中左六合彩頭獎四千八百萬，依家唔知點算?: 66
「...你想車我去邊喎！」開車途中...詠恩好無奈咁問。
「...返公司個倉囉。」我回應。
「...吓...返去做咩喎！」詠恩再問。
「...返去幫你一齊搵吓搵唔搵到耀哥嘅罪証呀！」我講。
「...吓...咁大件事！」詠恩有啲驚，就係咁...我好快就揸返部車過旺角啦。
「...喂呀...唔好啦。」去到倉門口果陣，詠恩再一次洧底。
「...算啦，你唔敢就返去啦，等我自己一個比人拉啦。」我一邊用我條後備倉匙開門，一邊講晦氣說話。
「...唔...唔好啦，算啦！」詠恩竟然主動拖住左我隻手，有小小想拉我走咁款。
「...吖...！」我緊係唔放過任何機會啦，一手就拉左詠恩入倉，再落閘放狗。
「...嘭～」
「...嘻嘻嘻嘻～」我扮左個奸笑樣，對住詠恩裝腔作勢咁。
「...你做咩呀？」詠恩有啲驚，退後左幾步雙手抱胸。
「...冇野呀，搞吓笑姐。」我變返正常樣，又行返開啦。
「...冇...冇離正經！」詠恩知道我玩，依家放返開雙手，有啲嬲嬲地咁話我。
「...諗住大家輕鬆啲吖嘛！」我邊行邊講。
「...枉你仲笑得出，而家我地擅闖他人地方呀！」詠恩回應。
「...唔離都離左啦，咁而家傾計緊要定搵單緊要先？」我笑笑口講。
「...搵...單...！」詠恩有啲無奈咁回應。
「...咁就開始搵啦我地！」我回應。
就係咁...我地就開始左尋找貨單的故事啦。
不過其實都係得詠恩一個人搵多，我只係喺側邊輔助，
因為我根本就唔知啲單係點嘅樣。
我地由夜晚九點幾搵到差唔多十一點終於...
「...搵到啦！」詠恩大叫...。
「...搵到拿？」我笑笑口問。
「...拿...！」詠恩遞左比我，係幾張單...但係其實我都唔係幾識睇。
「...就係依幾張？」我問。
「...係呀！」詠恩答。
「...依幾張咩離架？」我再問。
「...拿...依張就係我地公司落單買貨果陣對方比我地嘅。」詠恩喺我側邊講解。
「...你睇吓...有耀哥簽名架！」詠恩指一指單底，的確有耀哥簽名，仲有日期各樣那樣咁。
「...另一張呢...就係收貨果陣嘅底單，你睇吓...吸左耀哥個公司印喺度架！」詠恩砸講第二張。
「...哦...ok啦，我聽日會親自張依兩張單交上寫字樓。」我回應。
「...你就咁行上去寫字樓，佢地真係會理你？」詠恩有啲質疑。
「...車...最緊要有道理姐，我相信老細係一個明白事理嘅人離嘅！」我回應。
「...係咩...」詠恩仲係唔多信咁。
「...一係你同我一齊上去囉。」的再問。
「...唔好...唔好！你要上你自己一個上。」詠恩耍手擰頭。
「...好啦...今日辛苦哂你啦。」我講。
「...鬼叫我連累左你咩！」詠恩無奈回應。
「...我車你返去啦。」我講。
就係咁...執返好啲野鎖返好倉門，我就開車送詠恩返去啦。
「...等我好消息啦，老細睇完之後一定會叫你返公司對你作出補償嘅。」揸緊車果陣我講。
「...邊有可能吖，就算搵到啲單都證明唔到我冇份啦，唔洗理我架啦，
最緊要證明唔關你事就得架啦！」詠恩無奈回應。
「...er...可唔可以車我去一個地方先呀？」詠恩忽然問。
「...可以...想去邊度呢？」我回應。
「...去一去田灣邨吖。」詠恩講。
「...哦！」就係咁我就兜左去上田灣邨啦。其實我之前就係住喺田灣邨，
都係喺香港仔附近，只係離詠恩屋企五分鐘車程左右，不過而家都成十二點幾啦喎，
到底詠恩上田灣邨做咩呢？
好快就到左田灣邨，我沿住斜路兜上去，依度真係好斜...條邨根本就喺山上面，
而且冇巴士上，小巴又比較梳落，邨內設施又不足，商舖都冇間、街市又冇...
連商場都比大財團收購左變左做國際學校，加上邨內連𨋢同扶手電梯都冇，
邨民出入一係就等好耐小巴，一係就硬掘行上山，我地南區人都稱依條邨做「悲情屋村」，
難怪平時唔會想欠我嘅詠恩都要叫我幫手車佢上去。但係佢夜麻麻上去，到底搵邊個呢？
「...前面果度挨埋一邊得架啦。」詠恩指一指左手邊講，於是我就停左埋去啦。
依度而家黑媽媽，人影都唔多隻，只係得兩個廿零歲青年坐左喺三座樓下嘅一啲膊位喺度打機。
「...我到左你樓下啦。」詠恩拎左個電話出離打。
「...唔好意思呀，要等一等！」收線後詠恩有啲唔好意思咁同我講。
「...唔緊要！」我笑一笑回應。
大約三分鐘左右，終於有人喺大廈步出。係一個女仔拖住一個細路女，
好正路細路女就係浠琳，而個女仔都係廿零歲，好熟口面...再行近啲...我終於都認到，
依個女仔應該係詠恩嘅表姊，睇離詠恩今晚搵左佢表姊睇住浠琳，所以先咁得閒陪我癲。
「...咁夜嘅！」詠恩表姊問詠恩，而家詠恩行左落車接浠琳。
「...聰哥哥！」浠琳見到我即時衝左上車，係咁問我野。
「...聰哥哥？」聽到喺車出面嘅詠恩表姊有啲疑惑咁問，
再係咁望入離睇吓我係邊個。見到詠恩個樣都相當尷尬，
但係又冇辦法咁寒暄左幾句就面懵懵咁行返上車。
「...有冇唔聽表姨話？」一上車詠恩就問浠琳。
「...緊係冇啦！」浠琳回應。
「...聽日英文小測溫好哂未？」詠恩再問，係喎...
我記得詠恩表姐係小學教師離嘅，唔怪得會帶左浠琳去佢度啦。
「...溫好哂啦。」浠琳回應。
「...媽咪，點解你會同聰哥哥一齊嘅？」浠琳忽然問。
「...吓...er！」詠恩唔知點答。
「...幾時水運會話浠琳？」我推開左個話題。
「...廿七日吖嘛！聰哥哥你應承左離睇我架嘛，咁都唔記得！！」浠琳扮嬲樣。
「...哈哈～點會唔記得呢！」其實真係唔記得。
唔洗五分鐘，就已經送到佢地返屋企樓下啦。
「...byebye 啦，聰哥哥！」落車後浠琳向我揮手。
「...喂！」正當詠恩回頭想走果陣我叫住左佢。
「...吓！咩呀？」詠恩仲係發緊夢果個樣。
「...聽日記住返工呀！」我講。
「...痴線～咪玩啦。」詠恩有啲無奈咁回應，之後就回頭背住我揮一揮手就走左啦。