳。
 
雖然好想同浠琳傾吓計,但係既然詠恩唔想我知道,我就唯有扮見唔到咁,
偷偷地掉頭離開啦。但係唔走由特止,一掉頭就聽到一把熟悉嘅聲音啦。
 
「...聰哥哥!!!」我認得係浠琳把聲,自然反應回頭望望。
 
「...媽咪睇吓係聰哥哥呀!」浠琳係咁叫詠恩望,
詠恩望到我後變得不知所措,而我就更加進退兩難,
走又唔係...行埋去又唔係,企左喺度苦笑咁同浠琳揮一揮手。
 
過左幾秒...浠琳向我行左埋離,我望一望詠恩,只見詠恩唔知想點咁,
好似想開口阻止但又欲言又止咁,到最後都係冇出到聲,慢慢跟喺浠琳後面。
 
「...聰哥哥!點解你會喺度嘅?」浠琳好奇問我。
 
「...吓...er...」死啦,點回佢好呢?
 
「...你估吓!」我笑笑口回應。
 
「...er...係咪離接我呢?」浠琳諗一諗,之後興奮回應。
 
「...哈哈...哈哈!」我冷笑望一望喺後面嘅詠恩,都係交返個波比佢自己答啦。
 
「...媽咪!係咪呀?你同聰哥哥一齊離接我架?」浠琳回頭係咁問詠恩,
依家到詠恩自己諗吓點解畫,唔知佢會點答呢?
 
「...er...我諗聰哥哥咁啱經過姐!」詠恩無奈回應。
 
「...係...係囉,我經過咋嘛...哈哈...哈哈!」我和應。
 
「...哦...原來係咁,聰哥哥會車埋我地返屋企架呵?」天真嘅浠琳一啲都冇懷疑過我。
 
「...唔好阻住聰哥哥啦!」詠恩有啲無奈咁講。
 
「...好想坐呀,好啦媽咪!」浠琳拖住詠恩雙手,用哀求嘅眼神問,
雖然我都真係好想車佢地,但係依一刻都真係唔敢發表個人意見啦,
慢慢睇吓詠恩會點回應。
 
「......!」詠恩竟然冇出聲,轉移望住我將個波交設比我?
依球單刀我唔順水推舟都對唔住自己啦。
 
「...唔...唔阻,反正我都順路!」地球係圓架嘛,點都順路架...嘻嘻!
 
「...好野...多謝聰哥哥!」浠琳急不及待咁衝左上車,而詠恩唯有死死氣咁跟埋上離。
 
「...點呀,練水練成點呀?」開車之後我見咁靜首先打開話題。
 
「...好辛苦呀!」浠琳回應。
 
「...哈哈...傻女,唔辛苦點會有成果呢!你諗吓你由一開始到依家係咪進步左好多游得快左好多?」我笑笑口回應。
 
「...係呀,我前年仲未係好識游,依家游得好快啦!」浠琳好自豪咁講。
 
「...咁咪係囉!係呢...聰哥哥唔記得左你幾時比賽添!」我問。
 
「...四月廿七日呀!」浠琳回應。
 
「...吖...係,記得啦!咁喺邊度比賽?」浠琳提提我先醒起。
 
「...er...唔記得左,媽咪知架!」浠琳諗一諗之後望一望詠恩。
 
「...吓...er....!」詠恩有啲愕然。
 
「...唔記得唔緊要喎!」我講。
 
「...唔...唔係!」
 
「...係...維...維園泳池!」詠恩回應。
 
「...哦!」我輕輕帶過!
 
「...聰哥哥你會離架呵?」浠琳再問。
 
「...er...!我得閒嘅,應該會離!」我望一望詠恩,見佢帶乜反應,所以應承左!
 
歡樂嘅時光過得特別快,部車好快就到左香港仔中心,送左佢兩個落車之後,
我就好唔捨得咁開車走啦。其實諗極都諗唔明點解詠恩到今時今日都唔肯講浠琳到底係咪我個女,
照道理詠恩無理由唔知架,加上浠琳嘅出生年份同我地拍拖嘅時間亦都不謀而合,
仲有小苑提到咁多年離都冇見過詠恩拍拖,或者同男仔去街之類,
基本上可以有機會係浠琳爸爸嘅人真係絕無僅有架啦喎,
定係詠恩仲係嬲緊我當年搵都冇搵過佢地,所以專登唔俾我哋兩個相認呢?
越諗就越奇怪,都冇計架啦,船到橋頭自然直,
起馬都要等老大份(親子鑒定報告)攞得返先或者可以從中搵到一啲線索。