中左六合彩頭獎四千八百萬，依家唔知點算?: 65
「...嚓～」咦...係鐵閘聲喎！
「...咁你記得加幾片薑啦，我地冇咁早返架。」有把女人聲，應該係詠恩阿媽。
「...嘭～」緊隨其後關埋鐵閘嘅聲響。
我喺門邊隱約見到一對中年男女，應該係詠恩嘅父母，睇離佢地今晚有節目喎。
「...叮噹！」再過多五分鐘，我終於忍唔住行左出去撳鐘啦。
「...吚呀～～」大門拉開，有啲運仔喎，係詠恩離架。
「...吓...！」詠恩用驚訝嘅眼神望住我，咦...詠恩個樣好似好憔悴的，
兩個黑眼圈出哂離，好似幾日冇訓過咁款。
「...我可以入離嘛？」我微笑咁問。
「...點...點解...你會離？」詠恩繼續驚訝。
「...見你失蹤左成個禮拜咪離睇吓你發生咩事囉！」我繼續微笑。
「...你...唔好理我啦！」詠恩擰歪左小小面。
「...開門先啦。」我有啲焦急。
「...你走啦。」詠恩有啲抗拒，始終都係唔肯開門點算好呢？
「...公司叫我攞返啲野比你呀，你開門啦。」我講左個大話，
作勢揸住啲野喺手咁，又專登放喺鐵閘睇唔到嘅位。
「...吓？」
「...嚓～」詠恩比我呃到啦，即刻開左門，我緊係即刻攝左入去啦。
「...我有咩漏左喺公司呀？」詠恩回頭問我。
「...er...漏左包紙巾囉。」我除手喺褲袋攞左包紙巾出離。
「.......！」詠恩知道比我呃左，唔知講咩好。
「...咦～煮緊飯牙？」我四圍望緊。
「...你...做咩姐。」詠恩無奈回應。
「...公司話我同你喺同謀炒埋我啦。」我繼續吹水。
「...吓！點...點會咁架？」詠恩聽到之後再一次驚訝。
「...唔知呀，所以咪離問你到底發生咩事囉。」我繼續扮唔知。
「...佢地...點會連你都炒埋架，根本就唔關你事...」詠恩喺度自言自語，好似有啲自責咁。
「...咁你而家可以將成件事講一次我聽未？」我繼續扮受害者。
「...咁...！」終於...詠恩都肯乖乖咁將成件事講一次我聽啦，可能佢覺得連累左我啦，
所以我問咩佢都有問必答，可惜聽完佢講嘅版本，都搵唔到啲咩可以證明佢清白嘅證據吖，
睇離都真係冇咩進展。
「...你咁講...即係成件事都係耀哥一手一腳安排架啦？」我講。
「...係...應該係啦，果日佢一早就返左離，之後無啦啦話啲貨離左喺倉門口叫我即刻過去收貨。
過到去...我想開箱檢查，啲人又話同左你地主管講話唔洗，我咪打比耀哥囉，
佢就叫我唔洗驗住，話有急事搵我，叫我拿拿臨收左貨返過去舖頭果邊喎！」詠恩憶述。
「...有咩證明？」我問。
「...吓...er...我記得當時mandy姐、同Yvonne 姐都喺度。」佢地應該聽到架。
「...物證呢？」我再問。
「...物證？」詠恩有啲疑惑。
「...口講無憑，況且人地肯同你做証人先得架，人會講大話...物證就唔會講大話嘅。」我再講。
「...咁...咁樣...」詠恩諗左一陣。
「...好似真係冇喎！」詠恩笑笑口講，果個發夢咁嘅傻笑樣真係...不得之了！
「...你仲笑得出嘅！」反而我呆左。
「...算啦，咪當自己唔好彩囉。」詠恩嘆一嘆氣。
「...咁我又唔好彩啦喎？」我無奈回應。
「...對...對唔住...連累左你，一係我聽日幫你返公司解釋吖？」詠恩繼續自責。
「...有咩用吖，人地點解要信你先？」我回應。
「...咁...！」詠恩都唔知講咩好啦。
「...我唔理呀，既然你煮緊飯，我要喺度食返餐飯保數呀！」我繼續無賴。
「...乜你咁架...！」詠恩雖然唔係咁願意，但係都係果句啦，佢而家有負於我，仲唔肉隨針板上咩。
就係咁...詠恩應承比我喺度食一餐飯，我地嘅距離又近左一大步啦。
詠恩煮飯途中我自己一個人坐左喺梳化度，昔日嘅畫面再一次湧現，
果個掛牆鐘，果個電視櫃，雖然飯枱就轉左，但係大部份野同八年前都真你冇咩分別。
我嚫詠恩煮緊飯冇為意仲行埋入詠恩間房度睇添。房入面反而變得好多，
多左好多浠琳嘅物品喺度，做功課嘅書枱同書櫃再加一啲玩具，所以都真係幾逼吓。
眼見差唔多全部都係浠琳嘅野，詠恩自己嘅野就寥寥可數，再望望牆上面仲有書枱上面嘅相，
全部都係詠恩同浠琳嘅合照，手多多嘅我緊係拎起啲相睇吓啦。睇吓先...依幾張係去海洋公園果陣影嘅，
望落應該係依兩年嘅事，再望望有幾張係浠琳生日果陣開生日會影嘅，真係好想當時身歷其境，
感受一下浠琳果份喜悅，再望望...嘩...竟然有一張係手抱嘅浠琳，似係浠琳啱啱出世，詠恩仲著住醫院衫，
望到當時詠恩嘅眼神非常疲累，再加幾分喜悅...媽媽真係偉大。
「.....咦！」睇睇吓果張相，相架後面忽然跌左啲野出離。
我緊係拿拿臨執返起佢啦，都唔知係咪整爛左野添。
「....！」咦...但係跌出離嘅野，竟然係當年我同詠恩一齊影嘅咭，
因為當年仲係好興貼紙相嘅年代，果陣我都有同詠恩去影，
但係我比較鍾意影咭多啲，因為冇咁易唔見同可以放喺銀包，
我記得我都有同一張咭，而且仲原好保存喺我房嘅盒仔度，
但係估唔到原來詠恩都一直keep住，仲放喺浠琳嘅出世相後面...嘻嘻...。
「....你做緊咩呀？」廚房入面忽然傳離詠恩嘅叫聲。
「...冇野呀，睇緊電視咋嘛！」驚到我即時攝返張咭入去放好，再衝返出廳扮冇事發生。
「...又話睇緊電視？都冇開！」詠恩行左出離望一望個電視，手上拎住張膠枱布準備鋪枱。
「...我話想睇電視，但係唔識開。」我企左起身，行埋枱幫詠恩舖枱布。
「...個遙控咪係以前果個位...囉...！」詠恩指一指電視櫃下面，講都尾好似有啲尷尬咁...停左落離。
「...我入去煮埋啲餸先...！」之後即刻走返入廚房。
就係咁...幾分鍾後詠恩就攞左幾碟餸出離啦。睇吓先...有「豆豉鯪魚油麥菜」、
「蝦仁炒蛋」，仲有蒸左條「豉汁王立倉」睇落賣相都唔差咁喎！
「...唔好意思...唔夠餸所以開左罐頭豆豉鯪魚同冰箱啲急凍蝦仁。」詠恩邊講邊坐低。
「..無所謂啦，有得食就得啦。」我回應。
就係咁...闊別左咁多年冇喺詠恩屋企食飯，今日終於都可以再食啦，
不過當年係詠恩個工人姐姐煮，今日換成詠恩親自操刀。食落味道都真係唔差，
記得當年詠恩都係勉強識煮吓公仔麵咁，估唔到今日能夠蒸條魚仲蒸得咁好食添。
「...做咩呀，啲餸好難食牙？」詠恩見我冇出聲主動問我。
「...好食過你工人姐姐煮果啲！」我眼發淚光咁回應。
「...咪吹水啦！」詠恩有啲唔信我講。
「...真架，點解你廚藝進步左咁多嘅？」我反問。
「...工多藝熟姐...好多野都係逼返離嘅！」詠恩再講。
「...！」我唔知講咩好。
「...不如講第二啲野。」詠恩想轉話題。
「...咁講返公司壇野囉。」我回應。
「...吓...我講哂架啦喎。」詠恩拎住個碗望一望我講。
「...你咪話見過耀哥親手簽嘅單嘅？」我講。
「...吓...咁...咁又點呀？」詠恩疑惑回應。
「...咁咪要搵囉！」我講。
「...吓...唔好啦！」詠恩個樣好似有啲驚咁。
「...一定要搵，個衰人累到我地比人炒，點都要拖埋佢落水啦。」我回應。
就係咁...食完飯之後我格硬要詠恩跟我出去，就好似綁架咁夾左詠恩上我部車度。
講吓笑姐...不過詠恩都真係唔多願意架啦，但係每當佢唔願意我就會提我比人炒嘅事，
每次詠恩一聽到就好似中左降頭咁任我魚肉，諗諗吓都覺得自己過份左添。